Чира наһийәсидә сақчи вә қаравулханиларниң көпәйтилгәнлики мәлум

Мухбиримиз меһрибан
2017-04-27
Share
xoten-terror-seperwerlik.jpg Хитай бесимиға қаршилиқ көрсәткән пидаийларни тутуш һәрикитидә хәлқ аммиси сәпәрвәр қилинған. 2014-Йили авғуст, хотән.
CCTV

Игилишимизчә, йеқиндин буян хотәнниң һәрқайси наһийәлиридики йезиларда әслидики йезилиқ сақчиханилар кеңәйтилип, йезидики мәркизи сақчиханиниң башқурушида һәр бир кәнттә бирдин тармақ сақчихана, сақчиханиларниң һәммисидила 10 метирдин егиз сақчи қаравулханиси қурулған. Мәзкур бихәтәрлик тәдбирлириниң, бу йил 14-февралдики гума пичақлиқ һуҗумидин кейин мәйданға кәлгәнлики мәлум.

Хотәнниң чира наһийисидин игилигән әһваллардин бултурдин буян чира наһийә тәвәсидә сақчи вә ярдәмчи сақчилар көпәйтилип, йезиға қарашлиқ кәнтләрниң һәммисидила тармақ сақчиханилар қурулуп, сақчилар ярдәмчи сақчилар вә хәлқ әскәрлиридин тәркиб тапқан бирләшмә қошунниң наһийиниң аманлиқини қоғдашқа мәсул қилинғанлиқи мәлум болди.

Улуғсай йеза мәркизи сақчиханисидин телефонимизни алған ярдәмчи сақчи йезиниң әһвалини баян қилип, улуғсай йезисидики мәркизи сақчиханидин башқа йезиға қарашлиқ 8 кәнтниң һәммисидила тармақ сақчиханилар қурулуп, йеңидин сақчи вә ярдәмчи сақчиларниң көпәйтилгәнликини билдүрди.

Униң билдүрүшичә, улуғсай йезисида нөвәттә вәзипә өтәватқан сақчилар, ярдәмчи сақчи вә хәлқ әскәрлирини қошқанда 100 дин артуқ киши йезиниң аманлиқиға мәсул икән.

У йезидики сақчиларниң тарқилиш әһвалини тәпсилий баян қилди.

Униң ейтқанлиридин мәлум болушичә, мәркизи сақчиханида сақчихана башлиқи вә сиясий йетәкчини қошмиғанда муавин сақчи башлиқини өз ичигә алған 7 нәпәр сақчи 6 ярдәмчи сақчи болуп 13 киши вәзипә өтәйдикән. Йеза базиридики сақчи мулазимәт мәркизини қошқанда, йезиға қарашлиқ кәнтләрдики тармақ сақчиханиларниң һәр биридә 7 нәпәр сақчи 3 нәпәр ярдәмчи сақчи болуп 10 киши өз даирисиниң хәтәрликини қоғдашқа мәсул қилинған. Ундин башқа һәр җүмә күнидики намаз вә кәнтләрдә өткүзүлүватқан аммиви мурасимларда йезилиқ һөкүмәт әвәткән кадирлар вә һәр бир кәнттин талливелинған 4 нәпәр хәлқ әскири сақчиларға һәмкарлишип, кәнтләрниң муқимлиқини қоғдайдикән.

У йәнә 14-феврал хотән гумида йүз бәргән пичақлиқ һуҗумдин кейин, өз наһийисидики йезиларда йолға қоюлған қатму-қат бихәтәрлик тәдбирлири һәққидә тохтилип, кәнтләрдики тармақ сақчиханиларда йеқиндин буян йәнә 24 саәтлик нөвәтчилик түзүми йолға қоюлғанлиқини, нөвәтчиләр арисида толуқ қоралланған бир нәпәр сақчиниң барлиқини вә бултурдин башлап йезилиқ мәркизи сақчихана вә кәнтләрдики тармақ сақчиханиларниң һәммисидила 10 метирдин егиз болған сақчи қаравулханилири селинип, йезида өткүзүлүватқан бихәтәрлик маневирлири яки алаһидә әһвал йүз бәргәндә сақчиларниң бу қаравулханилардин пайдилинип, әтрапни көзитиши вә вәзийәтниң әһвалиға қарап тәдбир бәлгиләштә пайдилиниватқанлиқи қатарлиқ әһвалларни баян қилди.

Радиомиз йеқинқи мәзгилләрдә хотәндики башқа наһийиләрдики сақчиханиларға телефон қилип игилигән учурлардинму нөвәттә йезилардики кәнтләрдә тармақ сақчиханиларни тәсис қилиш пүтүн хотән вилайитидә омумлашқанлиқи вә хотәндә сақчиларниң 24 саәтләп нөвәтчиликтә туруп вәзипә иҗра қилиши уларниң күндилик хизмитигә айланғанлиқи мәлум болған иди.

Хотәндин зияритимизни қобул қилған уйғурларму, бу йил киргәндин буян пүткүл хотән вилайитидә бихәтәрлик тәдбирлири күчәйтилгәнлики, йеза базарлиридики дукандарлар һәтта деһқанларниңму террорлуққа қариши туруш сигнални челинған һаман қоллириға калтәк-тоқмақ, кәтмән -гүрҗәкләрни елип, сақчи вә ярдәмчи сақчиларға һәмкарлишип "бихәтәрликни қоғдаш маневири" ға қатнишидиғанлиқини ейтишқан иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт