Yeken nahiyiside 5 orun'gha qerellik bomba qoyulghan, bombilardin biri partlighan, 4 i yighiwélin'ghan

Muxbirimiz shöhret hoshur
2014.05.27
xoten-tutqun-partlash-qarshiliq.jpg Ürümchi, yeken qatarliq jaylarda partlash yüz bergendin kéyin, xitay saqchilirining Uyghurlarni tutqun qiliwatqan körünüshi. 2014-Yili 27-may, xoten.
Oqurmen teminligen

Anglighuchilirimizdin biri jüme küni radi'omizgha inkas yollap, shu küni yekende bomba partlash weqesi yüz bergenlikini, xitay da'iriliri we köchmenlirining sarasimige chüshkenlikini melum qildi.

Muxbirimiz bu yip uchigha asasen, yeken nahiyilik partkom we saqchi idariliridin melumat élishqa tirishqan bolsimu, da'iriler weqe heqqide melumat bérishni ret qildi. Bügün nahiye baziridiki gülbagh saqchixanisining 3 neper xadimi muxbirimizning weqe heqqidiki so'allirigha jawab berdi. Ashkarilinishiche, jüme küni yeni 23-may küni yekende nahiyilik saqchi idarisi, dölet amanliq etriti qatarliq 5 orun'gha qerellik bomba qoyulghan, bulardin biri partlighandin kéyin, xitay saqchiliri keng-kölemlik heriketke ötüp qalghan 4 bombini tapqan we tesirsizlendürgen.

Gülbagh saqchixanisidiki xadimlarning ashkarilishiche, 5 dane sa'etlik bomba nahiyilik saqchi idarisi, alahide saqchi etriti, dölet amanliq etriti, gaz ponkiti we 6-bashlan'ghuch mektep qatarliq 5 orunning qorusi yaki xizmet binasining etrapigha qoyulghan. Bombilar 3 chaqliq kichik motsiklitining üstige jaylashturulghan. Yeken nahiyilik saqchi idarisi yénigha qoyulghan bomba partlighandin kéyin saqchilar, kochilarda toxtitilghan 3 chaqliq motsiklitlarni tekshürgen. Tekshürüsh netijiside qalghan 4 gumanliq motsiklit bayqilip uningdiki bombilar tesirsizlendürülgen. Saqchi xadimlirining bayan qilishiche, bombilarning eng küchlüki az dégende 15-20 kishini öltürüsh we zeximlendürüsh küchige ige.

Melum bolushiche, weqe sezgür bir mezgilde yeni 22-may ürümchi etigenlik bazargha hujum qilish weqesidin bir kün kéyin yüz bergechke, da'iriler weqe heqqidiki uchurlarni qattiq kontrol astigha alghan, hetta weqede wezipe ötigen saqchi xadimlirimu nahiyilik saqchi idarisi aldida partlighan bomba keltürüp chiqarghan ziyan-zexmet heqqide melumatqa érishelmigen.

Da'irilerning weqeni sir tutushta, weqening xelq'ara tesiridin bashqa yene, rayondiki xitay köchmenliride wehime peyda qilishidinmu endishe qilghanliqi éhtimalgha yéqin körülmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.