Ghulja baykölde 8 mo bughdayliqni déhqanning raziliqisiz mejburiy aghduruwétish weqesi yüz bergen

Muxbirimiz shöhret hoshur
2013.05.29

Ghulja shehirining qaradöng yéza bayköl kentide olturushluq déhqan tursun turghunning 8 mo bughdayliqi mushu ayning 17-küni yérim kéchide namelum kishiler teripidin aghduruwétilgen.

Buning bilen 10 janliq bu a'ilining bu bir yilliq emgiki bikar bolghan, bir yilliq ozuq-tölüki hawagha uchqan؛ téximu muhimi aridin 12 kün ötkinige qarimay, bu a'ilige bu ziyankeshlikning kimler teripidin sélin'ghanliqi téxiche éniqlanmighan. Kent ahaliliri tejribilerge asasen, bu ishni bayköldiki térilghu yerlerni sétiwalmaqchi bolghan xitay shirketlirining qilghanliqini yaki yerni shirketke satmaqchi bolghan yerlik da'irilerning qilghanliqini perez qilishmaqta. Emma yuqiriqi her ikki terep weqediki mes'uliyitini ret qilghan.

  1. So'al: bu ghulja sheher bayköldiki bir a'ilining téléfonimu?
    Jawab: he, shundaq.
    So'al: anglisaq, silining mushu kentte bir a'ilining bughday térighan yerlirini kéchide mejburiy aghduruwetken ish barken, toghrimu?
    Jawab: menmu shundaqraq geplerni anglidim, öylerni örüwétiptu, bughdayliqlarni aghduruwétiptu dep. Bizning bu yerde öyi keyfagha (qurulushqa) toghra kélip qalghan kishiler bar, shulardin birni chaqirip qoyay.
    So'al: yaxshimusiz, sizning shu ishtin xewiringiz barmu?
    Jawab: bizning köz aldimizda boluwatqan ishlar, qurulushqa toghra kep qaldi, yolgha chüshüp qaldi dep, déhqanning raziliqinimu almay chéqiplawatidu, buzuplawatidu؛ 4-5 künning aldida méning bir qoshnamning köpköp bughdayliqini aghduruwetti. U ürümchige erz qilip ketken, bügün qaytip keptu, néme dep keldi uqmiduq téxi.
    So'al: texmininglarche, bu ishni kim qilishi mumkin?
    Jawab: kentimizning qanuniy wekili, kent bashliqi qeyserning ruxsiti bolmay turup héchkim undaq qilalmaydu, qurulushchilarmu undaq qilishqa jür'et qilalmaydu. Qeyser özi jiq ademning öylirinimu chaqquzuwetti.
  2. So'al: siz turghun tursun bolamsiz, baykol kentidiki?
    Jawab: shundaq, men shu.
    So'al: anglisaq, sizning 8 mo bughdayliqingiz silerning raziliqinglarsiz aghduriliwétiptu, toghrimu?
    Jawab: toghra, 5-ayning 17-küni kéchide shundaq boldi. Men özüm ürümchide yashaymen, 18-may küni etigende dadam téléfon qiptu yighlap, shuning bilen derhal yolgha chiqtim.
    So'al: bughdayni oruwetken gepmu, yerni aghduruwetkenmu?
    Jawab: aghduruplawétiptu.
    So'al: kimler, néme üchün aghduruwétiptu?
    Jawab: yérimiz döletning qurulushigha toghra kepqaptiken, bultur kenttikiler kélip yéringlar qurulushqa toghra keldi, yer döletning qandaq qaraysiler, dédi. Biz bolidu bérimiz, kéyinlikimizni orunlashtursun, muwapiq tölem bersun, déduq, emma bermekchi bolghan puligha razi bolmiduq, ret qilduq, kélishelmey turuwatqan.
    So'al: kentke bérip sürüshte qilip baqtinglarmu?
    Jawab: qilduq, kenttkiler qurulushchilargha, qurulushtikiler kenttikilerge ittirishiwatidu, mes'uliyetni üstige alidighan adem yoq.
  3. So'al: siz kent bashliqi qeysermu?
    Jawab: shundaq, men shu?
    So'al: anglisaq, silining kenttiki bir a'ilining 8 mo bughdiyi ularning raziliqisiz aghduruliwétiptu؛ mushu ish qandaq ish, bash-axirini dep bersingiz?
    Jawab: so'alliringizni yazma halette yollap béring, bolmisa jawab bérelmeymen.
    So'al: soriliwatqini sezgür bir mesile emes, aghdurulup ketken bir yerning ishi, buni mundaq murekkepleshtürüshning néme zörüriyiti.
    Jawab: her ishning bir tertipi bolidu؛ bu ishni bir terep qilidighan, sheher, aptonom, rayon merkez bar, ular shulargha bérip erz qilsa, silermu shulardin sorisanglar boldighu?
    So'al: bu ish siz bashquruwatqan kenttiki bir déhqanning janijan menpe'etige chétishliq mesile, shunga sizdin sorawatimiz.
    Jawab: etigen biri gu'angjudin téléfon qilip, men merkizi milletler uniwérsitétidin dédi, emdi siz téléfon qildingiz, bügün bu ish heqqide 4-5 kishi téléfon qildi, hemmisige jawab bérip olturushum kérekmu?
    So'al: déhqanlarning yérini aghduruwétidighan chaghda, ziyan salidighan chaghda qanun-tertipni sürüshte qilmaydikensiz, melumat béridighan chaghdila mushundaq tertip sürüshte qilamsiz?
    Jawab: men yighindin chiqtim, tamaq yégili kétip barimen, charchidim, xapa bolmay, fonkisiyelik orunlardin sorang.
  4. So'al: bayköl kentidiki ahalilerdin biri bolush süpitingiz bilen, etrapingizdiki bu ishlargha qandaq qaraysiz?
    Jawab: men déhqan emes, emma bularning ehwalini chüshinimen, bularmu yerni bermeymiz dewatidu, bizni razi qil, béreyli dewatidu. Hazir bizning bu bayköldiki yerlerni igiliwélip barghanlar döletning qurulushlirimu emes, ichkiridin chiqqan öy sodigerliri. Shunga déhqanlarning dewatqini dölitimizning qanunida “ Bir shexsning yérini yene bir shexske mejburiy tartip élip berse bolamdu dewatidu؛ bu heqte naraziliq bek jiq, heqsizliq bek jiq. Déhqanlar hökümettin omumyüzlük narazi.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.