Турпанда судин җәсити сүзүвелинған 3 яшлиқ балиниң ата-анисиниң лагерда икәнлики ашкариланди

Мухбиримиз шөһрәт һошур
2019-09-06
Елхәт
Пикир
Share
Принт
Тәрбийәләш лагеридикиләргә түрмидики мәһбусларға охшаш кийим кийдүрүлгән болуп, йиғин ечиватқан көрүнүш.
Тәрбийәләш лагеридикиләргә түрмидики мәһбусларға охшаш кийим кийдүрүлгән болуп, йиғин ечиватқан көрүнүш.
Social Media

Он күнниң алдида иҗтимаий таратқуларда җәсити судин сүзүвелинған бир нарәсидә балиниң син учури тарқалғаниди. Мухбиримизниң бу син учуридики йип учлириға асасән елип барған ениқлашлири давамида, бу балиниң турпанниң қарағоҗа йеза астанә кәнтидин икәнлики; исминиң пәрһат яки пәрух икәнлики айдиңлашти вә әмдила 3 яшқа киргән бу балиниң аниси атикәм вә дадиси турдигайитниң һәр иккисиниң нөвәттә лагерда икәнлики дәлилләнди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Һөрмәтлик радио аңлиғучилар, тарқалған видийолуқ учурда дейилиши вә көрситилишичә, йеши 3-4 яш әтрапидики бир нарәсидә бала қириқмо намидики бир кәнт яки мәһәллидин өстәң яки ериқта еқип кәлгән. Биз видийода гәп қилған аялниң шевисигә асасән, вәқәниң турпанда йүз бәргәнлик еһтималлиқини пәрәз қилдуқ. Телефонимиз қобул қилғанлардин турпан шәһәр қариғуҗа йезилиқ сақчи хадими судин җәсити сүзүвелинған балиниң астанә кәнтидин икәнлики вә исминиң пәрһат икәнликини баян қилди. Әмма у, бу балиниң йеши вә ата-анисиниң кимлики һәққидики соаллиримизға җаваб бәрмиди. Астанә кәнтидин телефонимизни қобул қилған хитай көчмәнлиридин бири, өзиниң 10 йил аввал хенәндин көчүп кәлгәнлики вә уйғурлар билән бир мәһәллидә олтуридиғанлиқини билдүрүш билән бирликтә, бу кәнттә судин җәсити сүзүвелинған балиниң исминиң пәрух икәнлики вә 3 яшларда икәнликини баян қилди. Әмма, у өзиниң уйғурлар билән бәк арилишип кәтмәйдиғанлиқини тилға елип, униң ата-анисиниң исми һәққидә мәлумат берәлмиди. У йәнә бу мәһәллидә йүздин артуқ кишиниң лагерда икәнликини ашкарилиған болсиму, әмма, шу йүз нәччә киши ичидә судин сүзүвелинған балиниң ата-анисиниң бар йоқлуқидин хәвәрсизликини ейтти. Биз, бу аһалә тәминлигән телефон номуриға асасән, алақидар бир аманлиқ хадимидин мәлумат соридуқ. Бу хадим; җәсити судин сүзүвелинған балиниң анисиниң исминиң атикәм, дадисиниң исминиң болса турдигайит икәнликини ашкарилиди. Униң ашкарилишичә, атикәм 3 йилдин буян, турдигайит болса бир йилдин буян йиғивелиш лагерида тутуп турулмақта. Турдигайит вә атикәмниң ениқ қайси лагерда икәнликидин хәвәрсизликини ейтқан бу хадим, улар лагердики мәзгилидә 3 яшлиқ пәрһат яки пәрухқа кимниң қараватқанлиқи һәққидә учур берәлмиди. Мәлум болушичә, турдигайит вә атикәм балиси суға чүшүп қаза қилғандин кейин, лагердин бир қетим чиқиш вә уруқ-туғқанлири билән көрүшүш пурситигә еришкән. Ениқлашлиримиздин турдигайитниң илгирики мәсилә тапшуруш йиғинлирида аталмиш хаталиқини иқрар қилғанлиқи үчүн лагерға әкетилгәнлики мәлум, әмма униңдин икки йил бурун лагерға әкетилгән атикәмниң немә үчүн тутулғанлиқи мәлум әмәс. Байиқи хитай аһалиниң баянлиридин мәзкур аилиниң 3 пәрзәнтлик икәнлики мәлум, әмма қалған икки пәрзәнтиниң нәдилики мәлум әмәс. 

Һөрмәтлик радио аңлиғучилар, өткән йилдин буянқи иҗтимаий ахбараттики учурларға асасән елип барған ениқлашлиримиз давамида, хотән вә қәшқәрдә рәхмутулла ширбақи вә әсма әхмәт қатарлиқ 4 нәпәр нарәсидә балиниң җәсити судин сүзүвелинған вә үстигә қайнақсу төкүвелип өлгәнлики вә уларниң ата-анисиниңму лагерда икәнлики дәлилләнгәниди.

Пикирләр (0)
Share
Толуқ бәт