Ата-аниси еғир җазаланған ғулҗадики бир башланғуч мәктәптә 42 оқуғучиға "алаһидә сиясий тәрбийә" берилгән

Мухбиримиз шөһрәт һошур
2021-08-20
Share
perishtiler-maktiwi-daqchi-charlash-tekshurush.jpg "пәриштиләр" мәктипи алдида тәкшүрүш вә чарлаш елип бериватқан сақчилар. 2018-Йили 30-авғуст, хотән.
AP

2017‏-Йилдин буян, уйғур районидики мәктәпләрдә ата-аниси яки уруқ-туғқанлири тутқунда болуш асасән омумиййүзлүк әһвалға өзгириш билән бирликтә, ата-аниси еғир җазаға учриған бир қисим оқуғучиларға қарита мәктәпләрдә "алаһидә сиясиий тәрбийә" елип бериливатқанлиқи, буниң ақивитидә мәзкур оқуғучиларниң роһий кәйпияти вә оқуш нәтиҗисдә еғир мәсилә көрүливатқанлиқи инкас қилинмақта. Мухбиримизниң бу инкасларға асасән елип барған ениқлашлири давамида, ғулҗа наһийәсидики бир башланғуч мәктәптә ата-аниси тутқунда болған 42 оқуғчиға пәрқлиқ сиясий тәрбийә елип бериливатқанлиқи вә уларниң дәрс нәтиҗисидә еғир чекиниш болғанлиқи ашкариланди.

Уйғур райониниң маарип вәзийитидин хәвәрдар кишиләрдин бири радийомизға учур йоллап, өткән йилниң бешида мәктәпләргә ата-аниси еғир җазаланған оқуғучиларға "алаһидә сиясий тәрбийә" бериш һәққидә бир уқтуруш чүшкәнликини инкас қилди. Дейилишичә, бу уқтурушта ата-аниси еғир кесиветилгән оқуғучиларға тәсәллий бериш тәшәббус қилинған вә бир тәрәптин бу балиларда һөкүмәткә қарита наразилиқ кәйпияти шәкиллинип қелишиниң алдини елиш тәләп қилинған.

Телипонимизни қобул қилған уйғур районидики маарип идарисиниң хадимлири бундақ бир уқтурушниң бар-йоқлуқи һәққидә мәлумат беришни рәт қилди.

Инкаста дейилишичә, мәктәптики бәзи оқутқучлар өзлири хаталишип қалмаслиқ үчүн бу балиларға бәк очуқ-чирайда болмиғанлиқи үчүн бу әһвал балиларда еғир бесим пәйда қилған. Униң үстигә мәзкур тәрбийә мәктәпниң сиясий әхлақ йетәкчиси билән аһалиләр комитети яки кәнт сақчилириниң һәкарлиқида елип берилғачқа, бу "айрим сөһбәтләр" һәрқанчә сийлиқ-сипайә давам қилсиму, бәзи балиларда қорқунуч пәйда қилған. Телефонимизни қобул қилған йәркәндики бир мәктәпниң сиясий әхлақ йетәкчиси, өзлириниң ата-аниси еғир җазаланған балиларға пәрқлиқ муамилә қилмайдиғанлиқини илгири сүрди, әмма уларға айрим "тәрбийә" елип берилидиғанлиқини инкар қилмиди.

Инкаста дейилишичә, ата-аниси еғир җазаланған оқуғучилар мәзкур "алаһидә тәрбийә" ниң нәтиҗисидә, әслидики дәрдигә техиму дәрт қетилип, роһий кәйпиятида һәссиләп чүшкүнлишиш пәйда болған вә дәрс нәтиҗисидиму еғир чекиниш болған.

Телефонимизни қобул қилған ғулҗа наһийәсидики бир мәктәп мудири, өз мәктипидә ата-аниси еғир җазаланған 42 оқуғучи барлиқини баян қилиш билән бирликтә, бу балиларға қарита алаһидә сиясий тәрбийә" елип бериватқанлиқиниму ашкарилиди.

Бу мәктәпкә йеқин әтраптики бир аһалиләр кометитииң сақчиси, мәзкур 42 балидин 10 нәччисиниң өз тәвәликигә нопуслуқ икәнлики вә уларға "партийә вә һөкүмәттин үмидисизләнмәслик һәққидә тәрбийә елип барағанлиқи" ни ашкарилиди. Бу хадимму бу балиларниң кәйпияти вә оқуш нәтиҗисидә чекиниш болғанлиқини инкар қилмиди.

Сиясий көзәткүчи илшат һәсән әпәнди өткән һәптидики зияритимиз давамида, мәһбусларниң балилириниң ата-ана қойнидин айриветилишниң өзила уларниң роһийити вә истқбалиға қарита орнини толдурғини болмайдиған бир зиянкәшлик икәнликини тәкитлигән иди. Мустәқил тәтқиқатчи абдуришит нияз әпәнди болса бундақ "алаһидә тәрбийә" ләрниң омумий җәһәттин алғанда, хитай күткән нәтиҗини бәрмәйдиғанлиқини илгири сүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт