Ju yüngkangning qolgha élin'ghanliq xewiri munazire qozghidi

Muxbirimiz méhriban
2013.12.05
ju-yungkang-305.jpg Xitay merkizi komitét siyasiy byurosining da'imiy ezasi ju yungkang xitay ikki chong yighinining échilish murasimida. 2012-Yili 5-mart, béyjing.
AFP



1 - Dékabir küni xitay siyasiy qanun komitétining sabiq sékrétari, xitay siyasi byurusidiki 9 ezaning biri bolghan ju yüngkang we uning ayali qatarliqlarning qolgha élin'ghanliqi heqqidiki xewer küchlük munazire qozghidi. Xelq'ara metbu'atlar we tor gézitliri xewerliride jyang zéminning yéqin adimi ju yüngkangning qolgha élinishi xitay kompartiyisining yuqiri qatlimida qandaq özgirishlerni élip kélishi heqqide mulahize qilishmaqta.

Diqqitinglar muxbirimiz méhribanning bu heqtiki programmisida bolsun.

Gerche xitay hökümet da'iriliri 5 - dékabirghiche, sabiq xitay re'isi jyang zéminning yéqin adimi bolghan ju yüngkangning qolgha élin'ghanliqi heqqide resmiy xewer bermigen bolsimu, emma birnechche kündin buyan xitay siyasi qanun komitétining sabiq bashliqi ju yüngkangning qolgha élin'ghanliqi heqqidiki xewerlerge her küni yéngi mezmunlar qoshulmaqta.

Ju yüngkangning qolgha élinish sewebi heqqidiki xewerlerde, ju yüngkangning ilgiriki ayalini qestlep öltürüsh, xitay hökümitining nöwette wezipe ötewatqan re'isi shi jingpingni qestleshke urunush we éghir derijidiki parixorluq jinayiti bilen eyiblinip, xitay merkizi byorusidiki 7 da'imiy hey'etning qoshulushi bilen resmiy qolgha élishqa testiqlan'ghanliqi ilgiri sürülgen.

Ju yüngkangning qolgha élin'ghanliqi heqqidiki xewer tunji bolup, teywende chiqidighan “Birleshme xewer géziti” ning 2 - dékabir künidiki sanida élan qilindi. Teywen“Birleshme xewer géziti” xitaydiki öz kimlikini ashkarilashni xalimaydighan bir emeldarning sözidin neqil élip, xitay merkizi intizam tekshürüsh komitétining 1 - dékabir küni yuqiri derijilik wezipilerni ötigen ju yüngkangni resmiy qolgha élishni testiqlighanliqini xewer qildi.

2 - Dékabirdin bashlap xelq'ara metbu'atlardin roytérs, gérmaniye awazi, erkin asiya radi'osi, nyuyork waqti géziti, en'gliye b b s agéntliqi qatarliq gherb metbu'atliri, yaponiye, xongkong metbu'atlirining xewerliri we chet'ellerdiki xitay démokratlirining tor xewerliride jy yüngkangning jongnenxeydiki öyide qolgha élin'ghanliqi we uning qolgha élinishidiki jinayi pakitlar heqqide xewer we analizlar tarqaldi.

Roytérs agéntliqining 5 - dékabirdiki xewiride, da'irilerning “Bundin alte ay ilgirila ju yüngkangning chet'eldiki oghli ju niyni béyjinggha chaqirtip kélip, uningdin ilgiri biwaste ju yüngkangning bashqurushida bolghan néfit sahasidiki jang jémin qatarliq töt chong emeldarning parixorluq qilmishigha a'it ehwallarni igiligenliki, hazir néfit sahesidiki parixorluqqa chétilip nurghun emeldarlarning qolgha élin'ghanliqi, eger ju yüngkang üstidinmu uning parixorluq qilmishigha da'ir resmiy délo turghuzulsa, u halda ju yüngkang délosining xitayda hazirghiche pash bolghan eng chong parixorluq délosi bolidighanliqi” xewer qilindi.

Xitay démokratliri tor béketkliridin apollo torining 5 - dékabirdiki sanida “Katip élip kétildi,lenjen tutush buyruqini oqudi,ju yüngkang özige shi jingpingni qestlesh jinayiti artilghanliqini anglap neq meydanda hushidin ketti” dégen mawzu qoyulghan tepsiliy xewer élan qilindi. Xewerde ju yüngkanggha artilghan jinayetler tonushturulup,“Merkiziy qanun komitétining sabiq bashliqi ju yüngkang qestlesh jinayitige chétildi. U merkiziy hökümet rehbirini qestleshke urunush, miqdari zor bolghan, köp xil parixorluq délolirigha chétildi. Bu xitay kompartiyisi tarixida ilgiri körülüp baqmighan chong délo boldi” déyildi.

Xewerde yene ju yüngkangning özi heqqidiki qararni anglighan chaghdiki menzire mundaq bayan qilindi.“1 - Dékabir yekshenbe küni kechqurun, ju yüngkang we uning ayali xitay merkizi hökümitining uning mesilisini tekshürüsh heqqidiki qararini tapshurup alghandin kéyin, ju yüngkang neq meydanda hushidin kétip, yerge yiqildi. Xitay merkiziy byurusining da'imiy hey'iti, xitay merkizi hökümiti ishxanisining mudiri lyen jen ju yüngkangning jungnenxeydiki öyide merkizi hökümetning ju yüngkang heqqidiki qararini oqudi.” xewerde yene, xitay kopartiye merkizi komitétining qarar élish jeryani bayan qilinip,“4 - Dékabir küni xitay merkiziy byurusining da'imiy hey'etler yighinida, merkiziy byuruning da'imiy hey'iti, merkiziy intizam tekshürüsh komitétining sékritari wang jishen, ju yüngkang délosini tekshürüsh dokladini tonushturdi. Ju yüngkangning katibi jaw xung, muhapizetchisi we shopuri qatarliqlarmu merkizi intizam tekshürüsh komitéti teripidin élip kétildi” dégen bayanlar bérilgen.

Chet'ellerdiki xitay démokratliri tor béketliridin boshün torining ju yüngkangning qolgha élin'ghanliqi heqqidiki xewerlerde yene “Eger ju yüngkang délosi resmiy turghuzulsa, u halda ju yüngkang xitayning 100 yildin buyanqi tarixida jazagha tartilghan 2 - nomurluq shexs bolup qalidu” déyildi. Chet'ellerdiki xitay xewer torliridin yéngi tang tor téliwiziyisining obzorchisi shi taw 5 - dékabir küni boshün torining bu xewiri heqqide toxtilip, “Eger ju yüngkang xitayda jazalan'ghan 2 - nomurluq emeldar bolsa, u halda 1 - nomurluq emeldar elwette jang zéminni körsetse kérek. Qarighanda shi jingping bu qétim jiyang zémin gurohini yoqitishqa bel baghlighan bolsa kérek” dégen.

Erkin asiya radi'osi gu'angdung bölümining 5 - dékabir künidiki xewiride bolsa, xitaydiki ehwaldin xewerdar emeldarlar ashkarilighan uchurlar neqil élinip, ju yüngkanggha asasliqi ilgiriki ayalini qestlep öltürüsh jinayiti, shi jinpinggha qest qilishni pilanlash we parixorluq jinayetliri artilishi mumkinliki, emma xitay merkizi komitéti ichki qismidiki ötkür küresh sewebidin, hazirche xitay metbu'atlirida ju yüngkangni qolgha alghanliq xewirini ashkarilimighan bolushi mumkinliki ilgiri sürüldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.