Дөңашти кәнтидә ваң дәвридә 1, җаң дәвридә 15, чен дәвридә 65 киши түрмигә ташланған

Мухбиримиз шөһрәт һошур
2017-10-11
Елхәт
Пикир
Share
Принт
Уйғур елиға тәйинлигән йеңи партком секретари чен чүәнго йиғинда сөздә.
Уйғур елиға тәйинлигән йеңи партком секретари чен чүәнго йиғинда сөздә.
weibo

Уйғур аптоном районидики йепиқ тәрбийиләш мәркәзлири һәққидә елип барған ениқлашлиримиз давамида ашкариланған тутқунлар вә берилгән җазалар һәққидики сан-шифирлар районниң сиясий вәзийитидики җиддийчиликниң ешиш сүритиниму әкс әттүрмәктә.

Мәлум болушичә, қарақаш наһийәси пурчақчи йезисиниң дөңашти кәнтидә ваң лечүән мәзгилидә 1 киши, җаң җүншән һөкүмранлиқ қилған 7 йилда 15 киши, чен чүәнго һакимийәт бешиға чиққан бир йилдин буян 65 киши түрмигә ташланған.

Йәнә пурчақчида ваң лечүән дәвридә ашкара һалда шәрқи түркистан шоари билән һәрикәт қилип тутулған бир гумандар 9 йиллиқ, чен чүәнго дәвридә тәблиғ аңлап қалған бир гумандар 8 йиллиқ кесилгән.

Мәлум болушичә, 2005-йили, йәни уйғур аптоном районида ваң лечүән һөкүм сүрүватқан дәврдә қарақашниң пурчақчи йезисида хитай һакимийитини ағдуруп ташлаш шоари билән ашкара тәшвиқат елип барған икки нәпәр гумандарға әйни чағда 9 йиллиқтин қамақ җазаси берилгән. Әмма уларни хитай сақчилириға актиплиқ билән тутуп бәргән аталмиш «вәтәнпәрвәр диний зат» қурбан баратниң чоң нәвриси тәблиғ аңлап қалғанлиқи үчүн бу йил 8 йиллиқ кесилгән.

Уйғур аптоном районидики сиясий вәзийәтниң юқириқи үч шәхс һакимийәт бешида турған мәзгилдә дәврдин-дәвргә яманлишип меңиватқанлиқи мәһкумларға берилгән җазаниң еғирлиқидила әмәс, җазаланғанларниң санидиму әкс әтмәктә. Мәлум болушичә, пурчақчиниң дөңашти кәнтидә 2009-йили бир киши кесилгән болса, җаң чүншйән дәвридә 15 киши, чен чүәнго дәвридә 65 киши түрмигә ташланған.

Муһаҗирәттики бәзи уйғур көзәткүчиләр, уйғур аптоном райони сиясий вәзийитиниң юқириқи 3 шәхс дәвридила әмәс, район ишғалийәт астиға чүшкәндин буянла дәврдин-дәвргә яманлашқанлиқини, һәрқайси һөкүмдарларниң бастуруш тәдбирлири пәрқлиқ болсиму, маһийити охшаш икәнликини, йәни уйғурларниң миллий мәвҗутлуқини йоқ қилиш икәнликини илгири сүрүшмәктә.

Көзәткүчиләр йәнә дәврдин-дәвргә уйғурларда миллий вә сиясий аңниң йүксилип меңиватқанлиқи, буниң нәтиҗисидә уйғур мәсилисиниң бүгүн бәлгилик дәриҗидә хәлқаралишиватқанлиқи вә хитайниң мана бу тәрәққияттин әндишә қилип, бастуруш қәдимини тезлитиватқанлиқи вә салмиқини ашуруватқанлиқини илгири сүрүшмәктә.

Пикирләр (0)
Share
Толуқ бәт