Qeshqerde xizmette passipliq qilghan saqchi késilgen, adem atqan saqchi östürülgen

Muxbirimiz shöhret hoshur
2018-01-09
Élxet
Pikir
Share
Print
Kocha charlawatqan Uyghur saqchi. 2015-Yili 17-awghust, aqsu.
Kocha charlawatqan Uyghur saqchi. 2015-Yili 17-awghust, aqsu.
AFP

Qeshqer sheher chasa amanliq mudirining pash qilishiche, qeshqer yéngibazar saqchixanisining sabiq mu'awin bashliqi, siyasiy yétekchi ablet turap, xizmet dawamida yeni qattiq zerbe dolqunida passip pozitsiyede bolghanliqi üchün "Ikki yüzlimichilik" bilen eyiblinip, 7 yilliq késilgen. 2015-Yili yüz bergen qeshqer taxta köwrük hujumining bash gumandari atawulla dawutni étip öltürgen, chasa kocha bashqarma saqchixana bashliqi alimjan, qeshqer sheherlik razwédka etritining mu'awin bashliqliqigha östürülgen.

Qeshqer weziyiti heqqide melumat bergen bir Uyghur muhajir, Uyghur rayonida nöwette dawam qiliwatqan yépiq terbiyelesh dolqunida saqchilargha pewqul'adde yuqiri telep qoyuluwatqanliqi, saqchi xadimlirining, bolupmu saqchixana bashliqlirining déloni salmaqliq bilen yaki puxta bir terep qilish pozitsiyesining xitay da'iriliri teripidin, siyasiy chaqiriqqa maslashmasliq yaki passipliq, dep qariliwatqanliqi we bu xil qaralghanlarning wezipisidin élip tashlinish yaki qamaq jazasigha buyruluwatqanliqini melum qildi. Qeshqer sheher chasa amanliq mudiri, ene shu xil jazagha uchrighanlardin yéngibazar saqchixanisining sabiq mu'awin bashliqi, siyasiy yétekchi ablet turap heqqide melumat berdi.

Uning déyishiche, siyasiy yétekchi ablet turap, qayta terbiye heriket dolqunigha qarita héchqandaq bir naraziliq pikir bayanida bolmighan؛ herqandaq bir gumandarni aqlash yaki qoghdash tirishchanliqidimu bolmighan؛ peqet bezi délolarni bir terep qilishta estayidil bolghanliqi we tepsiliy éniqlashqa tirishqanliqi, yeni gumandarlarni terbiyelesh merkizi we tutup turush orunlirigha derhalla yollimighanliqi üchün, "Siyasiy idiyeside mesile bar" dep qaralghan we "Ikki yüzlimichilik" bilen eyiblen'gen. Emma siyasiy yétekchi ablet üstidiki délo uning a'ilisi we xizmetdashliridinmu mexpiy halda élip bérilghachqa؛ uning "Ikki yüzlimichilik" bilen eyiblinishige konkrét qaysi ish yaki qaysi déloning seweb bolghanliqi melum emes.

Yene weziyettin xewerdar bir muhajirning bayan qilishiche, nöwettiki yépiq terbiye dolquni, adette insap we belgilik exlaq da'iriside ish béjiridighan bir türküm saqchi xadimlirigha palaketchilik élip kelgen bolsa, yene bir türküm menpe'etperes saqchi xadimliri üchünmu hoquqini östürüsh, bayliq toplash we xitay bashliqliri teripidin etiwarlinishning" Altundek" bir pursitini yaritip bergen. Melum bolushiche, chasa amanliq mudiri tilgha alghan qeshqer sheherlik saqchi idarisi razwédka bölümining mu'awin bashliqi alimjan, ene shundaq pursetke érishkenlerdin biri iken. U, 2014-yili qeshqerde yüz bergen taxtaköwrük hujumining bash gumandari atawulla dawutni eyni chaghda weqedin bir hepte kéyin panahlan'ghan jayida étip öltürgenliki üchün we yépiq terbiyeleshke adem toplashta insaniy méhri shepqetni untughan halda xizmet körsetkenliki üchün qeshqer sheherlik saqchi idarisining razwédka bölümige mu'awin bashliqliqqa östürülgen. Yene bu amanliq mudirining bayan qilishiche chasa kocha bashqurush rayonidiki muqimliq kadiri ekrem bilen büwihejermu, "Xizmetke aktip maslashmasliq" we "Ikki yüzlimichilik ipadisi bolush" gumani bilen yépiq terbiye merkizige ewetilgen.

Yuqirida tilgha élin'ghan qeshqer taxta köwrük hujumi 2015-yili 22-iyun küni yüz bergen. Hujum atawulla dawut bashchiliqidiki bir jemet kishiliri teripidin élip bérilghan. Weqede taxta köwrüktiki qarawulxanigha hujum qilinip, 3 neper saqchini öz ichige halda 22 kishi ölgen. Xitay da'iriliri weqeni eyni chaghda axbarattin yoshurghan bolsimu, emma ikkinchi yili qehrimanlarni xatirilesh murasimida taxta köwrük hujumida ölgen saqchi xadimi abdusattar hajini tonushturush dawamida weqening yüz bergenlikini étirap qilghan.

Toluq bet