Uyghur élidiki uniwérsitétlarda “Diniy ashqunluq” qa qarshi siyasiy teshwiqatlar kücheygen
2014.03.24

Melum bolushiche, kunming weqesidin kéyin Uyghur élidiki uniwérsitétlarda “Diniy ashqunluq we uning mahiyiti” namliq zor tiptiki siyasiy teshwiqat pa'aliyetliri qanat yaydurulghan.
Shinjang uniwérsitéti toridin melum bolushiche, kunming weqesidin kéyin shinjang uniwérsitétida jem'iy 6 meydan siyasiy léksiye anglash yighini uyushturulghan.
“Diniy ashqunluqning mahiyiti we ziyini” dégen omumiy téma astida élip bérilghan bu zor kölemlik siyasiy léksiyelerge shinjang uniwérsitétidiki 722 sinip oqughuchi qatnashturulghan. Her qétimliq léksiye üchün 4000 neperdin artuq oqughuchi 2 sa'ettin kespiy derslirini toxtitishqa mejbur bolghan.
Ejeplinerliki shuki, kespiy derslerni xitay tilida anglashqa mejbur qilin'ghan Uyghur oqughuchilar mezkur siyasiy léksiyeni öz tilida anglighan. Léksiye mexsus Uyghur we xitay tilida ayrim meydanlargha bölünüp sözlen'gen. Léksiye sözlesh guruppisigha siyasiy jehettiki aktiplar, uzun yil siyasiy yétekchilik xizmiti bilen shoghulan'ghanlar we östürüsh obéykti qilin'ghan oqutquchilar qatnashturulghan.
Hazir yawropada yashawatqan Uyghur ziyaliyliridin gülbahar xanim bu heqte mexsus ziyaritimizni qobul qildi.
Gülbahar xanim ilgiri Uyghur aptonom rayonidiki melum uniwérsitétta uzun yil xizmet qilghan bolup, Uyghur aliy mektep oqughuchiliri arisida siyasiy teshwiqatlarning qandaq élip bérilidighanliqi heqqide özining körgen - bilgenlirini bayan qildi.
Tepsilatini awaz ulinishtin anglighaysiz.