Корлидики "йепиқ тәрбийәләш мәркизи" гә аз дегәндә 2100 чә кишиниң қамалғанлиқи ашкариланди

Мухбиримиз шөһрәт һошур
2017-09-28
Share
ikki-yuzlimichi-sazayi.jpg Ақту наһийә пилал йеза тазилиқ кәнтидин "икки йүзлимичи диний зат" дегән қалпақ билән тартип чиқирилип, амма алдида сазайи қилиниватқан әбәйдулла ясин һаҗим. 2017-Йил 3-июл, ақту пилал йезиси.
xjakt.gov.cn

Илгирики ениқлашлиримиз давамида ғулҗа наһийәлик "йепиқ тәрбийиләш мәркизи" дә аз дегәндә 1500 киши, йеңисар наһийәлик "йепиқ тәрбийиләш мәркизи" дә топлуқ йезисидинла 2000 дин артуқ кишиниң тутуп турулуватқанлиқи ашкариланған иди.

Мухбиримизниң бу һәптидики ениқлишида корлидиму "йепиқ тәрбийәләш мәркизи" ниң 3 орунда барлиқи, буниң һәр биридә 700 дин, аз дегәндә 2100 чә кишиниң солинип туруватқанлиқи ашкариланди.

Биз корладики "қуран кәрим" вә җайнамазларни йиғивелиш йиғини һәққидики ениқлашлиримиз давамида корладики аһалиләрниң тутқун қилиниш вә кесилиш әһвали һәққидә мәлумат игилидуқ. Мәлум болушичә, корланиң қараюлғун йеза, қараюлғун кәнтидә җәмий 86 киши тутулған вә кесилгән. Қараюлғунниң арабуғра кәнтидә болса 200 дин артуқ киши тутулған.

Мәлум болушичә, тутқунлар арисида сабиқ мәһбуслар, чәтәлдә оқуп кәлгәнләр, чәтәлни саяһәт қилип кәлгәнләр, тәблиғ аңлиғанлар, тәшкилсиз һәҗ қилип кәлгәнләр бар болуп, омумән "дөләт бихәтәрликигә тәһдит шәкилләндүрүш хаһиши бар" дәп қаралған кишиләрдин тәшкилләнгән.

Тутуп турулуватқанлар ичидә йәнә аяллар вә яшанғанларму бар. Кәнт секретарлири йәнә өз кәнтлиридин тутуп тәрбийәлиниватқанларниң кимликлири вә бәзилириниң қилмишлири һәққидиму мәлумат бәрди. Баян қилинишичә, бу йил тутқун қилинғанлар ичидә аталмиш "җинайи һәрикити бар" лар тутуп туруш мәркәзлиригә, йәни қамақханиға; "җинайи һәрикити йоқ, әмма җинайи хаһиши бар" лар "тәрбийәләш мәркизи" гә елип берилған. Ашкарилинишичә, "тәрбийәләш мәркизи" дә җинайи хаһиши өзгәрмисә, яки йеңи җинайи һәрикәтлири паш болса, тутуп туруш мәркизигә йөткәлмәктә.

Ашкарилинишичә, корлада "йепиқ тәрбийәләш мәркизи" дин 3 орунда тәсис қилинған, буларниң һәр биридә 700 дин аз дегәндә 2100 чә киши солинип ятмақта. Бәзи тутқунлар аилисидә артуқ әмгәк күчи йоқлуқини, бу мәркәздә солинип турушниң турмуш вә ишләпчиқиришқа тосалғу пәйда қиливатқанлиқини баян қилған болсиму, әмма даириләр уларниң шикайәтлиригә писәнт қилмиған. Даириләр, бу мәркәзләрдики иҗраатини "тәрбийәләп өзгәртиш" дәп атаватқан болсиму, әмма бу йепиқ мәркәзләргә "иқтидар йетилдүрүш мәркизи" дәп нам бәргән вә вивиска асқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт