Kent mudiri: "1980‏- We 1990‏-yillarda tughulghanlar 'xeterlik nesil' dégen katégoriyede tutuluwatidu"

Muxbirimiz shöhret hoshur
2018-03-19
Élxet
Pikir
Share
Print
Bir Uyghur ösmürning kochidiki xitay qoralliq armiyesining aldidin ötüp kétiwatqan körünüshi. 2009-Yili 16-iyul, ürümchi.
Bir Uyghur ösmürning kochidiki xitay qoralliq armiyesining aldidin ötüp kétiwatqan körünüshi. 2009-Yili 16-iyul, ürümchi.
AP Photo/Elizabeth Dalziel

Uyghur aptonom rayonida dawam qiliwatqan "Yépiq terbiye" dolqunida 1980‏-we 1990‏-yilliri tughulghan yashlarning xitay da'iriliri teripidin "Xeterlik nesil" dégen nam bilen qara tizimlikke kirgüzülgenliki we ularning nöwette omumyüzlük halda "Terbiyelesh" nishani qiliniwatqanliqi ashkarilandi.

Xitay da'iriliri bezi teshwiqat matériyallirida Uyghur aptonom rayonidiki "Yépiq terbiye" herikitige isharetlik halda izahat bérip, "Terbiyelesh merkezliri" arqiliq "Diniy ashqunluq" yaki "Milliy bölgünchilik" idiyesidin "Yuqumlan'ghanlar" gha qarita idiye jehettin tazilash élip bériwatqanliqini ilgiri sürgen idi. Da'iriler bezi höjjet we uqturushlirida sabiq mehbuslar, sabiq gumandarlar, diniy keypiyati qoyuq bolghanlar, chet'ellerni ziyaret qilghanlar qatarliq ish-heriketliride xitayning dölet bixeterlikige xeter yetküzgen we yaki yetküzüsh éhtimali bayqalghan kishilerning "Terbiyelesh nishani" qilip békitilgenliki bayan qilin'ghan idi. Emma yéqinqi éniqlashlirimiz dawamida, yalghuz ish-herikitiningla emes, belki tughulghan dewriningmu "Jinayet" ke yaki "Jinayet gumani" gha pakit qilin'ghanliqi we mushu sewebtin Uyghurlar ichidiki 1980‏- we 1990‏-yillarda tughulghan yashlarning "Yépiq terbiye" ge apirilish üchün qara tizimlikke kirgüzülgenliki ashkarilandi.

Ghulja shehiri bayanday yéza 2‏-kentning amanliq mudiri öz kentidiki bir türküm yashlarning "Balingxu, jyulingxu", yeni "1980‏- We 1990‏-yillarda tughulghan nopus" dégen katégoriyede tutulghanliqini bayan qildi.

Bayanday 3‏-kentning ayallar mudirimu 1980‏- we 1990‏-yilliri tughulghan yashlarning héchqandaq bir gumanliq ish-herikiti bolmisimu, emma ularning "Xeterlik nesil" dep qarilip tutuluwatqanliqini delillidi.

Melum bolushiche, bultur Uyghur diyarida "Yépiq terbiye" yéngidin bashlan'ghanda chet'ellerni ziyaret qilghanlar we ularning a'ile-tawabi'atliri, ilgiriki yillarda bir mezgil diniy keypiyati qoyuq bolghanlar, yeni 10‏-15 yilning aldida oran'ghan yaki saqal qoyghanlar, dölet xizmetchiliri ichide döletning qanun-siyasetlirini ijra qilishta aktip bolmighanlar asasliq tutqun nishani qilin'ghan bolsa, ötken yilning axirida "Nuqtiliq a'ililer", yeni "Chékiti bar shexsler" bilen munasiwet qilghanlar asasliq teqib nishani qilin'ghan. Bayanday yéziliq ayallar mudirining bayan qilishiche, bu yil 3‏-ayda qayta ewjige chiqqan "Terbiyelesh" ke adem tutush dolqunida 1980‏- we 1990‏-yilliri tughulghan yashlar asasliq tutqun nishani qilin'ghan.

Yene ashkarilinishiche, da'iriler nöwette ilgiriki yillarda pilanliq tughutqa ri'aye qilmighanlar, nopusini uyaq-buyaqqa yötkigenler dégendek yéngi-yéngi katégoriyeler boyiche qara tizimlik turghuzmaqtiken. Bezi uchurlardin 2000‏-yilliri tughulghan balilarningmu "Xeterlik nesil" dep qariliwatqanliqi ashkarilanmaqta.

Bayanday yéza 3‏-kent 5‏-mehelle ezasi, zéhni ajiz ayal henipe kérim, 1985‏-yili tughulghanliqi üchünla tutqun qilin'ghan. Saqchilar henipeni tutqanda uning a'ilisige ochuq halda "Xatirjemsiz balilar" yeni "Xeterlik nesil" dégen katégoriye boyiche tutqanliqini bildürgen we shundaq yézip qoyushni tapilighan. Henipening apisi, qizining tutulushigha seweb bolghan 1980‏-yillarda tughulushidek bu yéngi "Jinayet" türini eqlidin ötküzelmisimu, charisizlik ichide zéhni ajiz qizining tutup kétilishige süküt qilghan.

Toluq bet