Chira nahiyeside saqchi we qarawulxanilarning köpeytilgenliki melum

Igilishimizche, yéqindin buyan xotenning herqaysi nahiyeliridiki yézilarda eslidiki yéziliq saqchixanilar kéngeytilip, yézidiki merkizi saqchixanining bashqurushida her bir kentte birdin tarmaq saqchixana, saqchixanilarning hemmisidila 10 métirdin égiz saqchi qarawulxanisi qurulghan. Mezkur bixeterlik tedbirlirining, bu yil 14-féwraldiki guma pichaqliq hujumidin kéyin meydan'gha kelgenliki melum.

Xotenning chira nahiyisidin igiligen ehwallardin bulturdin buyan chira nahiye teweside saqchi we yardemchi saqchilar köpeytilip, yézigha qarashliq kentlerning hemmisidila tarmaq saqchixanilar qurulup, saqchilar yardemchi saqchilar we xelq eskerliridin terkib tapqan birleshme qoshunning nahiyining amanliqini qoghdashqa mes'ul qilin'ghanliqi melum boldi.

Ulughsay yéza merkizi saqchixanisidin téléfonimizni alghan yardemchi saqchi yézining ehwalini bayan qilip, ulughsay yézisidiki merkizi saqchixanidin bashqa yézigha qarashliq 8 kentning hemmisidila tarmaq saqchixanilar qurulup, yéngidin saqchi we yardemchi saqchilarning köpeytilgenlikini bildürdi.

Uning bildürüshiche, ulughsay yézisida nöwette wezipe ötewatqan saqchilar, yardemchi saqchi we xelq eskerlirini qoshqanda 100 din artuq kishi yézining amanliqigha mes'ul iken.

U yézidiki saqchilarning tarqilish ehwalini tepsiliy bayan qildi.

Uning éytqanliridin melum bolushiche, merkizi saqchixanida saqchixana bashliqi we siyasiy yétekchini qoshmighanda mu'awin saqchi bashliqini öz ichige alghan 7 neper saqchi 6 yardemchi saqchi bolup 13 kishi wezipe öteydiken. Yéza baziridiki saqchi mulazimet merkizini qoshqanda, yézigha qarashliq kentlerdiki tarmaq saqchixanilarning her biride 7 neper saqchi 3 neper yardemchi saqchi bolup 10 kishi öz da'irisining xeterlikini qoghdashqa mes'ul qilin'ghan. Undin bashqa her jüme künidiki namaz we kentlerde ötküzülüwatqan ammiwi murasimlarda yéziliq hökümet ewetken kadirlar we her bir kenttin talliwélin'ghan 4 neper xelq eskiri saqchilargha hemkarliship, kentlerning muqimliqini qoghdaydiken.

U yene 14-féwral xoten gumida yüz bergen pichaqliq hujumdin kéyin, öz nahiyisidiki yézilarda yolgha qoyulghan qatmu-qat bixeterlik tedbirliri heqqide toxtilip, kentlerdiki tarmaq saqchixanilarda yéqindin buyan yene 24 sa'etlik nöwetchilik tüzümi yolgha qoyulghanliqini, nöwetchiler arisida toluq qorallan'ghan bir neper saqchining barliqini we bulturdin bashlap yéziliq merkizi saqchixana we kentlerdiki tarmaq saqchixanilarning hemmisidila 10 métirdin égiz bolghan saqchi qarawulxaniliri sélinip, yézida ötküzülüwatqan bixeterlik manéwirliri yaki alahide ehwal yüz bergende saqchilarning bu qarawulxanilardin paydilinip, etrapni közitishi we weziyetning ehwaligha qarap tedbir belgileshte paydiliniwatqanliqi qatarliq ehwallarni bayan qildi.

Radi'omiz yéqinqi mezgillerde xotendiki bashqa nahiyilerdiki saqchixanilargha téléfon qilip igiligen uchurlardinmu nöwette yézilardiki kentlerde tarmaq saqchixanilarni tesis qilish pütün xoten wilayitide omumlashqanliqi we xotende saqchilarning 24 sa'etlep nöwetchilikte turup wezipe ijra qilishi ularning kündilik xizmitige aylan'ghanliqi melum bolghan idi.

Xotendin ziyaritimizni qobul qilghan Uyghurlarmu, bu yil kirgendin buyan pütkül xoten wilayitide bixeterlik tedbirliri kücheytilgenliki, yéza bazarliridiki dukandarlar hetta déhqanlarningmu térrorluqqa qarishi turush signalni chélin'ghan haman qollirigha kaltek-toqmaq, ketmen -gürjeklerni élip, saqchi we yardemchi saqchilargha hemkarliship “Bixeterlikni qoghdash manéwiri” gha qatnishidighanliqini éytishqan idi.