Тутуш буйруқи чиқирилған закир ясин йеқинда қолға елинғанлиқи мәлум

Мухбиримиз қутлан
2014.12.18
mesuliyet-surushturushke-maslishish-uqturushi-hojjet.JPG Хотән лаңру йезилиқ хәлқ һөкүмити чиқарған “мәсулийәт сүрүштүрүшкә маслишиш уқтуруши”.
RFA/Erkin Tarim


Радиомизниң игилишичә, бу йил 9 - айниң 19 - күни хотән наһийә лаңру йезилиқ һөкүмәт нусуй кәнтидә олтурушлуқ закир ясин аилисигә “мәсулийәт сүрүштүрүшкә маслишиш уқтуруши” чиқирип, униң 2 күн ичидә йезилиқ сақчиханиға өзини мәлум қилишини уқтурған.

Уқтурушта мундақ дейилгән: “хотән наһийә лаңру йеза нусуй кәнт 1 - мәһәллидә олтурушлуқ закир ясин, әр, башланғуч мәдәнийәт сәвийәсигә игә, кимлик номури йоқ, һезбот тәшилатиға четишлиқ дәп бекитилгәнлики үчүн 2014 - йили 9 - айниң 20 - күнидин 22 - күнигичә болған арилиқта лаңру йезилиқ сақчиханиға өзиңизни мәлум қилишиңиз үчүн бу уқтуруш тарқитилди. Әгәр бәлгиләнгән муддәт ичидә хизмитимизгә маслишип өзиңизни мәлум қилмисиңиз, төвәндикидәк ақивәтләрниң келип чиқишиға мәсул болисиз.”

Уқтурушта униң нопусиниң бикар қилинидиғанлиқи, йәрлири қайтуривелинидиғанлиқи, мал - мүлкиниң мусадирә қилинидиғанлиқи, өй - җайи чеқилип түзливетилидиғанлиқи шуниңдәк барлиқ уруқ - туғқанлириниң бәһриман болуватқан һәр түрлүк етибар сиясәтлири әмәлдин қалдурулидиғанлиқи әскәртилгән.

Биз мәзкур уқтуруштики учурларға асасән лаңру йезилиқ сақчихананиға телефон қилдуқ. Телефонни алған нөвәтчи сақчилардин бири закир ясинниң һазирға қәдәр тутулмиғанлиқини, сақчиларниң униң өйигә бирқанчә қетим тутқили барған болсиму, лекин униң қечип кәткәнликини ашкара қилди.

Йәнә бир нөвәтчи сақчи закир ясинниң хотән наһийәси тәвәсидики һезботтәһрир тәшкилатиға четилған гумандар икәнликини, бу тәшкилаттики он нәччә гумандарниң техичә қечип йүргәнликини илгири сүрди.

Биз йәниму илгирилигән һалда нусуй кәнтидики сақчи әмәлдари зулпиқарға телефон қилдуқ. У бу әһвалдин хәвәрдар икәнликини билдүргән болсиму, лекин бу һәқтә тәпсилий учур беришни рәт қилди.

Ахирида биз нусуй кәнтиниң секритари әмәргә телефон қилдуқ. У закир ясин һәққидә растинла 9 - айда тутуш буйруқи чиқирилғанлиқини, лекин у бәлгиләнгән муддәттә өзини мәлум қилмиғанлиқи үчүн сақчиларниң уни издәп йүргәнликини етирап қилди.

У зияритимиз җәрянида закир ясинниң һезботтәһрир тәшкилатиға қатнашқан дегән гуман билән тутушқа уқтуруш чиқирилғанлиқини, униң 9 - айда қечип кәткән болсиму, лекин йенида кимлики йоқлуқини тилға алди.

Ахирида у, буниңдин бир һәптә илгири гумандар закир ясинни нусуй кәнтидики сақчи башлиқи зулпиқарниң ишханисида көргәнликини, униң тәқдириниң қандақ болғанлиқи һәққидә ениқ мәлумати йоқлуқини илгири сүрди.

У йәнә закир ясин билән биллә һезботтәһрир тәшкилатиға четишлиқ дәп гуман қилинған мәзкур кәнттики йәнә бир уйғурниң қечип йүргәнликини вә һазирғичә тутулмиғанлиқини билдүрди.

Тәпсилатини аваз улиништин аңлиғайсиз.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.