Даириләрниң байрамлиқ дәм елишни узартиши “муқимлиқ үчүн” икәнлики илгири сүрүлмәктә

Мухбиримиз меһрибан
2015.09.17
Share on WhatsApp
Share on WhatsApp
xitay-saqchi-meschit-charlash.jpg Хитай қораллиқ сақчилири җүмә намизидин бурун мәсчит әтрапини чарлаватқан көрүнүш. 2009-Йили 10-июл, үрүмчи.
AFP

Игилигән әһваллардин мәлум болушичә, бу йил мусулманларниң қурбан һейти вә хитайларниң тавуз чағини вә хитайниң дөләт байрими арқа-арқидин келидиғанлиқи үчүн уйғур аптоном район даирилири уқтуруш чиқирип, 24-сентәбирдин 28-сентәбиргичә дәм алса болидиғанлиқини, шараити яр бәргән җайлар дөләт байриминиму улап хизмәтчиләрни 10-айниң 5-күни дүшәнбигичә һәптилик тәтилгә қоюп бәрсә болидиғанлиқини билдүргән.

Үрүмчидин игилигән әһваллардин мәлум болушичә, бәзи идариләрдә хизмәтчиләргә йиғин ечип, узун мәзгиллик дәм елишқа орунлаштурушниң “уйғур аптоном райониниң 60 йиллиқини тәбрикләш мәзгилидики бихәтәрлик тәдбирлириниң бири икәнлики” әскәртилгән.

Үрүмчидин зияритимизни қобул қилған мәлум идарә хадиминиң билдүрүшичә, уларниң идарисидә байрам мәзгилидики нөвәтчи хадимлардин башқа барлиқ хизмәтчиләр 10-айниң 5-күнигә қәдәр қоюп берилидиғанлиқи уқтурулған. 16-Сентәбир чаршәнбә күни чүштин кейинки йиғинда идарә башлиқи аввал байрам мәзгилидики бихәтәрлик бәлгилимилирини оқуп өткән.

Өз кимликини вә идарисини ашкарилашни халимиған бу хадимниң билдүрүшичә, уларға оқуп берилгән бихәтәрлик бәлгилимилиридә, 1-өктәбир уйғур аптоном райониниң қурулғанлиқиниң 60 йиллиқини хатириләш паалийити өткүзүлидиғанлиқи үчүн, үрүмчи шәһиридә аптомобилларға тақ, җүп күнлүк номур тахтиси түзүми йолға қоюлуп, шәһәр бойичә қаттиқ бихәтәрлик тәдбирлири елинидиғанлиқи, шәһәр мәркизидики йол бойиға җайлашқан аилиликләр биналириниң кочиға қарайдиған деризилирини 1-өктәбир күни ачмаслиқи, асманда ләгләк учурмаслиқи, кәптәр учурмаслиқи, тизгинәк билән башқурулидиған оюнчуқ айропиланларни учурмаслиқи, башқа юртлардин келидиған уруқ-туғқан, дост бурадәрлириниң тизимликини идаригә вә аилиликләр қорусидики бихәтәрликкә мәсул хадимларға тапшуруши, бу мәзгилдә чәтәлдин зиярәткә келидиған уруқ-туғқанлири болса уларниң келиш вақти вә үрүмчидә туридиған күн санини алдин-ала өзи турушлуқ райондики сақчиханиға тизимға алдуруши қатарлиқ мәзмунлар бар икән. Бу хадим йәнә, шу күни идариниң партком секритариму сөз қилип,“бу қетим қурбан һейтлиқ дәм елиш, алаһидә мәзгилгә тоғра кәлгини үчүн үч байрамни қошуп дәм елиш берилди. Бу хил орунлаштуруштики 1-мәқсәт хизмәтчилиримизгә яхши дәм елиш-саяһәт пурсити яритип бериш, йәнә бир мәқсәт уйғур аптоном райони қурулғанлиқиниң 60 йиллиқини хатириләштин ибарәт бу муһим тәбрикләш паалийитини бихәтәр өткүзүвелиш, шуңа шараити яр бәргән хизмәтчиләр үрүмчидин башқа җайларға берип дәм елиш күнлирини көңүллүк саяһәт, туғқан йоқлаш билән өткүзсун дәп идаридин 10 күнлүк дәм елишни қарар қилдуқ” дегән.

Чаршәнбә күнидики йиғинда йәнә, байрам мәзгилидә нөвәтчи хадимларниң исми оқуп өтүлүп, уларниң байрам мәзгилидә идариниң бихәтәрликини қоғдашқа қоюлған сақчиларға йеқиндин һәмкарлишиши, 1-өктәбир уйғур аптоном райониниң қурулғанлиқиниң 60 йиллиқини хатириләш паалийити мәзгилидики бихәтәрлик тәдбирлири 3-сентәбир японға қарши урушниң 70-йиллиқини хатириләш мәзгилидә бейҗиңда елип берилған бихәтәрлик тәдбирлиригә охшашла қаттиқ болидиғанлиқи алаһидә тәкитләнгән.

Уйғур елиниң үрүмчидин башқа җайлиридин игилигән әһваллардин мәлум болушичә, наһийә,йезилардики мәктәп вә идариләрдиму хизмәтчиләргә қурбан һейт вә тавуз чағинини қошуп, барлиқ һөкүмәт хизмәтчилири, оқутқучи-оқуғучиларниң 5 күнлүк дәм елишқа қоюп бериш яки өктәбир байримини қошуп узун мәзгиллик тәтилгә қоюп берилидиғанлиқи уқтурулған.

Радиомиз зияритини қобул қилған мәлум оқутқучиниң билдүрүшичә, уларниң наһийисидә һейтлиқ дәм елиш билән өктәбир байримилиқ дәм елиш қошулуп, 10 күнлүк узун тәтил қоюп берилидиғанлиқи һәққидә хәвәрләр тарқалған. Чаршәнбә күнидики сиясий өгиништә йәнә һейт, байрам мәзгилидики бихәтәрлик тәдбирлири оқуп өтүлгән.

Уйғур аптоном райондики “мустәқил кинәзлик” дәп тәриплинидиған “ишләпчиқириш қурулуш армийиси”гә қарашлиқ идарә, җәмийәт, мәктәпләрдә һейтлиқ 5 күнлүк дәм елиштин кейин 2 күн ишләп андин йәнә өктәбир байрими үчүн дәм елишқа айрим қоюп берилидиғанлиқи уқтурулған.

Чәтәлләрдики дуня уйғур қурултийи қатарлиқ уйғур тәшкилатлири вә уйғур вәзийити көзәткүчилири, уйғур ели даирилириниң хитайниң дөләт байрими мәзгилигә тоғра кәлгән қурбан һейт мәзгилидә 10 күнгә созулған дәм елишни орунлаштуруши вә ашкара һалда дәм елиш мәзгилидики бихәтәрлик тәдбирлирини тәкитлиши, әмәлийәттә һөкүмәт даирилириниң йеқиндин буян барғанчә күчийиватқан уйғурларниң қаршилиқ һәрикәтлиридин вә байрам мәзгилидә аммиви сорунларда йүз бериш еһтимали болған қаршилиқ һәрикәтлиридин әнсирәш вәһимисиниң күчәйгәнликидин икәнликини тәкитлимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.