Qeshqer nezerbaghdiki erzdarlardin turghun mamutning türmidin chiqipla qaza qilghanliqi melum bolmaqta

Qeshqer qaziriq 14-kent déhqanlirining barmaq bésip hökümetke yollighan erzi.

Qeshqer nezerbagh yézisining yoqiriqi qazriq kentidiki yer dewasi qiliwatqan déhqanlar wekilliridin turghun mamutning ötken yili türmidin qoyup bérilip uzun ötmey qaza qilghanliqini melum.

Biz bu uchurgha asasen qeshqer shehirige qarashliq nezerbagh yéziliq saqchixanigha téléfon qilduq. Halbuki, saqchixana xadimliri bu heqte éghiz échishni ret qildi.

Turghun mamut bilen bille erz qilghan, ilgiri radiyomiz ziyaritini qobul qilghan nezerbaghliq yene bir déhqan bügünki ziyaritimiz dawamida turghun mamut heqqidiki so'allirimizdin özini qachurdi. Halbuki, u özining bir yérim yildin buyan mushu ish seweblik xitay ölkiliride sersan bolup qéchip yürgenlikini bildürdi.

Eyni chaghda turghun mamut bilen bille béyjingghiche erz qilip barghan nezerbaghliq abduqeyyum memet téléfonimizni qobul qilghan bolsimu, emma turghun mamutning ölümi heqqide sorighan so'alimizgha jawab bérishni ret qildi.

Ehwaldin xewerdar kishilerning bildürüshiche, u turghun mamut bilen bille 4 yilliq qamaqqa höküm qilin'ghan bolsimu, kéyinche qamaq jazasini türme sirtida réjimda turup ijra qilishqa qoyup bérilgen iken.

Nezerbagh déhqanlirining uzaqqa sozulghan yer dewasidin xewiri bolghan, emma nam-sheripini ashkarilashni xalimaydighan muhajirettiki bir neper Uyghur ziyaliysi bu heqte özi bilidighan ehwallardin mundaq melumat berdi:

“Men ürümchidiki waqtimda turghun mamut bashchiliqidiki nezerbagh déhqanlirining wekilliri bilen körüshken idim. Déhqanlar pul yighip 5 kishini ürümchige erz qilishqa ewetken iken. Men ularni shinxu'a kitabxanisigha élip bérip, jungxwa xelq jumhuriyitining heq-telep qanuni hemde aptonom rayonning yer hoquqigha da'ir belgilimilirini tépip bergen idim. Kéyin men ularning qeshqer da'iriliri teripidin tutqun qilin'ghanliqini anglidim. Turghun mamut ötken yili 9-aylar etrapida türmidin qoyup bérilip uzaq ötmey qaza qiptu. Abduqeyyum memetke yépiq sot échip 4 yilliq qamaq jazasini türme sirtida réjimda turup ijara qilishni qarar qiptu dep anglidim. Turghun mamut 50 yashlardin ashqan kishi idi.”

Tepsilatini awaz ulinishtin anglighaysiz.