Виҗдан мәһбуси нияз қаһарниң түрмә һаяти 6-йилиға қәдәм қойди

Мухбиримиз қутлан
2014.02.04
muxbir-niyaz-qahar.jpg Мухбир нияз қаһар қолға елиништин бурун дөңкөврүк базирида ата-аниси билән чүшкән сүрити. (Вақти ениқ әмәс) үрүмчи.
RFA/Qutlan

Виҗдан мәһбуси нияз қаһарниң түрмә һаяти 6-йилиға қәдәм басқанда униң делоси тунҗи қетим ташқий дуняға ашкариланди. Оғлиниң һәсритидә йүрики парә-парә болған мәрйәмхан йеқинда узун йиллиқ азаблиқ сүкүнатни бузуп көргән-билгәнлири һәққидә еғиз ачти.

“мән оғлумниң икки көзинила көрәлидим!”

Виҗдан мәһбуси нияз қаһарниң аниси мәрйәмхан зияритимиз җәрянида мунуларни билдүрди: “оғлум билән көрүшүш үчүн алди билән шиху түрмисигә илтимас сунуп мәхсус вақит алимиз. Һәр қетимда пәқәт 15 минутла вақит бериду, лекин шундақтиму биваситә йүз көрүшкили болмайду. Қелин әйнәк билән айриветилгән икки өйдә туруп телефон билән сөзлишимиз.”

“арилиқ йирақ, көзнәк кичик болғачқа, пәқәт оғлумниң мөлдүрләп турған икки көзинила көрәлидим. Тинчлиқ-аманлиқ сорашқандин башқа һечқандақ артуқ гәп қилғили қоймайду. Сақчилар һәр вақит көрүшүшни назарәт қилип туриду…”

Мәрйәмхан йәнә мундақ деди: мән оғлумниң бир биликидә яра изиниң барлиқиға диққәт қилдим. Униңдин, немә болди, балам? дәп сорисам, һечнемә болмиди, еһтиятсизлиқтин сүрүлүп кәткән иди, дәп гәпни өткүзүвәтти.

“түрмә даирилири пул вә халтимизни қобул қилмиди”

Һәр қетим оғлум билән көрүшкәндә униңға пул вә халта киргүзүп беришни илтимас қилдуқ. Түрмә даирилири қобул қилишқа унимиди. Қарисақ, түрминиң чоң магазини бар икән. Башқа җинайәтчиләрниң аилисидикиләр шу магазиндин йемәк-ичмәк сетивелип түрмигә киргүзидикән. Бизму шу магазинға кирип йәйдиған нәрсиләрни сетивелип, оғлумға берип қоюшни һавалә қилдуқ. Түрмә магазинидики хадим компютердин оғлумниң исмини ақтуруп көрүпла: оғлуңлар сиясий җинайәтчи икән, сетивалған нәрсә-керәклириңларни йәткүзүп берәлмәймиз, дәп рәт қилди. Бу әһвал 3 қетим йүз бәрди, мән йиғлап туруп йәнә өтүндүм. Ахирида улар азрақ пулимизни алди. Уни оғлумға йәткүзүп бәрдиму-йоқ, билмәймән.

“йепиқ сотқа аилимиздин бир кишиниму қатнаштурмиди”

Оғлум қолға елинип бир йилдин көпрәк вақит өткәндә андин униңға 13 йиллиқ қамақ җазаси берилгәнликини билдуқ. Көп қетим униң әһвалини сүрүштә қилсақ, пәқәтла “сиясий җинайәт билән кесилди” дәп җаваб бәрди. Мән бир адәттики аилә аяли, мәдәнийәт сәвийәм төвән, лекин мән бир ана, мән ойлаймән, оғлум һәрқанчә җинайәт өткүзгән болсиму, униң сотиға аилимиздин бир киши болсиму қатнаштурулуши, униң қандақ җинайәт билән әйибләнгәнликини билишимиз керәкқу!?... Бу ишта пүтүн аилә бойичә алдимиз қараңғу, немишқа десиңиз, һөкүмәт адил болғандикин, оғлимизниң һәрқандақ җинайити болған тәқдирдиму қанун бойичә очуқ-ашкара сотлиса болмасму!?

“оғлумниң дадиси бала һәсритидә өлүп кәтти”

Оғлимиз нияз 2009-йили туюқсиз ғайиб болғандин кейин аилимизниң арами бузулди. Йолдишимниң меңисигә қан чүшүп паләч болуп қалди. 2010-Йили оғлумға йепиқ сот ечилғанлиқини вә шиху түрмисигә қамалғанлиқини уққандин кейин йолдишимни чақлиқ һарвиға селип түрмигә бардуқ. Йолдишим җиддийлишип кәткәчкиму оғлини әйнәклик өйдин көрүши биләнла варқириған пети арқиға учуп кәтти. Шундин кейин кесили барғансери еғирлишип өткән йили түгәп кәтти. Нияз балам һазирғичә техи дадисиниң түгәп кәткәнликини билмәйду. Бизму азаб үстигә азабланмисун дәп униңға ейтмидуқ. Һазир мениң саламәтликимму яхши әмәс, үрүмчигә чиқип давалинип кәлгили техи 20 күн болди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.