Da'irilerning bayramliq dem élishni uzartishi “Muqimliq üchün” ikenliki ilgiri sürülmekte

Igiligen ehwallardin melum bolushiche, bu yil musulmanlarning qurban héyti we xitaylarning tawuz chaghini we xitayning dölet bayrimi arqa-arqidin kélidighanliqi üchün Uyghur aptonom rayon da'iriliri uqturush chiqirip, 24-séntebirdin 28-séntebirgiche dem alsa bolidighanliqini, shara'iti yar bergen jaylar dölet bayriminimu ulap xizmetchilerni 10-ayning 5-küni düshenbigiche heptilik tetilge qoyup berse bolidighanliqini bildürgen.

Ürümchidin igiligen ehwallardin melum bolushiche, bezi idarilerde xizmetchilerge yighin échip, uzun mezgillik dem élishqa orunlashturushning “Uyghur aptonom rayonining 60 yilliqini tebriklesh mezgilidiki bixeterlik tedbirlirining biri ikenliki” eskertilgen.

Ürümchidin ziyaritimizni qobul qilghan melum idare xadimining bildürüshiche, ularning idariside bayram mezgilidiki nöwetchi xadimlardin bashqa barliq xizmetchiler 10-ayning 5-künige qeder qoyup bérilidighanliqi uqturulghan. 16-Séntebir charshenbe küni chüshtin kéyinki yighinda idare bashliqi awwal bayram mezgilidiki bixeterlik belgilimilirini oqup ötken.

Öz kimlikini we idarisini ashkarilashni xalimighan bu xadimning bildürüshiche, ulargha oqup bérilgen bixeterlik belgilimiliride, 1-öktebir Uyghur aptonom rayonining qurulghanliqining 60 yilliqini xatirilesh pa'aliyiti ötküzülidighanliqi üchün, ürümchi shehiride aptomobillargha taq, jüp künlük nomur taxtisi tüzümi yolgha qoyulup, sheher boyiche qattiq bixeterlik tedbirliri élinidighanliqi, sheher merkizidiki yol boyigha jaylashqan a'ililikler binalirining kochigha qaraydighan dérizilirini 1-öktebir küni achmasliqi, asmanda leglek uchurmasliqi, kepter uchurmasliqi, tizginek bilen bashqurulidighan oyunchuq ayropilanlarni uchurmasliqi, bashqa yurtlardin kélidighan uruq-tughqan, dost buraderlirining tizimlikini idarige we a'ililikler qorusidiki bixeterlikke mes'ul xadimlargha tapshurushi, bu mezgilde chet'eldin ziyaretke kélidighan uruq-tughqanliri bolsa ularning kélish waqti we ürümchide turidighan kün sanini aldin-ala özi turushluq rayondiki saqchixanigha tizimgha aldurushi qatarliq mezmunlar bar iken. Bu xadim yene, shu küni idarining partkom sékritarimu söz qilip,“Bu qétim qurban héytliq dem élish, alahide mezgilge toghra kelgini üchün üch bayramni qoshup dem élish bérildi. Bu xil orunlashturushtiki 1-meqset xizmetchilirimizge yaxshi dem élish-sayahet pursiti yaritip bérish, yene bir meqset Uyghur aptonom rayoni qurulghanliqining 60 yilliqini xatirileshtin ibaret bu muhim tebriklesh pa'aliyitini bixeter ötküzüwélish, shunga shara'iti yar bergen xizmetchiler ürümchidin bashqa jaylargha bérip dem élish künlirini köngüllük sayahet, tughqan yoqlash bilen ötküzsun dep idaridin 10 künlük dem élishni qarar qilduq” dégen.

Charshenbe künidiki yighinda yene, bayram mezgilide nöwetchi xadimlarning ismi oqup ötülüp, ularning bayram mezgilide idarining bixeterlikini qoghdashqa qoyulghan saqchilargha yéqindin hemkarlishishi, 1-öktebir Uyghur aptonom rayonining qurulghanliqining 60 yilliqini xatirilesh pa'aliyiti mezgilidiki bixeterlik tedbirliri 3-séntebir yapon'gha qarshi urushning 70-yilliqini xatirilesh mezgilide béyjingda élip bérilghan bixeterlik tedbirlirige oxshashla qattiq bolidighanliqi alahide tekitlen'gen.

Uyghur élining ürümchidin bashqa jayliridin igiligen ehwallardin melum bolushiche, nahiye,yézilardiki mektep we idarilerdimu xizmetchilerge qurban héyt we tawuz chaghinini qoshup, barliq hökümet xizmetchiliri, oqutquchi-oqughuchilarning 5 künlük dem élishqa qoyup bérish yaki öktebir bayrimini qoshup uzun mezgillik tetilge qoyup bérilidighanliqi uqturulghan.

Radi'omiz ziyaritini qobul qilghan melum oqutquchining bildürüshiche, ularning nahiyiside héytliq dem élish bilen öktebir bayrimiliq dem élish qoshulup, 10 künlük uzun tetil qoyup bérilidighanliqi heqqide xewerler tarqalghan. Charshenbe künidiki siyasiy öginishte yene héyt, bayram mezgilidiki bixeterlik tedbirliri oqup ötülgen.

Uyghur aptonom rayondiki “Musteqil kinezlik” dep teriplinidighan “Ishlepchiqirish qurulush armiyisi”ge qarashliq idare, jem'iyet, mekteplerde héytliq 5 künlük dem élishtin kéyin 2 kün ishlep andin yene öktebir bayrimi üchün dem élishqa ayrim qoyup bérilidighanliqi uqturulghan.

Chet'ellerdiki dunya Uyghur qurultiyi qatarliq Uyghur teshkilatliri we Uyghur weziyiti közetküchiliri, Uyghur éli da'irilirining xitayning dölet bayrimi mezgilige toghra kelgen qurban héyt mezgilide 10 kün'ge sozulghan dem élishni orunlashturushi we ashkara halda dem élish mezgilidiki bixeterlik tedbirlirini tekitlishi, emeliyette hökümet da'irilirining yéqindin buyan barghanche küchiyiwatqan Uyghurlarning qarshiliq heriketliridin we bayram mezgilide ammiwi sorunlarda yüz bérish éhtimali bolghan qarshiliq heriketliridin ensiresh wehimisining kücheygenlikidin ikenlikini tekitlimekte.