Qaraqashtiki bir kent saqchisi: abdul'ehed baqqal "Terbiyelesh" te jan üzdi

Muxbirimiz shöhret hoshur
2018-06-11
Share
yepiq-terbiyelesh-derwaza-saqchi-pos.jpg "Yépiq terbiyelesh merkizi" aldida posta turghan saqchilar. 2017-Yil 2-noyabir, korla.
AP Photo/Ng Han Guan

Anglighuchilirimizdin biri 3 heptining aldida radiyomizgha uchur yollap, xotenning nawagh kentide abduxélil abduqadir isimlik bir kishining "Terbiyelesh merkizi" de jan üzgenlikini melum qilghan idi.

Muxbirimiz mezkur weqeni éniqlashliri dawamida, qaraqash nahiyeside yene bashqa bir kishining yeni chiniwagh yézisidiki abdul'ehed baqqalning yéqinda terbiyelesh merkizide ölgenliki pash boldi. Saqchi xadimi 3 nareside balining atisi bolghan 37 yashliq abdul'ehed baqqalning "Terbiyelinish" jeryanida qorqup kétip qan bésimi örlep ketkenliki we bu sewebtin hayatidin ayrilghanliqini bayan qildi.

Radiyomiz tor bétige yézilghan bu heqtiki inkasta, "Terbiyelesh lagéri" da ölgen abduxélil abduqadirning xotenning nawagh kentidin ikenliki bayan qilin'ghan. Emma nawagh kentining xotenning qaysi nahiye, qaysi yézisigha te'elluq ikenliki bildürülmigen. Shunga biz awwal xoten wilayetlik saqchi orunlirigha téléfon qilip, "Terbiyelesh lagéri" da jan üzgen abduxélil abduqadirning qaysi nahiyege tewe ikenlikini sürüshte qilduq. Téléfonimiz qobul qilghan bezi saqchi xadimliri, özlirining heqte melumati yoqluqini, beziler bolsa, bu heqte jawab bérish salahiyiti yoqluqini bayan qildi. Téléfonimiz baghlan'ghan qaraqash nahiyesining chiniwaghliq yéziliq saqchi xadimi mezkur yézida nawagh dep bir kent yoqluqini, emma, 13-kentte 37 yashliq abdul'ehed baqqalning yéqinda lagérda jan üzgenlikini pash qildi.

Melum bolushiche qaraqash nahiyesining top bazirida baqqalchiliq qiliwatqan 37 yashliq abdul'ehed, ötken yili 12-ayda lagérgha ekétilgen. Déyilishiche, lagér ichidiki jiddiy we qorqunchluq keypiyat we ensiz so'al-soraqlar, abdul'ehed baqqalning ushtumtut qan bésimi örlishige seweb bolghan, bu uning ölümige türtke bolghan. Igilen'gen uchurlardin abdul'ehed baqqalning ayaliningmu lagérda ikenliki, 3 balisi barliqi, üchilisiningla yashta kichik ikenliki melum, emma bu balilargha nöwette kimning qarawatqanliqi melum emes.

Lagér ichidiki weziyetning jiddiyliki we qorqunchluqliqi hem her xil paji'elerning her küni yüz bériwatqanliqi, radiyomizgha her xil shekilde yetküzülmekte. Emma xitay da'iriliri, paji'elerning yüz bergini emes, lagérlarning mewjutluqinimu inkar qilmaqta. Ötken ayda igiligen uchurimizda qorghas köktalaliq peyzulla utuqning lagérdin boyni yaridar halda qachqanliqi ashkarilan'ghan bolsa, ötken hepte ghulja xenbingdiki abduréshit seley hajining béshi téngiqliq halette jesitining öyige qayturulghanliqi ashkarilan'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.