Уйғур сақчилар билән хитай сақчиларниң мааш вә қошумчә тәминатидики зор пәрқ ашкариланди

Ақту наһийәлик һөкүмәт чиқарған хитай өлкилиридин юқири тәминат билән 600 нәпәр хитай сақчи қобул қилиш тоғрисидики уқтуруш.

Йеқиндин буян радийомиз зияритини қобул қилған уйғур елидики бир қисим сақчихана хадимлири өзлириниң һәддидин артуқ хизмәт бесимиға дуч келиватқанлиқи, уда 48 саәт улап ишлигәндин кейинму дәм елиш пурситиниң болмиғанлиқи, мааш вә башқа қошумчә тәминатиниң төвәнлики һәққидә қақшиди.

Хотәнниң керийә, чира, қарақаш вә гума наһийәлири, ақсуниң ават вә бай наһийәлири шундақла турпанниң пичан наһийәлири чиқарған һөкүмәт уқтурушлирида йәрликтин қобул қилинидиған ярдәмчи сақчиларниң айлиқ маашиниң әң көп болғанда 3 миң йүән әтрапида болидиғанлиқи билдүрүлгән.

Һалбуки, йеқиндин буян уйғур елидики бир қисим наһийәләр хитай өлкилиридин юқири мааш вә алаһидә тәминат билән сақчи хадими қобул қилиш уқтуруши чиқарған.

Игилинишичә, ақту наһийәлик һөкүмәт 3-айниң 31-күни җиддий уқтуруш чиқирип, хитай өлкилиридин 500 нәпәр әр, 100 нәпәр аял болуп, җәмий 600 нәпәр сақчи қобул қилидиғанлиқини билдүргән.

Уқтурушта көрситилишичә, қобул қилинғанлар әгәр алий мәктәп пүттүргән болса айлиқ мааши 9064 йүән болидикән. Әгәр толуқ оттурини пүттүргәнләр болса 8886 йүән болидикән.

Униңдин башқа уларға “йиллиқ мукапат” дегән намда 6000-8000 йүәнгичә толуқлима берилидикән. “иссиниш пули” дегән намда йилиға йәнә 1400 йүән тарқитилидикән. Той қилмиғанлар һәқсиз ятақ вә тамақ билән тәминлинидикән. Той қилғанлар аилисини елип кәлсә бир йүрүш һәқсиз өй билән тәминлинидикән.

Игилинишичә, ақту наһийәлик җ х идариси мәхсус икки гуруппа тәшкилләп, хитай өлкилиригә сақчи қобул қилиш үчүн әвәткән. Биринчи гуруппа гәнсу, шәнши вә сәнши өлкилиригә, иккинчи гуруппа сичүән, хенән вә хунән өлкилиригә әвәтилгән.

Хитай өлкилиридин қобул қилинидиған хитай сақчилар билән уйғур елиниң ички қисмидин қобул қилинидиған йәрлик уйғур сақчиларниң мааш вә қошумчә тәминатидики ғайәт зор пәрқ күчлүк диққәт қозғимақта.

Ундақта, йәрликтин қобул қилинип, кечә-күндүз ишләватқан уйғур ярдәмчи сақчилар билән хитай өлкилиридин “алаһидә тәминат” билән қобул қилиниватқан хитай сақчиларниң маашидики әмәлий пәрқ зади қанчилик?

Бу соалға радиомиз зияритини қобул қилған уйғур ярдәмчи сақчиларниң өзлири җаваб бәрсун:

Бай наһийәсиниң ташериқ сақчиханисидики бир нәпәр сақчи қиз өткән йилидин буян 1800 йүән айлиққа ишләватқанлиқини билдүрди.

Керийә наһийәсиниң сийәк йезилиқ сақчиханисидики бир нәпәр уйғур ярдәмчи сақчи өзиниң әслидә “айда 4 миң йүән мааш беримиз, 24 саәт ишләп 24 саәт дәм алисиләр” дегән шәрт билән сақчилиққа киргәнликини билдүрди. Һалбуки, у ярдәмчи сақчи болғандин буян мааш картисиға һәр айда аран 2500 йүән әтрапида пул кириватқанлиқини, 48 саәттин дәм алмай ишләватқанлиқини ашкарилиди.

Пичан наһийәсиниң ләмҗин базарлиқ сақчиханисидики бир нәпәр рәсмий сақчи пичандики ярдәмчи сақчиларниң айда 2200 йүән мааш алидиғанлиқини билдүрди.

Қарақаш наһийәсиниң ақсарай сақчиханисидики бир нәпәр ярдәмчи сақчи айда аран 1200 йүән мааш алидиғанлиқи, ундин башқа 100 йүән тамақ пули берилидиғанлиқи, кечә-күндүз нормидин артуқ ишлисә униңға һечқандақ һәқ берилмәйдиғанлиқини ашкарилиди.

Гума наһийәсиниң мокуйла йезилиқ сақчиханисидики бир нәпәр ярдәмчи сақчиму өзлириниң айда аран 1300 йүән мааш алидиғанлиқини дәлиллиди.

Ақсуниң ават наһийә долан сақчиханисидики бир нәпәр ярдәмчи сақчи өзлириниң айда һәммиси қошулуп 1800 йүән мааш алидиғанлиқини билдүрди.

Қарақаш наһийәсиниң һөкүмәткә қарашлиқ мәлум идарисидики бир нәпәр кечилик көзәтчи хадим өзиниң 4 йилдин буян 1500 йүән айлиққа ишләватқанлиқини билдүрди.

Юқириқи баянлар ақту наһийәсигә хитай өлкилиридин қобул қилинидиған сақчи хадимлириға айда берилидиған 9 миң йүән юқири мааш билән уйғур елидики йәрлик ярдәмчи сақчиларға бериливатқан 1300 йүәндин 2500 йүәнгичә болған төвән мааш оттурисидики ғайәт зор пәрқни ашкарилап көрсәтмәктә.