Ürümchi wogzali hujumchisi sedirdin sawutning kimliki heqqide bir qisim melumatlar ashkarilandi

Muxbirimiz shöhret hoshur
2014.05.07
sedirdin-sawut-wogzal-poyiz-istansisi-partlash-2.jpg Xitay da'irilirining sedirdin sawutqa alaqidar uchurlarni sürüshte qilish üchün chiqarghan uqturushi. 2014-Yili 1-may, ürümchi.
Social Media

30-Aprél küni ürümchi wogzaligha adem bomba hujumi élip barghan gumandarlardin sedirdin sawutning kimliki heqqide, hazirgha qeder uning 39 yash ikenliki we aqsu shayarning gülbagh yézisidin ikenlikidin bashqa melumatlar élan qilinmidi.

Muxbirimizning bügünki igileshliri dawamida sedirdin sawutning 4 we 11 yashliq ikki balining dadisi ikenliki, uning meyli resmiy, meyli atalmish héchqandaq jinayi xatirisi yoqluqi, eksiche qolum- qoshniliri we el-jama'et ichide izzet we hörmetke sazawer bir kishi ikenliki ashkarilandi. Yene melum bolushiche, sedirdin sawut ayali we balilirini élip 2012-yili 4-ayning 17-küni shayardin ayrilghan. U yurttin ayrilip 733 kündin kéyin bir sepdishi bilen birlikte ürümchi wogzalidiki xitay köchmenlirige qarita adem bomba hujumi élip barghan.

Xadim: gülbagh saqchixanisi!
Muxbir: shayar nahiyilik gülbagh saqchixanisimu?
Xadim: shundaq.
Muxbir: siz resmiy saqchimu yardemchi saqchimu?
Xadim: men dölet bixeterlikige mes'ul yardemchi saqchi.
Muxbir: sedirdin sawutning yurttin ayrilghan eng axirqi waqti qachan iken?
Xadim: 2012-yili 4-ayning 17-küni.
Muxbir: sedirdin sawutning ayali, baliliri barmu?
Xadim: ikki balisi bar, biri 11 yash, yene biri 4 yash. Yurttin ayrilghanda ikki balisi we ayalini bille élip ketken.
Muxbir: sedirdin sawut néme ish bilen shughullinatti? tirikchilik yoli néme idi?
Xadim: déhqan, déhqanchiliq bilen shughullinip kelgen.
Muxbir: buningdin ilgiri tutulghan yaki késilgen tarixi barmu?
Xadim: bir qétim ekélip soralghan iken, héchqandaq gunah bayqalmighachqa qoyuwétilgen iken.
Muxbir: tutulghanda qandaq bir ish bilen tutulghan iken?
Xadim: öyini birige ijarige bergen iken, ijarige alghan kishi üstidin guman tughulup tekshürüsh élip bérilghanda, ijarige alghuchida héchqandaq mesile körülmigechke, sedirdinmu qoyuwétilgen iken.
Muxbir: sedirdinning ata-anisi hayatmu? ular qanche qérindash?
Xadim: apisi tügep ketkendek ésimde, dadisi hayat. Sedirdinning semet sawut, tahir sawut we xéwirdin sawut dep üch qérindishi bar. Bu qérindashliriningmu héchqandaq weqe sadir qilghan tarixiy yoq.
Muxbir: sedirdinning jem'iyettiki tesiri heqqide tekshürüsh élip bardinglarmu? qaldurghan tesiri qandaq iken?
Xadim: jem'iyette yaman tesiri yoq iken, qolum-qoshniliridinmu, tonush-bilishliridinmu soriduq, yaman teripini qilghuchilar bolmidi, kishiler bilen yaxshi ötken iken.

Nöwette xitayning radi'o, téléwizorlirida, u térrorchiliq bilen eyibliniwatqan mushu peytlerde, uning qolum-qoshnilirining uning qilchimu yaman gépini qilmasliqi, eksiche yaxshi tesirini tilgha élishi, uning ilgiri jem'iyette yaxshi tesir qaldurghanla emes, belki yurt-jama'et ichide izzet we hörmet sazawer kishilerdin ikenlikini ashkarilimaqta. Mana mushu nuqtini nezerde tutqan, Uyghur milliy herikiti rehbiri rabiye qadir xanimmu, ürümchi wogzal weqesining gumandarliri üstide toxtilip, ularningmu xitay hökümitining ziyankeshlikige uchrighan kishiler ikenlikini bayan qilghan we uning a'ile-tawabi'atliridin hal sorighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.