Tokyoda chaqirilghan 10 ming kishilik seperwerlik yighinigha Uyghurlarmu qatnashti

Yaponiyediki dunya Uyghur qurultiyi wekili doktor turmuhemmet hashim tokyodiki “Yapon budokan sariyi” da chaqirilghan “10 Ming kishilik yaponiye asasiy qanunigha özgertish kirgüzüsh seperwerlik yighini” da. 2015-Yili 10-noyabir, yaponiye.

10-Noyabir tokyodiki “Yapon budokan sariyi” da chaqirilghan “10 Ming kishilik yaponiye asasiy qanunigha özgertish kirgüzüsh seperwerlik yighini” gha Uyghurlarmu qatnashti.

Mezkur yighin yaponiyediki “Güzel yaponiye üchün asasiy qanun turghuzush jem'iyiti” ning sahibxaniliqida chaqirilghan. Mezkur jem'iyet yaponiyedki eng chong milletchiler guruppisidur.

“Yaponiye waqti” gézitining neqil qilishiche, yighin teshkilligüchiliri yighin'gha 11 ming 321 adem qatnashqanliqini bildürgen.

Yaponiye bash weziri shinzo abé yighin'gha widé'oluq alahide tebrik sözi yollighan we mundaq dégen: “Asasiy qanun hazirghiche héch özgertilmidi. Menche 21-esirge uyghun bir qanun turghuzidighan waqit keldi.”

Yighin'gha yaponiyediki nopuzluq istratégiye jem'iyetliridin-döletlik négizlik mesililer tetqiqat institutining qurghuchisi, tonulghan siyasiyon sakuray yoshiko xanim qatarliq mutexessislermu qatnashqan we söz qilghan.

Bu qétimqi seperwerlik yighinigha yaponiyediki nopuzluq siyasiy teshkilatlarning wekilliri we shundaqla tokyoda pa'aliyet élip bériwatqan Uyghur, tibet, mongghul qatarliq teshkilatlarning wekillirimu méhman süpitide qatnashqan.

Yighinda yaponiye asasiy qanunigha özgertish kirgüzüshning zörürlüki toghrisida mutexessisler türlük pilan we mulahizilerni otturigha qoyghan.
Yighin chüshtin kéyin sa'et tötke qeder dawamlashqan.

Yighin axirlashqandin kéyin, mezkur yighin'gha qatnashqan yaponiyediki dunya Uyghur qurultiyi wekili doktor turmuhemmet hashim radi'omiz ziyaritini qobul qilip, yaponiyede nöwette bash kötürüwatqan özgertish pikri we 10-noyabir tokyoda ötküzülgen seperwerlik yighini heqqidiki köz qarashlirini bildürdi.

Yuqiriqi awaz ulinishidin tepsilatini anglang.