Xitay kompartiyesining milletler siyasiti heqqidiki yéngi höjjiti qandaq arqa körünüshte otturigha chiqti?

Muxbirimiz qutlan
2014.12.24
milletler-xizmitini-kucheytish.jpg Xitay kompartiyesi merkiziy komitéti bilen xitay dölet ishliri kabinéti birlikte chiqarghan “Yéngi shara'itta milletler xizmitini kücheytish we özgertish heqqide pikir” namliq höjjet. 2014-Yili 23-dékabir.
people.cn diki munasiwetlik maqalidin élin’ghan

Yéqinda xitay kompartiyesi merkiziy komitéti bilen xitay dölet ishliri kabinéti birlikte “Yéngi shara'itta milletler xizmitini kücheytish we özgertish heqqide pikir” namliq höjjet chiqarghan.

Höjjette xitaydiki milletler mesilisi we xizmiti boyiche 6 nuqtida 25 türlük pikir otturigha qoyulghan.

Uningda “Junggoning köp millettin teshkil tapqan dölet ehwalini chongqur tonush, milliy rayonlarning iqtisadiy tereqqiyatini zor küch bilen kücheytish, milliy térritoriyelik aptonomiye qanunini emeliyleshtürüsh, milliy kadirlargha ishinish we ularning rolini jari qildurush, dölette ortaq qollinilidighan xenzu tilini omumlashturush bilen bir waqitta, yene az sanliq milletlerning öz til-yéziqini qollinish hoquqigha kapaletlik qilish” dégendek bir qatar belgilimiler tekitlen'gen.

Mezkur höjjet heqqidiki xewerler xitay hökümet taratqulirida élan qilin'ghandin kéyin, xitay ichi we sirtidiki siyasiy analizchilar shundaqla xelq'aradiki közetküchiler bu heqte arqa-arqidin inkas bildürdi.

Bezi analizchilar mezkur höjjet xitayning yéqin arida milletler siyasitini, bolupmu tibet we Uyghur éligha qaratqan qattiq qol siyasitini yumshitidighanliqining signali dégen qarashlarnimu ilgiri sürmekte.

Undaqta, bu rastinila xitayning milletler siyasitide jiddiy özgirish yasaydighanliqining béshariti?

Amérika Uyghur birleshmisining mu'awin re'isi ilshat hesen ependi bu heqte ziyaritimizni qobul qilip öz qarashlirini otturigha qoydi.

U sözide “Xitay kompartiyesining milletler siyasiti meghlup boldi. Bolupmu xitay da'irilirining tibet we Uyghur éligha qaratqan qattiq qol siyasiti tamamen meghlup boldi. Xitay mana mushundaq qiyin ehwalda milletler mesilisidin ibaret bu bash aghriqidin waqitliq qutulush üchün mezkur höjjetni otturigha chiqarghan. Halbuki, bu höjjette otturigha qoyulghan mezmunlar ilgiri körülüp baqmighan yaki pütünley yéngi pikirler emes. Uningda yenila xitayning dölet birliki we tüp menpe'itini közligen asasta, xitayning milletler siyasitige bezibir chirayliq ibarilerni we yaltiraqlarni sürkigen, xalas,” dégenlerni ilgiri sürdi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.