Qeshqer su ishliri idarisidiki Uyghur xizmetchilerning 15 pirsenti yighiwélish lagérigha soliwélin'ghan

Muxbirimiz shöhret hoshur
2019-03-06
Share
lager-atush-lazimetlik-uchun-kelgenler.jpg Lagérdiki tughqanlirigha nerse-kérek ekélip bériwatqanlar tizilip tekshürüshtin ötmekte. 2018-Yili 3-dékabir, atush.
AP

Türkiyediki Uyghur pa'aliyetchiliri  ötken jüme küni toluqlighan tutqundiki ziyaliylar tizimlikide qeshqer sheherlik su ishliri idarisining memtili wahap qatarliq 6 xizmetchisining yighiwélish lagérida ikenliki qeyt qilin'ghan. Muxbirimizning bu yip uchigha asasen qeshqerdiki alaqidar siyasiy qanun tarmaqlirigha qarita élip barghan téléfon ziyaretliri dawamida, mezkur uchurning toghriliqi delillendi. Weziyettin xewerdar kishiler yene mezkur su ishliri idariside 50 nechche ishchi-xizmetchi barliqi, lagérgha ekétilgen ishchi-xizmetchilerning omumi Uyghur ishchi-xizmetchi sanining 15 pirsentini igileydighanliqini melum qildi.

Türkiyediki pa'aliyetchi abduweli ayupning tutqundiki ziyaliylar tizimlikide memtili wahap, ekber emet, turghun asim, nurmemet niyaz, abdoghopur tursun, sabirjan hamut qatarliq 6 kadirning nöwette yighiwélish lagérida ikenliki qeyt qilin'ghan.

Biz, bu uchurning toghra-xataliqini aydinglashturush üchün awwal qeshqer sheherlik edliye idarisige téléfon qilduq. Alaqidar xadimlar bu heqte uchur bérishtin izchil halda özini qachurdi. Tutqundiki ziyaliylar tizimlikide mezkur 6 tutqunning 30 yash bilen 54 yash arisida ikenliki bayan qilin'ghan. Tizimlikte mezkur 6 tutqunning isimliki élan qilin'ghandin kéyin, qeshqer weziyitidin xewerdar kishilerdin biri radiyomizgha uchur yollap, tutqun turghun asimning téxnik mudir ikenliki, sabir hamutning bolsa pénsiyede ikenlikini melum qildi.

Izchil élip barghan téléfon ziyaretlirimiz dawamida, qeshqerde siyasiy-qanun saheside xizmet qiliwatqan bir xadim, qolidiki arxiplargha asasen, qeshqer su ishliri idarisidin 6 neper xadimning lagérda ikenlikini delillidi.

Ötken yilning béshida igiligen uchurlirimizda qeshqerde 120 ming kishining lagérda ikenliki ashkarilan'ghan؛ xotendiki bir kent sékrétari özlirige ahaliler nopusining 40 pirsentini "Terbiyelesh" ke apirish heqqide yuqiridin uqturush chüshkenlikini ashkarilan'ghan idi. Qeshqer weziyitidin xewerdar kishi su ishliri idarisidiki tutqunlar heqqide radiyomizgha yetküzgen melumatida, tutulghanlarning mezkur idaridiki Uyghur ishchi-xizmetchiler sanining 15pirsentini igileydighanliqini eskertken. Siyasiy-qanun sahesidiki wezipidar xadimmu, su ishliri idarisidiki omumi ishchi-xizmetchi sanining 60 che ikenliki, buning 40 qa yéqinining Uyghurlar ikenlikini tilgha aldi. Ziyaliylar tizimliki we weziyettin xewerdar kishining melumatida, mezkur 6 neper xadimning konkrét qandaq seweb yaki bahane bilen tutulghanliqi bayan qilinmighan. Mezkur mes'ul xadim, bu 6 xadimdin bir qismining téléfonidin chiqqan mesile seweblik tutulghanliqini ashkarilidi.

Weziyettin xewerdar kishi radiyomizgha yollighan uchurida, mezkur su ishliri idarisi kespiy jehettin siyasiy we medeniyet pa'aliyetliridin nisbeten yiraq bolghanliqi üchün, Uyghur xizmetchiler sanining 15 pirsentining tutulghanliqini, bashqa nazuk sahelerde bolsa tutqunlar nisbitining téximu yuqiri ikenlikini ilgiri sürgen. Ilgiriki éniqlashlirimizda qeshqer Uyghur neshriyati xizmetchilirining 30pirsentining tutqunda ikenliki ashkarilan'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet