Йеңисар топлуқтики кәң көләмлик тутқунда 100 гә йеқин кәнт кадири җазаланған

Мухбиримиз шөһрәт һошур
2017-09-14
Share
turme-uyghur-siyasiy-mehbus.jpg Түрмигә елип кириливатқан уйғур сиясий мәһбуслар.
Social Media

Йеңисардики бу йиллиқ қаттиқ зәрбидә кәнт кадирлири вә партийә әзалириму нишандин чәттә қалалмиған.

Мәлум болушичә кәң көләмлик тутқун вә еғир кесим давам қиливатқан йеңисар наһийәсидә кәнт вә мәһәллә кадирлириму қаттиқ зәрбә нишаниниң сиртида қалалмиған. Бир сақчи хадиминиң ашкарилишичә, топлуқ йезисидин тутулған 2000 дин артуқ кишиниң 100 гә йеқини кәнт вә мәһәллә кадири; буларниң ичидин өтәң кәнтидин тутулған 10 нәпәр кадир йеқинда 10 йиллиқтин кесилгән.

Мәлум болушичә, уйғур районида 2014-йилидин башлап шиддәтләнгән вә кеңәйгән қаттиқ зәрбә долқуни дәсләпки икки йилда нуқтилиқ вә гуманлиқ кишиләрни нишанлиған болса, бу йилға кәлгәндә нишан даириси йәнә бир дәриҗә кеңәйгән. "икки йүзлимичилик" кә қарши туруш намидики бу кеңийиш, йеңисарниң топлуқ йеза өтәң кәнтидә йүзгә йеқин кәнт вә мәһәллә кадирини түрмигә ташлиған.

Хитай 2014-йили тарқатқан "диний әсәбийликниң 75 хил аламити" намлиқ қолланмида, кәнт кадирлириға вә партийә әзалириға салам бәрмәслик, уларни чәткә қеқишму диний әсәбийликниң аламити дәп саниған. Йәни бу қолланмида кәнт кадирлири билән партийә әзалири хитайға садиқ кишиләр қатариға тизилған вә аталмиш "үч хил күч" ләрниң һуҗумидин қоғдалған иди. Әмма бу йилға кәлгәндә, кәнт кадирлири билән партийә әзалириниң адәттики диққәтсизликлириму җинайи җавабкарлиққа тартилған. Өтәң кәнтидә 10 нәччә кадир пәқәт телефондин мәсилә чиққанлиқи үчүнла тутулған вә кесиветилгән.

Мәлум болушичә, телефони тохтап қелиш нөвәттә уйғур районида нурғун кишиләрни әндишигә селиватқан, уларға бир пишкәлчилик вә палакәтчиликтин ишарәт бериватқан бир һадисә. Хитай һакимийитигә қәсәм ичип садақәт билдүргән компартийә әзалириму бу әндишидин халий әмәс. Ашкарилинишичә, пәйзиватниң шаптул йезисидики компартийә әзаси ясин турсун, телефони тохтитилғандин кейин тутулған вә 7 йиллиқ кесилгән.

Йопурғулуқ бир аманлиқ мудириниң баян қилишичә, телефонға тамдин атлаш деталлириниң қачилиниши яки чәкләнгән мәзмундики үн-син материяллириниң телефонда көрүлүши телефонниң шу заман тохтитилишиға сәвәб болиду. Телефон тохтиғандин кейин телефон игиси сақчиханиға чақиртилиду; бәзи аһалиләрниң дейишичә, җазалиниш-җазаланмаслиқ, аталмиш хаталиқниң қәстән яки диққәтсизликтин болуши билән мунасивәтсиз; у пәқәт сақчи хадими яки сотчиниң кәйпи вә пәйлигә мунасивәтлик.

Йеңисар топлуқниң өтәң кәнтидики телефони тохтиғандин кейин, террорлуқ вә зораванлиқ һәрикәтлиригә қизиқиш вә һәвәс қилиш гумани билән тутулған вә дөләт бихәтәрликигә тәһдит шәкилләндүрүш билән җазаланған 10 нәпәр кадир ичидә кәнт секретари, аманлиқ мудири, боғалтири вә мәһәллә башлиқлиридин башқа йәнә аяллар мудириму бар. Аяллар мудири айниса сопи телефонини аталмиш "қанунсиз қолланғанлиқи" үчүн нөвәттә түрмидә җаза муддитини өтимәктә.

Хитай даирилири уйғур аптоном районида өзлири елип бериватқан қаттиқ зәрбә һәрикитиниң нишаниниң пәқәтла террорчилар икәнликини, муһаҗирәттики уйғур паалийәтчилири болса, нишанниң бир пүтүн уйғур миллити икәнликини илгири сүрүшмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт