Uyghur yesliliride “Jyangnen sitayl” ussulining teshwiq qilinishi Uyghurlarni teshwishke salmaqta

Muxbirimiz qutlan
2013.11.11
jyangnen-style-xitaylashturush.jpg Xoten qaraqash nahiyisi qarasay yéziliq merkiziy yeslide “Jyangnen sitayl” ussuli oynashqa uyushturulghan Uyghur baliliri.
Tengritagh tori

“Shinjang géziti” we “Tengritagh tori”da bérilgen xewerlerdin melum bolushiche, yéqinda Uyghur élining xoten wilayitidiki yeslilerde “Jyangnen sitayl” namidiki naxsha-muzika we uninggha tengkesh qilin'ghan zamaniwi ussul teshwiq qilinishqa bashlighan.

Yéqindin buyan Uyghur aptonom rayonining yéza, bazarlirida “Tor medeniyiti bayrimi” ötküzüsh keng türde teshwiq qilin'ghan. 7-Noyabir küni qaraqash nahiyisining qarasay yéziliq hökümiti bu teshwiqatqa awaz qoshup, yéza teweside bir yürüsh sen'et pa'aliyiti ötküzgen. Mezkur pa'aliyetning muqeddimisi süpitide qarasay yéziliq merkiziy yeslining Uyghur baliliri “Jyangnen sitayl” namidiki naxsha-muzikigha kolléktip halda zamaniwi ussul oynashqa uyushturulghan. Mezkur naxshining esli muzikisigha xitayche tékist qoshulup éytilghan bolup, ilgiri Uyghur sen'etkarlar teripidin Uyghurchilashturulghan “Uyghur sitayl” yaki “Turpan sitayl” naxshilirining ornigha dessitish meqset qilin'ghan. Shuningdin kéyin “Jyangnen sitayl” ussuli Uyghur aptonom rayonidiki hökümet taratqulirida keng teshwiq qilinip, yesli balilirigha omumlashturush telep qilin'ghan.

Uyghur yesliliride “Gangnam sitayl” gha oxshash xelq'aralashqan naxsha-muzikilarning esli nusxisi yaki uning Uyghurchilashturulghan wariyantliri emes, belki xitayche tékist qoshulup xitay uslubi gewdilendürülgen naxsha-muzikilarning teshwiq qilinishi muhajirettiki Uyghur ziyaliylirini teshwishke salmaqta. London Uyghur ansambilining mes'uli eziz eysa ependi ene shu xil endishini ilgiri sürgüchilerning biridur.

Melumki, jenubiy koréyelik naxshichi pisi 2012-yili dékabirda “Gangnam sitayl” namliq zamaniwi uslubtiki naxsha-muzikini muweppeqiyetlik orundighandin kéyin, bu naxshining yutubédiki körülüsh qétim sani bir milyardtin ashqan. 2013-Yili öktebirge kelgende yutubédiki körülüsh qétim sani bir milyard 800 milyondin éship, dunyadiki eng köp körülgen widi'o bolup qalghan. Mezkur naxsha koréye medeniyitining yer sharigha tézlikte yéyilishigha bombisiman tesir körsetken. Hetta amérika prézidénti barak obama, en'gliye bash weziri dawid kaméron we b d t bash katipi bankimun qatarliqlar bu naxshini “Dunya tinchliqini ilgiri sürüshtiki ajayip küch” dep teripligen.

“Gangnam sitayl” yer shari miqyasida dunyawi moda naxshigha ayliniwatqan peytlerde Uyghurlar “Uyghur sitayl” yaki “Turpan sitayl” namliq yerlik wariyantlarni sehnige chiqirip, özlirining hem dunyawi, hem milliy rohini ipade qilghan idi. Muhajirettiki Uyghur ziyaliyliri nöwette xitay da'irilirining Uyghur yesli balilirigha mezkur naxshining xitaylashturulghan wariyanti - “Jyangnen sitayl” ni éytishqa uyushturushi emeliyette medeniyet assimilyatsiyesining bir xil ipadisi dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.