Atushta 300 neper yéngi yardemchi saqchining jiddiy meshqlendürüliwatqanliqi melum boldi

Muxbirimiz qutlan
2017-03-23
Élxet
Pikir
Share
Print
Kocha charlawatqan Uyghur saqchi. 2015-Yili 17-awghust, aqsu.
Kocha charlawatqan Uyghur saqchi. 2015-Yili 17-awghust, aqsu.
AFP

Yéqinda atush sheherlik da'iriler jiddiy uqturush chiqirip, atush sheher teweside torlashqan saqchi mulazimet torini qurmaqchi bolghanliqini bildürgen. Uqturushta jem'iyettin 300 neper charlash we bixeterlikni saqlash xadimi qobul qilidighanliqi ilgiri sürülgen.

Atushtiki birqanche saqchixanilarning nöwetchi xadimliri radiyomiz ziyaritimizni qobul qilip, 300 neper yardemchi saqchining qobul qilinip bolghanliqini we ularning nöwette jiddiy türde meshqlendürüwatqanliqini ashkarilidi.

Atush sheherlik azaq saqchixanisidin téléfonimizni qobul qilghan bir neper xitay nöwetchi saqchi munularni bildürdi: "Shundaq, buninggha iltimas qilish ishi alliqachan axirlashti. Namzatlar élan qilindi. Iltimas qilghuchilarning shertliride ata-ana ikki tereptiki biwasite tughqanliri ichide 3 ewladqiche jinayet tarixi bolmighan bolush, yeni milliy bölgünchilik, qanunsiz diniy pa'aliyet yaki dölet bixeterlikige ziyan sélish jinayiti ötküzmigen bolush telep qilin'ghan. Jem'iy 300 adem qobul qilinidu. Ularning asasliq wezipisi torlashqan saqchi mulazimiti élip bérish, yeni charlash we bixeterlik közetchiliki qilish qatarliqlar."

Atush sheherlik poyiz istansisi saqchixanisining bir neper nöwetchi saqchisi ziyaritimizni qobul qilip, 300 neper yardemchi saqchining aldinqi küni qobul qilinip bolghanliqini, nöwette ularning jiddiy türde meshqlendürüliwatqanliqini ashkara qildi.

Atush sheherlik tengritagh saqchixanisining bir neper xitay saqchisimu yuqiriqi ehwalning rastliqini delillidi: "Shundaq, bu xizmet bügün axirlashti. Siz körgen uqturushta déyilginidek, egerde üch ewlad uruq-tughqanliri arisida milliy bölgünchilik, qanunsiz diniy pa'aliyet yaki bashqa siyasiy jinayet sadir qilghanlar bu xizmetke qobul qilinmaydu. Ular asasliqi torlashqan saqchi mulazimet ponkitlirida charlighuchiliq qilidu. Konkrét ehwalini kadirlar idarisidin sorisingiz bolidu."

Biz axirida atushtiki yerlik ahalilerdin birige téléfon qilduq. Üstün atushning melum jayida olturushluq bir kishi, nöwette weziyetning jiddiy ikenlikini, pütün yéza-bazarlarning tekshürüsh ponkitliri bilen torlashqanliqini, arqa-arqidin yardemchi saqchiliqqa adem éliwatqanliqini hemde kimliksiz yol yürüshning mumkin emeslikini ilgiri sürdi.

Toluq bet