Xoten nahiyesining layqa yézisida pichaqliq hujum yüz bérip wang famililik mu'awin yéza bashliqi öltürülgen

Xoten nahiyesining layqa yézisida bir xitay emeldarining yéqinda pichaqlap öltürülgenliki heqqide xewer tarqalghan idi.

Radi'oyimizning neq meydandin uchur igilishi jeryanida, bu weqening 15-may küni xoten nahiyesining layqa yéza merkizide yüz bergenliki éniqlandi.

Ziyaritimizni qobul qilghan layqa yéziliq saqchixanining ikki neper saqchisi bilen layqa yéziliq su, tok ponkitining nöwetchi xadimi ölgüchining wang famililik xitay ikenlikini, uning layqa yéziliq hökümette mu'awin yéza bashliqi wezipisidiki kishi ikenlikini delillidi.

Layqa yéziliq su, tok ponkitining kéchilik nöwetchi xadimining bildürüshiche, weqe buningdin 10 künler ilgiri, yeni 15-mayda yüz bergen. Shu küni chüshtin kéyin sa'et 5 tin ashqanda wang famililik mu'awin yéza bashliqi tamaq yéyish üchün ishxanisidin chiqqan. U yéza merkizidiki asasliq kochida qolidiki téléfonigha qarighach kétiwatqanda tuyuqsiz hujumgha uchrighan. 20 Yashlar öpchörisidiki bir Uyghur yash pichaq bilen uninggha shiddetlik hujum qilghan. Netijide wang famililik mu'awin yéza bashliqi neq meydanda ölgen. Hujumchi qéchip ketken bolsimu, emma shu küni kéchisi sa'et 12 etrapida tutulghan.

Hazir layqa yézisi jiddiy halette bolup, yéza tewesidiki barliq idare we ponkitlar 24 sa'etlik bixeterlik nöwetchilikini yolgha qoyghan. Ziyaritimizni qobul qilghan su, tok ponkitining nöwetchi xadimi: “Hazir kadirghimu, déhqan'ghimu aramchiliq yoq” dégen söz bilen ehwalni chüshendürdi.

Layqa yéziliq saqchixanining ikki neper nöwetchi saqchisi téléfon ziyaritimiz jeryanida hujumchining tutulghanliqini, uning ismining qéyum abla ikenlikini ashkara qildi.

Ular yene wang famililik xitayning layqa yéziliq hökümette muhim shexs ikenlikini, uning bala-chaqilirining barliqini delillidi. Halbuki, ular weqening tepsiliy jeryani, hujumchining qandaq seweb we meqset bilen xitay yéza bashliqigha pichaqliq hujum qozghighanliqi heqqide melumat bérishni ret qildi.

Biz layqa yéziliq saqchixanining bashliqi abdilimgha téléfon qilghan bolsaqmu, lékin u so'allirimizgha jawab bérishni ret qildi.

Melumki, layqa yézisi xoten shehirige 15 kilométir kélidighan yéza bolup, omumiy nopusi 30 mingdin ashidiken.

Közetküchiler, bu qétimliq yekke halettiki pichaqliq hujum weqesi we yéza bashliqi derijilik bir xitay emeldarining neq meydanda öltürülüshi Uyghurlarning xitayning rayondiki yuqiri bésimliq siyasitige qarshi eng yéqinqi inkaslirining biri dep qarimaqta.

Tepsilatini awaz ulinishtin anglighaysiz.