D u q hey'iti yawropa parlaméntida Uyghur mejburiy emgiki we xitayning chégra halqighan basturushlirini anglatqan

D u q ning yawropa parlaméntidiki pa'aliyiti jeryanida (ongdin) d u q re'isi turghunjan alawudun, yawropa parlaménti ezasi en'gin er'oghlu, zumret'ay erkin we dolqun eysalar. 2025-Yili 12-féwral, strasburg.

10-Féwraldin 12-féwralghiche, dunya Uyghur qurultiyining sabiq re'isi dolqun eysa, qurultay re'isi turghunjan alawudun, mu'awin re'isi zumret'ay erkin we qurultay teshwiqat komitétining mu'awin mudiri, d u q ning yawropa ittipaqidiki wakaletchisi gülbahar barzakowadin teshkillen'gen bir hey'et, yawropa parlaméntining strasburgdiki merkizide pa'aliyet élip bérip, bir qatar muhim uchrishishlarda bolghan.

Qurultay re'isi turghunjan alawudunning neq meydandin bildürüshiche, bu hey'et asasliqi nöwette taylandta tutup turuluwatqan 48 Uyghurni üchinchi bir bixeter döletke yötkesh üchün yawropa ittipaqini heriketlendürüsh, Uyghur mejburiy emgiki we xitayning chégra halqighan basturushlirigha birlikte taqabil turush, shundaqla bu heqte yawropa ittipaqigha eza döletlerning qollap-quwwetlishini qolgha keltürüshni meqset qilghan.

RFA/Hebibulla Izchi

Ziyaritimizni qobul qilghan d u q re'isi turghunjan alawudun ependi bu heqtiki tepsilatlarni radiyo anglighuchilirimiz diqqitige sundi.

D u q hey'iti bu qétimqi pa'aliyitide yawropa parlaméntining mu'awin re'isi we bu nöwetlik yawropa parlaméntining ezaliqigha yéngidin saylan'ghan bir qisim parlamént ezaliri bilen biwasite uchrashqan. Ular bu uchrishishlarda yawropa parlaméntida “Uyghur dostluq guruppisi” ni qaytidin qurup chiqish toghrisida iltimas we teklip-pikirlerde bolun'ghan. D u q ning mu'awin re'isi zumret'ay erkin bu heqte tepsiliy melumat bérip ötti.

RFA/Hebibulla Izchi

Zumret'ay erkinning bildürüshiche, yawropa parlaméntidiki bu qétimqi uchrishishlarning asasliq témiliridin biri, Uyghur mejburiy emgiki bolup, d u q hey'iti yawropa parlaméntining bundin burun mejburiy emgek heqqide chiqarghan ikki qanun we uning Uyghur mejburiy emgikige chétilghan xitay mehsulatlirigha qarita ijra qilinishi heqqidimu bezi teleplerde bolun'ghan.

D u q ning sabiq re'isi dolqun eysa ependimu neq meydandin ziyaritimizni qobul qilip, bu qétimqi pa'aliyetning meqsiti “Qurultayning bu nöwetlik re'islirini yawropa parlaméntigha tonushturush, Uyghur irqiy qirghinchiliqini toxtitish üchün yéngi chariler üstide izdinish” ikenlikini bildürdi.

RFA/Hebibulla Izchi

D u q hey'iti bu uchrishishlar dawamida yene yawropa ittipaqining xitay bilen bolghan tor sodisi, “Témo”, “Shéyin” qatarliq xitayning parche sétish supilirini yawropa ittipaqigha eza döletlerde cheklishi heqqidimu teleplerde bolghan. Shuning bilen bir waqitta yene nöwettiki dunya weziyiti, uning Uyghur herikitige körsitidighan tesiri we buningdin kéyinki heriket istratégiyesi heqqidimu muzakirilerde bolghan.

RFA/Hebibulla Izchi

D u q hey'itining yawropa parlaméntidiki bu qétimliq uchrishishliri heqqide slowakiyening yawropa parlaméntidiki ezasi mériyam léksman özining X hésabida, “Yawropa ittipaqi choqum shérikliri bilen dawamliq hemkarliship, xitayning chégra halqighan basturushliri, mejburiy emgek, Uyghurlar we bashqa az sanliq milletlerge yürgüzüwatqan jinayi basturushlirigha qarshi birlikte küresh qilishi kérek” dep yazghan.