Ürümchi poyiz istansisida partlash weqesi yüz berdi: az dégende ölük 3, yaridar 79

Muxbirimiz shöhret hoshur
2014.04.30
poyiz-istansisi-partlash-shi-jinping.jpg Poyiz istansisida partlash yüz bergendin kéyin, etrapida charlap yürgen qoralliq küchler. 2014-Yili 30-aprél, ürümchi.
weibo

Bügün xitay we xelq'ara axbaratlarning xewer qilishiche, ürümchi poyiz istansisi jenubi wogzalida partlitish weqesi yüz bergen. Tengritagh torining bu heqtiki eng yéngi xewiride bayan qilinishiche weqede 3 kishi ölgen, 79 kishi yarilan'ghan.

Weqeni bir qétimliq chong térrorluq hujumi dep bayan qilghan xewerde, hujumchilarning wogzaldin chiqiwatqan kishilerge pichaq we partlatquch bilen hujum qilghanliqi yézilghan.

Muxbirimiz bu heqte musteqil uchur élishqa tirishqan bolsimu, saqchilar we da'iriler weqe heqqide melumat bérishni ret qildi. Poyiz istansisigha yéqin jungyi doxturxanisida ishlewatqan bir xanim, yaridarlarning mezkur doxturxanigha ekilin'genlikini we qara kiyimlik saqchilarning etrapni qorshawgha élip qatnashni toxtatqanliqini bayan qilish arqiliq nöwette ürümchi weziyitining jiddiylikini melum qildi.

Weqe heqqide eng deslep xewer bergen shinxu'a agéntliqi, ürümchi poyiz istansisida weqe yüz bergenliki, weqening jenubi wogzalning chiqish éghizida yüz bergenlikini bayan qilghan. Emma weqede ölgen yarilan'ghanlar heqqide melumat bermigen. Weqe heqqide ijtima'iy taratqularda tarqalghan xewerlerde, weqe yüz bergen meydandiki jiddiychilikni eks ettürgen körünüshler körsitilgen bolsimu, weqening tepsilati heqqide melumat bérilmigen. Biz bu uchurlargha asasen aldi bilen weqe yüz bergen jenubi wogzaldiki saqchixanigha téléfon qilduq. Téléfonimizni alghan saqchi xadimi, saqchilarning hemmisining neq meydan'gha ketkenlikini, özining bolsa nöwette turuwatqanliqini bayan qilip, weqe heqqide sheherlik hökümetni melumat élishimizni tewsiye qildi. Sheherlik hökümet xadimi bolsa, bu heqte jawab bérelmeydighanliqini, bizningmu bu heqte so'al sorimasliqimizni buyrudi.
Saybagh rayonluq saqchi idarisining xadimi bolsa, weqe yüz bergendin kéyin özining idarige derhal chaqirilghanliqini, emma weqening tepsilatidin téxi xewer tapmighanliqini bayan qildi.

Weqe heqqide ijtima'iy taratqularda tarqalghan bir xewerde, weqede yette neper xitay ishlemchining ölgenliki we 50 nechche kishining yarilan'ghanliqi, shu küni weqe yüz bérishtin bir mezgil awwal xitay dölet re'isi shi jinpingning shu etraptiki bir meschitni ziyaret qilghanliqi, bu meschitning weqe yüz bergen wogzaldin 4 kilométir uzaqta ikenliki ilgiri sürülgen.

Birleshme agéntliq we b b s ning xewer qilishiche, xitay da'iriliri weqe heqqide ijtima'iy taratqularda tarqalghan uchur we resimlerni öchürüp mangmaqta. Shinxu'a agéntliqi weqe yüz bérip 10 sa'etke yéqin waqit ötkendin kéyin bergen ikkinchi xewiride, weqede 3 kishining ölgenliki we 79 kishining yarilan'ghanliqini, bulardin 4 nepirining éghir yaridar ikenlikini hem doxturxanida dawaliniwatqanliqini bayan qilghan. Xewerde yene hujumchilarning kishilerge pichaq we partlatquch bilen hujum qilghanliqini yazghan. Biz bu heqte melumat élish üchün weqe yüz bergen orun'gha yéqin jaydiki bir doxturxanida ishleydighan bir xanimgha téléfon qilduq:

So'al: siz jungyi doxturxanisida ishleysiz shundaqmu?
Jawab: shundaq. Men 3-qewette ishlewatattim, sa'et 5 mezgilide chirqirighan awazlar anglinip ketti, qarisaq saqchi we jiddiy qutquzush mashiniliri doxturxanigha yaridarlarni toshuwétiptu, qara kiyimlik saqchilar etrapni qorshiwélip, yollarni tosuwétiptu. Sa'et 6:30 bolghanda, doxturxanida teste chiqip arqa yollar bilen öyge kéliwaldim.

So'al: qanche kishi ölüp qanche kishi yarilan'ghanliqidin xewiringiz boldimu?
Jawab: yaq bolmidi, chünki qutquzush bölümi 1‏-qewette, men 3-qewette ishleymen, weqe heqqide héchkim bizge melumat bermidi.

Biz 2-doxturxanida aghriq béqiwatqan bir kishige téléfon qilduq, bu kishi weqedin xewiri bolghanliqini emma yaridarlarning 2-doxturxanigha ekilin'ginidin xewiri bolmighanliqini éytti.

Weqe heqqidiki gheyriy resmiy uchurlardin biride weqening adem bomba hujumi yeni özini partlitish xaraktérlik hujum ikenliki bayan qilin'ghan؛ yene bir uchurda hujumchilardin birining bir kishini pichaq tiqip öltürgenlikini, yene bir kishini pichaq bilen yarilandurghanliqini arqidin partlatquchni partlatqanliqini yazghan. Emma xitay axbarati hujumchilarning kimliki, qanche kishi ikenliki we aqiwiti heqqide héchqandaq melumat bermigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.