AP
Mushu ayning 18-küni amérikidiki xitaygha yardem jem'iyiti namidiki bir ammiwi teshkilat, Uyghur rayonining künes nahiyeside saqchixanilargha her bir kenttin 200 Adem tutush heqqide wezipe chüshürülgenliki heqqide bir xewer Berdi. Muxbirimiz bu heqte künesning araltöpe yézisigha qarita téléfon ziyariti élip barghinida, mezkur san delillenmigen bolsimu, téléfonimiz ulan'ghan 11 a'ilidin 6 side tutqun barliqi, bularning hemmisi Uyghur a'ililiri ikenliki, a'iliside tutqun bolmighan qalghan 5 a'ilining xitay, tunggan we qazaq a'ilisi ikenliki ashkarilandi.
"China Aid", yeni "Xitaygha yardem" teshkilatining mezkur xewiride Uyghur rayonining ili wilayitide saqchi orunlirigha her bir kenttin 200din adem tutush heqqide uqturush chüshürülgenliki tilgha élindi we bu uchurgha künes nahiyesidiki bir qazaq saqchi xadimining bayanliri pakit körsitildi. Déyilishiche, mezkur uqturushta qazaqistan'gha chiqip kelgenler, namaz oqughanlar we burun türmide yatqanlar bolup 3 katégoriye boyiche, her bir kenttin az dégende 200din kishining tutqun qilinishi telep qilin'ghan. Künes nahiye araltöpe bazarliq saqchi xadimi bu heqtiki so'alimizgha jawab bérelmidi.
Biz araltöpe baziridiki ahalilerge téléfon qilduq. Téléfonimizni qobul qilghan 11 a'ilidin 6 si Uyghur bolup, bularning hemmiside birdin tutqun barliqi, tutqunlarning künes beshtöpidiki "Yépiq terbiye lagéri" da ikenliki ashkarilandi.
"Xitaygha yardem" teshkilatining mezkur xewiride Uyghur rayonidiki da'irilerning her bir kenttin az dégende 200 din adem tutush buyruqini xitay merkizi hökümitining qara küchlerge zerbe bérish dolqunigha egishish üchün chiqirilghanliqi ilgiri sürülgen. Emma éniqlishimiz dawamida téléfonimizni qobul qilghan 11 a'ilidin 2 si xitay köchmenliridin bolsimu, ulardin héchqandaq bir kishi tutulmighanliqi aydinglashti. Téléfonimizni qobul qilghan ikki tunggan a'ilisimu öz a'ililiri we uruq-tughqanliri ichide tutulghan yaki terbiyeleshke ekétilgenlerning yoqluqini bildürdi.
Téléfonimizni qobul qilghan bir qazaq kishi a'ilisidin tutulghanlar yoqluqini bildürdi. Emma yéqinda ghuljidiki bir nahiyeni ziyaret qilip qaytqan qazaqistanliq bir sayahetchi, ghuljidiki qazaq ahaliliriningmu éghir künde ikenlikini pash qilghan idi.
"Xitaygha yardem" teshkilati mezkur xewiride xitayda memliket boyiche qozghalghan qara küchlerge, yeni ijtima'iy jinayetlerge zerbe bérish dolqunining Uyghur rayonigha kelgende, xitaydin bashqa milletlerge we siyasiy öktichilerge zerbe bérishke özgergenliki tilgha élin'ghan. Matériyallarda körsitilishiche, araltöpe bazirining nopusi 34 ming bolup, buning 60% ni Uyghur we qazaq؛ qalghan 40% ni xitay we tunggan qatarliq milletler teshkil qilidu. Emma yuqiriqi uchurlardin nöwettiki herxil zerbe dolqunlirida Uyghurlarning yenila asasliq hujum nishani boluwatqanliqi bilinmekte.
