Кучада йолға қоюлған «узун көңләкни қисқартиш, чоң яғлиқни кичиклитиш» бәлгилимиси

Мухбиримиз меһрибан
2015-06-15
Елхәт
Пикир
Share
Принт
Төмүр решаткилиқ һойлиға соланған һиҗапланған уйғур аяллири.
Төмүр решаткилиқ һойлиға соланған һиҗапланған уйғур аяллири.
RFA/Ruqiye

Куча наһийисидин игилигән әһваллардин мәлум болушичә, йеңи секретар яң фасиң йолға қойған муқимлиқ тәдбирлири ичидә, 50 яштин төвән әрләр сақал қоймаслиқ, аялларниң йопкиси 110 сантиметирдин ашмаслиқ, чоң яғлиқ артмаслиқ бәлгилимиси» сәвәблик нөвәттә кучада, тиккүчи-сәйпуңлар аялларниң көңләк, йопкилирини қисқартиш билән алдираш, коча-рәстиләрдә узун көйнәклик, чоң яғлиқ артқан аяллар тамамән йоқиған, аялларниң яғлиқлири кичикләп, йопкилири тиздин ашмайдиған, кочида сақал-бурутлуқ уйғур әрлирини көргили болмайдиған мәнзирә барлиққа кәлгән.

Радиомиз өткән һәптә кучадин игилигән әһваллардин мәлум болушичә, бултур 10-айдин башлап кучада вәзипигә олтурған наһийилик партком секретари яң фасиң кучани «муқимлиқта нәмуничи наһийә қилип қуруп чиқиш» вәдисини әмәлгә ашуруш үчүн, бир қатар «йәрлик муқимлиқ тәдбирлири»ни йолға қойған.

Бу бәлгилимиләр ичидә бир қәдәр қаттиқ вә омумйүзлүк иҗра қилинған бәлгилимиләрниң бири, уйғурларниң ислам дини әнәниси вә миллий өрп-адитигә хас болған узун көңләк кийип, яғлиқ артиш, әрләр сақал, бурут қоюш адитини ислаһ қилиш тәдбири.

Игилигән учурлардин мәлум болушичә, кучада бултурдин буян елип бериливатқан «24 саәтлик өй тәкшүрүш» тики муһим тәртипләрниң бири, тәкшүрүлгән өйләрдә ропаш аяллар болмаслиқ, әгәр бундақ аяллар учриса аввал хизмәт ишләп уларни сиртларға чиққанда йүзини япмаслиқ, узун көңләк киймәсликкә қайил қилиш, әгәр тинч усулда елип берилған сөһбәткә наразилиқ билдүргәнләр учриса, уларни қанун бойичә бир тәрәп қилиш тәдбири йолға қоюлған.

Йеқинда чәтәлләрдин вәтән зияритигә берип қайтип кәлгән бир ханимниң билдүрүшичә, у, бу йил җәнубий уйғур дияридики қәшқәр, хотән, ақсу қатарлиқ юртларда бир қанчә күнлүк саяһәттә болғинида уни һәйран қалдурған бир көрүнүш, кучада илгирики йиллардин пәрқлиқ һалда, кочида ропаш аяллар йоқ болупла қалмастин, һәтта илгири йиллардикидәк узун көңләк кийип, чоң ромал артқан аялларни учриталмиғанлиқи, сақал-бурутсиз уйғур әрлири көпәйгәнлики, йол-йолларни тосуп кишиләрниң кимликини тәкшүрүватқан қораллиқ сақчиларниң кишиләрниң сомкилирини халиғанчә ахтуруватқанлиқи болған.

Кучадики мәлум аһалиләр районидики өз кимликини ашкарилашни халимиған бир нәпәр хизмәтчи хадимниң билдүрүшичә, бултурдин буян улар елип барған «заманға лайиқ, мәдәний куча аяллиридин болуш» паалийитидә, кучада бирқанчә қетимлиқ «заманиви мода кийим мусабиқиси» уюштурулған.

У баянида, мусабиқиләр җәрянида йәнә аялларға «яришимлиқ мода кийимләрни кийиш, ошуқни йепип туридиған зиядә узун көңләкләрни тиккүчиләргә апирип қисқартиш, көйнәк-йопкиларниң узунлуқи 110 сантиметирдин ашмаслиқ, баш вә боюнни бирақла орап чигидиған чоң яғлиқларни кичиклитип, яғлиқни кәйнидин чигиш» қатарлиқ тәшәббуслар тәшвиқ қилинип, сандуқларда узун көңләк вә чоң ромал сақлиғучилар байқилип қалса, қаттиқ чарә көрүлидиғанлиқи уқтурулғанлиқини билдүрди.

Радиомиз игилигән башқа әһваллардин мәлум болушичә, даириләр уйғурларға қаратқан «диний түс алған кийинишләрни чәкләш», «яш әрләрниң узун сақал қоюшини чәкләш» бәлгилимилири уйғур елиниң җәнуб, шималида бирдәк йолға қоюлған болсиму, әмма куча наһийисидә йолға қоюлуп, қаттиқ иҗра қилиниватқан «көңләк, йопкиниң узунлуқи 110 сантиметирдин ашмаслиқ», «50 яшқа кирмигән әрләр сақал, бурут қоймаслиқ» тәдбири, куча хәлқи арисида йеңи партком секретари яң фасиңниң «муқимлиқта нәмунилик наһийә» чүшини әмәлгә ашурушта өз алдиға чиқарған алаһидә йәрлик тәдбирлириниң бири дәп тәрипләнмәктә икән.

Пикирләр (0)
Share
Толуқ бәт