Yaponiyening saytama ölkiside Uyghurlar toghrisida mexsus léksiye sözlendi

Yaponiyening saytama ölkiside ötküzülgen Uyghurlar toghrisida mexsus léksiye sözlesh pa'aliyitidin körünüsh. 2016-Yili 18-noyabir.

18-Noyabir yaponiyening saytama ölkisi kumagay shehiridiki medeniyet merkizide ötküzülgen yaponiye démokratik sotsiyal uyushmisi saytama ölkilik komitétining 2016-yilliq öginish kursida Uyghur mesilisi toghrisida mexsus léksiye sözlendi.

Yaponiye Uyghur birliki teshkilatidin igilishimizche, mezkur teshkilatning re'isi turmuhemmet hashim yaponiye démokratik sotsiyal uyushmisi saytama ölkilik komitétining 2016-yilliq öginish kursigha alahide léksiye sözleshke teklip qilinip, Uyghurlarning tarixiy, medeniyiti we nöwettiki siyasiy weziyiti toghrisida toxtalghan.

Téléfon ziyaritimizni qobul qilghan turmuhemmet hashimning bildürüshiche, u aldi bilen léksiyeside Uyghurlarning tarixiy we Uyghur élini xitay kompartiyesi bésiwalghandin kéyinki Uyghurlarning omumiy weziyiti toghrisida toxtalghan.

Ziyaritimiz jeryanida turmuhemmet hashim léksiyeside “5-Iyul ürümchi weqesi” we “28-Iyul yeken weqesi” qatarliq Uyghur élida yéqinqi waqitlarda yüz bergen bir qatar weqeler toghrisidimu köpchilikke melumatlar bérip ötkenlikini éytti.

Turmuhemmet hashim yene, xitay türmisidiki Uyghur ziyaliysi ilham toxti mesilisi toghrisidimu tepsiliy toxtalghanliqini bildürdi.

Léksiye sözlesh pa'aliyitidin kéyin, téléfon ziyaritimizni qobul qilghan saytama ölkisi agé'o sheherlik parlamént ezasi nakamura ependi Uyghurlar toghrisidiki léksiye heqqide toxtilip: “Léksiyedin men shexsen Uyghur élida xitay köchmenliri nopusining üzlüksiz ashqanliqini, Uyghur jem'iyitide xitaylarning hoquq, iqtisad we bashqa jehetlerde Uyghurlardin üstün turidighanliqini shundaqla Uyghur éli weziyitining kündin-kün'ge nacharlashqanliqini hés qildim” dédi.

Yaponiye démokratik sotsiyal uyushmisining re'isi nogi ependi léksiye heqqide toxtilip: “Méningche, shi jinping hakimiyetni qolgha alghandin kéyin, Uyghurlarni basturushni kücheytip Uyghur élidiki siyasiy weziyetni tolimu keskinleshtürüwetken bolup, bu xil siyasiy basturush izchil élip bérilsa buning aqiwiti elwette, her ikki terepke yaxshi netije élip kelmeydu dep oylaymen” dédi.

Igilishimizche, léksiye sözlesh pa'aliyitide yene, yaponiyediki nopuzluq metbu'atlardin “Yaponiye iqtisadi” zhurnilining zhurnalistliri yaponiyening ichki we tashqi siyasetliri we shundaqla nöwette yaponiyede saqliniwatqan bezi bir siyasiy mesililer toghrisida toxtalghan.

Mezkur uyushmining 2016-yilliq öginish kursi chüshtin kéyin sa'et bir yérimdin kech sa'et sekkiz yérimgha qeder dawam qilghan bolup, buninggha saytama ölkilik parlamént ezaliridin köp sanda kishiler qatnashqan.

Melum bolushiche, yaponiye démokratik sotsiyal uyushmisi yaponiyede tesiri küchlük bolghan siyasiy teshkilatlardin biri bolup,mezkur teshkilat amérika dölet siyasitini we tüzülmisini himaye qilidighan, yaponiye parlaméntida köp sanda ezasi bolghan teshkilatlardin bir hésablinidiken.

Yuqiriqi awaz ulinishidin tepsilatini anglang.