Baydiki bir xitay puqrasi: 24 sa'et qoralliq qoghdiliwatimiz, mehellidin sirtqa chiqip baqmiduq

Muxbirimiz shöhret hoshur
2017-11-07
Élxet
Pikir
Share
Print
Bay kömürkan hujumchilirini qorshap tutush opiratsiyesidin körünüsh.
Bay kömürkan hujumchilirini qorshap tutush opiratsiyesidin körünüsh.
ts.cn

Buningdin ikki yil awwal, bay nahiyisining térek bazar yézisida xitay kömürkan ishchiliri we bixeterlik küchlirige hujum qilish weqesi yüz bergen؛ weqe sadir qilghuchilarning köpinchisi, térek bazargha qoshna bolghan kanchi yézisining ahaliliridin idi.

Mana bu yézidin bügün muxbirimizning ziyaritini qobul qilghan bir xitay puqrasi ene shu weqedin kéyin yézidiki xitay köchmenlirining bir orun'gha toplan'ghanliqi, 24 sa'et qoralliq qoghdiliwatqanliqi we mehellidin sirtqa chiqalmighanliqi bayan qildi.

Bay nahiyisining nöwettiki weziyiti heqqide ehwal igileshlirimiz dawamida téléfonimiz kütülmigen halda mezkur nahiyening kanchi yézisidiki bir xitay köchmen a'ilisige ulandi. Melum bolushiche, kanchi yézisining 8-kentide yashawatqan we tériqchiliq bilen shughulliniwatqan xitay köchmenliri, Uyghur rayonida aldinqi yillarda arqimu-arqidin chiqqan weqelerdin kéyin, bolupmu 18-séntebir kömürkan hujumidin kéyin, 8-kentning 4-mehellisidiki bir a'ililer binasigha toplan'ghan, xatirjemlikni ashurush üchün, bir qanche a'ile bir öyde turghan.

Beydu qatarliq uchur ambarlirida kanchi 13 kenttin tüzülgenliki, nopusining 15443 ikenliki yézilghan, emma yézidiki xitay nopusi tilgha élinmighan. Nahiyening weziyitidin xewerdar kishiler mezkur yézida déhqanchiliq qiliwatqan xitay nopusining 100 yaki ikki yüzche ikenlikini perez qilishmaqta. Mezkur xitay ayalning bayan qilishiche, mana bu xitay köchmenliri toplan'ghan bina, yézining merkizige, yéziliq saqchixanining biqinigha jaylashqan. Yene bu a'ililer binasigha yéqin bir jayda xitay qoralliq qismining bir ottura etriti baza qurghan. Yene bu köchmenning bayan qilishiche, ular mana mushundaq qoralliq küchlerge yéqin jaygha orunlashturulghandin bashqa, ular turuwatqan binaning bixeterliki 24 sa'et nöwetchilik bilen qoralliq qoghdalghan. Bina jaylashqan mehellide kent we yéza amanliq xadimliri, saqchi we qoralliq etret xadimliri bolup 4 guruppa kishiler teripidin üzlüksiz charlash élip barghan.

Mezkur xitay ayal, xitay da'iriliri özlirige qanitini shunche kengri achqan we bixeterlik tedbirlirini shunche kücheytken bolsimu, ensizchiliktin xaliy bolalmighanliqini ashkarilidi. Uning déyishiche, u üch yildin buyan mehellidin sirtqa chiqip baqmighan. Ishtin sirt waqitliri a'ililikler binasidin sirtqa chiqmighan. Özini ashkarilashni xalimighan yerlik ahalilerning bayan qilishiche, bayda mezkur weqe yüz bergendin kéyin, bay tewelikide yashawatqan köp sanda xitay köchmenliri yurtlirigha qaytqan. Xitay da'iriliri bu weziyetni tizginlesh üchün, teweliktiki xitay ahalilirige qarita yuqiriqidek shekilde etiwarlash tedbirlirini qollan'ghan.

Biz bayda xitay köchmenlirige qaritilghan bu xil bixeterlik tedbirliri heqqide melumat élish üchün baydiki bir qisim saqchixanilargha téléfon qilduq؛ xadimlar bu heqte melumat bérelmidi.

Mezkur xitay ayal, weqedin kéyin tonush-bilishliri ichide yurtigha qaytqanlar bar-yoqluqidin xewersizlikini éytish bilen birlikte, yézigha mezkur weqedin kéyin köchüp kelgenlerning yoqluqini ashkarilidi.

2015-Yili 18-séntebir küni bay nahiyiside yüz bergen kömürkan'gha hujum qilish weqeside xitay we Uyghur tereptin bolup 100 etrapida kishi ölgen we yarilan'ghan. Weqeni bir terep qilish üchün xitay qoralliq saqchi küchliri 56 kün iz qoghlap zerbe bérish herikiti élip barghan hem axirida öngkürge kiriwalghanlargha qarita otchachar qollinip weqeni bésiqturghan.

Toluq bet