Kommunizm idé'ologiyisi teshwiqatining qurbanliri (1)

Muxbirimiz eziz
2015-12-10
Share
memtimin-abduqadir-305.jpg "Xalis teshwiqatchi" dégen nam bilen meshhur bolghan memtimin abduqadir. 2015-Yili, guma.
uyntv.cntv.cn/

"Exlaq nemunichisi namzati - memtimin abduqadir"

2007 - Yilidin bashlap xitay paytexti béyjingda her yilining axirida ötküzülüp kéliwatqan "Memliketlik exlaq nemunichiliri" ni teqdirlesh we mukapatlash yighinining 2015 - yilliq kandidat namzatliri üchün Uyghur aptonom rayonining herqaysi jayliridin toplan'ghan isimlik ichide xoten wilayitige qarashliq guma nahiyisining sanju yézisi basqaq kentining boghaltiri memtimin abduqadir alahide közge chéliqidu. Memtimin abduqadir heqqide Uyghur aptonom rayonidiki her derijilik metbu'at orunlirida köplep melumatlar bérilgen.

Alaqidar uchurlardin melum bolushiche, guma nahiyisining basqaq kentining boghaltiri bolup ishlewatqan memtimin shu yézidiki "Ége-chaqisiz bowaylar we momaylarning uzun yilliq ghemguzari" iken.

Emma bu heqtiki teshwiqat matériyallirida yézilishiche, boghaltir memtiminning 2015 - yilliq "Memliketlik exlaq nemunichisi" ning namzatliqigha körsitilishide uning Uyghurlardiki yashan'ghanlarning halidin xalis xewer élishtek bu xil güzel exlaq - peziletning dawamlashturghuchisi bolghanliqi asasiy seweb bolmighan. Belki, uning "Zorawan küchler" ge qarshi "Bayriqi roshen halda otturigha chiqqan" liqi, shundaqla "Diniy esebiy idiyining ziyinini ammigha tonutush" jehettiki uzun mezgillik "Xalis teshwiqatchi" süpitide ishligen idé'ologiye jehettiki xizmetliri asasliq seweb bolghan.

"Tengritagh" Uyghurche torining melumatlirigha asaslan'ghanda, memtiminning dadisi abduqadir metqurban ottuz nechche yilliq partiye ezasi bolup, eyni waqitlarda sanju yézisi basqaq kentining chong etret bashliqi bolup ishligen iken. U herqachan kent ahalisige "Kompartiye bolmighan bolsa xelqning héchnersisi bolmaydighanliqi" ni, "Kompartiyining sanju yézisidikilerge yol yasap bergenliki" ni, shundaqla "Xelqqe chüje tarqitip bergenliki" ni, téximu muhimi "Ashliq térish, qoy - kala béqishni ögitip qoyghanliqi" ni teshwiq qilip kelgen yéza kadiri iken. Memtiminning dadisining bu heqtiki teshwiqatliri we uning xaraktéri heqqide amérikida yashawatqan weziyet analizchisi ilshat hesen öz qarashlirini bayan qilip ötti we xitayning teshwiqatta yalghan éytip kelgenliki, emma köp sandiki kishilerni aldiyalmaydighanliqini bildürdi.

Yerlik da'irilerning teshwiqat matériyalliridiki memtimin'ge da'ir ehwallarni téximu ilgiriligen halda éniqlap béqish üchün biz memtimin abduqadir bilen alaqilishishke muweppeq bolduq. Biraq biz, uning sorighan so'aligha qarita chet'eldiki radi'o istansisidin téléfon qiliwatqanliqimizni éytqandin kéyin memtimin biz bilen sözlishishni ret qildi.

"Tengritagh" Uyghurche toridiki melumatlargha asaslan'ghanda, 2014 - yili 13 - mayda memtimin abduqadir guma nahiyilik xelq hökümitining uqturushini tapshuruwalghan. Uningda "Térrorchi küchler" ning sanju yézisigha tutishidighan tagh arisigha qéchip ketkenliki éytilghan bolup, saqchi küchliri yétishmigenliktin uning öz kentidiki déhqan, charwichilarni bashlap, tagh jilghisini tekshürüshi zörür bolup qalghan. Shuning bilen ular guruppilargha bölünüp iz qoghlap tekshürüshni bashlighan. Memtimin bashlap mangghan guruppidikiler taghqa ichkirilep kirgendin kéyin, axiri qéchip kétiwatqan üch kishige yétishken.

Ular özlirining ashkarilinip qalghanliqini bilgendin kéyin memtimin we uning hemrahlirigha " Hemmimiz Uyghurkenmiz. Boldi, bizni mangghili qoyunglar. Uning üstige hemmimiz musulman bolghandikin bizge xa'inliq qilmanglar" dégen. Emma memtimin we uning hemrahliri ularni kalteklep yiqitip, ularning yénidin birnechche bombini tapqan. Memtimin bu heqte "Shinjang téléwiziyisi" ning ziyaritini qobul qilip, shu waqittiki ehwallarni qisqiche eslep ötidu.

Memtimin abduqadirning bu heqtiki "Qehrimanliq rohi" heqqide sorighan so'alimizgha qarita ilshat hesen özining buningdin dergumanda ikenlikini bildürdi.

Uyghurlar diyaridiki ijtima'iy mesililerni analiz qilish bilen jama'etchilikke tonulghan ziyaliylardin abduweli ayup bu heqte toxtilip, zulum tüpeylidin hakimiyetke qarshi chiqquchi Uyghurlargha méngisi yuyulup ketken bir qisim Uyghurlarning heqiqeten öchmenlik közide qaraydighanliqini tilgha aldi.

Guma nahiyisining Uyghurlar diyaridiki eng namrat nahiye ikenlikini eslitip ötken ilshat hesen ependi xitay hakimiyitining néme üchün teshwiqat xizmitige mushu derijide zor küch serp qiliwatqanliqi heqqide toxtaldi. Uning qarishiche, bu xildiki teshwiqat pa'aliyetliri öz halakitidin endishige chüshken hakimiyetler da'im qilidighan ishlarning biri iken.

Bu heqte abduweli ayupmu pikir bayan qilip, ilshat hesenningkige oxshap kétidighan nuqtilarni tekitlidi.

Alaqidar menbelerdin melum bolushiche, 2015 - yili 13 - öktebirde échilghan "Memliketlik exlaq nemunichilirini teqdirlesh yighini" da memtimin abduqadir shallinip ketken we mukapatqa érishelmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet