Кәнт аманлиқ мудири: «чәтәлгә чиқип киргәнләр зәһәрлиниду, тәрбийәлишимиз шәрт»

Мухбиримиз шөһрәт һошур
2017-10-02
Share
turme-uyghur-siyasiy-mehbus.jpg Түрмигә елип кириливатқан уйғур сиясий мәһбуслар.
Social Media

Мәлум болушичә, уйғур аптоном районидики даириләр йеқинқи айларда чәтәлдә саяһәт қилип киргәнләрни өзини мәлум қилишқа буйруған вә өзини мәлум қилғанларниң кәңчилик билән бир тәрәп қилинидиғанлиқини уқтурған иди. Әмма ениқлишимиз давамида корланиң қара юлғун йеза арабуғра кәнтидин илгири чәтәлгә саяһәткә чиққан 13 киши өзлирини мәлум қилған болсиму, йәнила «йепиқ тәрбийәләш мәркизи» гә қамап қоюлған. Зияритимизни қобул қилған бир кәнт секретари чәтәлгә чиққанларниң идийә җәһәттин зәһәрлинидиғанлиқини, шуңа тәрбийәлинишиниң шәрт икәнликини илгири сүрди.

Уйғур районидики даириләр бу йилниң бешида чәтәлдә оқуватқан оқуғучиларни юртиға қайтишқа буйруш билән бирликтә, йәнә чәтәлдә саяһәттә болуп кәлгәнләрниму өзини мәлум қилишқа буйруған. Әң йеқинда ашкариланған бир уқтурушта өзини мәлум қилғучиларға кәңчилик қилинидиғанлиқи әскәртилгән.

Игилишимизчә, даириләр вәдисидә турмиған. Чәтәлгә саяһәткә чиқипла киргән һәрқандақ бир уйғурни «тәрбийәләш мәркизи» гә апарған вә «мәсилә тапшуруш» қа қистиған. Корла шәһиригә қарашлиқ қара юлғун йезисиниң ара буғра кәнтидә түркийә қатарлиқ дөләтләргә саяһәткә берип кәлгән 13 киши тутқун қилинған вә «тәрбийәләш мәркизи» гә апирилған.

Арабуғра кәнт секретари, чәтәлгә чиқип киргәнләрдин шикайәт қилип мундақ дәйду: «булар чәтәлгә чиқип кирип раст гепини демәйду. У йәрниң яман тәрәплирини тилға алмастин, яхши тәрәплирини махтишиду. Өзлириниң бешидин кәчүргән яман күнлирини йошуриду, бу арқилиқ чүшиниш сәвийиси йетәрлик болмиған пуқраларни қаймуқтуриду».

Бу секретар йәнә чәтәлгә чиқип киргән саяһәтчиниң чоқум бәлгилик дәриҗидә яман идийә билән юқумлинидиғанлиқини вә шу сәвәбтин аз дегәндә 15 күн тәрбийәлиниши шәрт икәнликини илгири сүрди. Әмма ашкарилинишичә, мәзкур кәнттики сабиқ саяһәтчи икки ай аввал «тәрбийәләш мәркизи» гә апирилған болсиму, техичә қоюп берилмигән; уларниң ичидики өз алдиға саяһәт қилғанлириму, саяһәт ширкитиниң йетәкчиликидә саяһәт қилғанлириму охшашла аталмиш тәрбийәлиниш қисмитидин халий болалмиған.

Мәлум болушичә, корланиң қара юлғун йеза арабуғра кәнтидә тутуп турулуп тәрбийәлиниватқан 80 нәччә кишидин 13 нәпири сабиқ саяһәтчи; корла бойичә «йепиқ тәрбийәләш мәркизи» гә йиғивелинған 2100 чә киши ичидә қанчә нәпәр сабиқ саяһәтчи барлиқи мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт