Ata-anisi éghir jazalan'ghan ghuljadiki bir bashlan'ghuch mektepte 42 oqughuchigha "Alahide siyasiy terbiye" bérilgen

Muxbirimiz shöhret hoshur
2021-08-20
Share
perishtiler-maktiwi-daqchi-charlash-tekshurush.jpg "Perishtiler" mektipi aldida tekshürüsh we charlash élip bériwatqan saqchilar. 2018-Yili 30-awghust, xoten.
AP

2017‏-Yildin buyan, Uyghur rayonidiki mekteplerde ata-anisi yaki uruq-tughqanliri tutqunda bolush asasen omumiyyüzlük ehwalgha özgirish bilen birlikte, ata-anisi éghir jazagha uchrighan bir qisim oqughuchilargha qarita mekteplerde "Alahide siyasi'iy terbiye" élip bériliwatqanliqi, buning aqiwitide mezkur oqughuchilarning rohiy keypiyati we oqush netijisde éghir mesile körüliwatqanliqi inkas qilinmaqta. Muxbirimizning bu inkaslargha asasen élip barghan éniqlashliri dawamida, ghulja nahiyesidiki bir bashlan'ghuch mektepte ata-anisi tutqunda bolghan 42 oqughchigha perqliq siyasiy terbiye élip bériliwatqanliqi we ularning ders netijiside éghir chékinish bolghanliqi ashkarilandi.

Uyghur rayonining ma'arip weziyitidin xewerdar kishilerdin biri radiyomizgha uchur yollap, ötken yilning béshida mekteplerge ata-anisi éghir jazalan'ghan oqughuchilargha "Alahide siyasiy terbiye" bérish heqqide bir uqturush chüshkenlikini inkas qildi. Déyilishiche, bu uqturushta ata-anisi éghir késiwétilgen oqughuchilargha teselliy bérish teshebbus qilin'ghan we bir tereptin bu balilarda hökümetke qarita naraziliq keypiyati shekillinip qélishining aldini élish telep qilin'ghan.

Téliponimizni qobul qilghan Uyghur rayonidiki ma'arip idarisining xadimliri bundaq bir uqturushning bar-yoqluqi heqqide melumat bérishni ret qildi.

Inkasta déyilishiche, mekteptiki bezi oqutquchlar özliri xataliship qalmasliq üchün bu balilargha bek ochuq-chirayda bolmighanliqi üchün bu ehwal balilarda éghir bésim peyda qilghan. Uning üstige mezkur terbiye mektepning siyasiy exlaq yétekchisi bilen ahaliler komitéti yaki kent saqchilirining hekarliqida élip bérilghachqa, bu "Ayrim söhbetler" herqanche siyliq-sipaye dawam qilsimu, bezi balilarda qorqunuch peyda qilghan. Téléfonimizni qobul qilghan yerkendiki bir mektepning siyasiy exlaq yétekchisi, özlirining ata-anisi éghir jazalan'ghan balilargha perqliq mu'amile qilmaydighanliqini ilgiri sürdi, emma ulargha ayrim "Terbiye" élip bérilidighanliqini inkar qilmidi.

Inkasta déyilishiche, ata-anisi éghir jazalan'ghan oqughuchilar mezkur "Alahide terbiye" ning netijiside, eslidiki derdige téximu dert qétilip, rohiy keypiyatida hessilep chüshkünlishish peyda bolghan we ders netijisidimu éghir chékinish bolghan.

Téléfonimizni qobul qilghan ghulja nahiyesidiki bir mektep mudiri, öz mektipide ata-anisi éghir jazalan'ghan 42 oqughuchi barliqini bayan qilish bilen birlikte, bu balilargha qarita alahide siyasiy terbiye" élip bériwatqanliqinimu ashkarilidi.

Bu mektepke yéqin etraptiki bir ahaliler kométiti'ing saqchisi, mezkur 42 balidin 10 nechchisining öz tewelikige nopusluq ikenliki we ulargha "Partiye we hökümettin ümidisizlenmeslik heqqide terbiye élip baraghanliqi" ni ashkarilidi. Bu xadimmu bu balilarning keypiyati we oqush netijiside chékinish bolghanliqini inkar qilmidi.

Siyasiy közetküchi ilshat hesen ependi ötken heptidiki ziyaritimiz dawamida, mehbuslarning balilirining ata-ana qoynidin ayriwétilishning özila ularning rohiyiti we istqbaligha qarita ornini toldurghini bolmaydighan bir ziyankeshlik ikenlikini tekitligen idi. Musteqil tetqiqatchi abdurishit niyaz ependi bolsa bundaq "Alahide terbiye" lerning omumiy jehettin alghanda, xitay kütken netijini bermeydighanliqini ilgiri sürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet