Sulayman gu: "Uyghurlar toghriliq heq gep qilghanliqim üchün malaysiyadiki xitaypereslerning tehditige uchridim"

Muxbirimiz méhriban
2020-03-31
Élxet
Pikir
Share
Print
Sulayman gu özining twittér hésabatigha chiqarghan süret.
Sulayman gu özining twittér hésabatigha chiqarghan süret.
Social Media

Igilishimizche, yéqindin buyan xitay hökümitining malaysiyagha qaratqan siyasiy teshwiqati netijiside malaysiyada xitay hökümitining Uyghurlargha qaratqan basturush siyasitini yaqlaydighan bir türküm xitaypereslerning tordiki teshwiqatliri kücheygen. Ular xitay hökümitining Uyghur siyasitini tenqitligüchilerge qarita twitér qatarliq ijtima'iy taratqularda hujum qozghap, ulargha ashkara tehdit sélishqa bashlighan.

Nöwette amérikaning jorjiye uniwérsitétida doktor aspirantliqida oquwatqan sulayman gu ependi ijtima'iy taratqularda Uyghurlar mesilisini aktip anglitip kéliwatqan tunggan pa'aliyetchisidur.

Sulayman gu ependi radiyomiz ziyaritini qobul qilip, özining xitay we malay tilidiki tiwittér hésabida xitay hökümitining Uyghurlargha qaratqan basturush siyasitini eyibligenliki üchün malaysiyadiki xitayperes torkézerlirining hujumi we tehditige uchrighanliqini anglatti.

Sulayman gu ependining bayan qilishiche, uninggha hujum qilghan tor chomaqchiliri uning Uyghurlarning xitay hökümitining basturushigha uchrawatqanliqi heqqidiki yazmilirigha qarita torda inkas yézish arqiliq hujum qilghan.

Sulayman gu ependining bildürüshiche, malaysiyadiki xitayperes tor kézerler "Sulayman guning yazmiliri malaysiya dölitining menpe'etige ziyan yetküzidu" dep eyibligen. Ular yene malaysiyaliq tordashlarni sulayman guning xitay hökümitining Uyghurlarni basturuwatqanliqi heqqidiki yazmilirigha zerbe bérishke dewet qilghan.

Sulayman gu ependi tiwittérdiki xitayperes tor kézerlerning özige qilghan hujumi we tehditlik inkasliridin töwendiki xatirilerni yollap berdi.

Inkaslarda mundaq déyilgen: "Sulayman guning malay tilini öginishi siyasiy meqset üchün bolghan. U malaysiyadiki musulmanlar arisida Uyghurlarning basturuluwatqanliqi heqqidiki témini teshwiq qilish meqsitide malay tili ögen'gen. U xongkongluqlarni qollash namayishidimu mushu témini teshwiq qildi. U hazir malaysiyadiki köpligen xitay tilliq puqralarning xitaygha qarshi turmighanliqini körüp, özining bu teshwiqatini bashlighan. Bu xildiki xongkung we teywenni qollash namida élip bériliwatqan teshwiqatlar malaysiya puqralar arisida milliy öchmenlikni peyda qilidu. Bashqilarning xitaygha bolghan öchmenlikining malaysiya puqraliri bilen alaqisi yoq. Bu yerde 'xitay öchmenliki' tarqitishning néme zörüriyiti bar?! shunga tor bashqurghuchi uninggha oxshash kishilerni söhbet sorunidin chiqiriwetkendila andin malaysiyada tinchliq bolidu."

Sulayman gu ewetken inkaslarda yene xitayperes tor chomaqchilirining sulayman guning yazmilirini dawamliq élan qilishini tosush üchün uning üstidin malaysiyadiki xitay elchixanisigha erz qilish, hetta uni öltürüwétish teshebbusliri otturigha qoyulghan.

Bu xil inkaslarda yene mundaq déyilgen: "Uning a'ile arxipini bilidighanlar uning shexsiy matériyallirini bu yerge yollap qoyunglar. Bundaq ademni némishqa öltürüwetmeymiz? uni qasqanda pütün péti dümlep pishuramduq? uni malaysiyadiki xitay elchixanisigha erz qilip, bu shinjangliq térrorchini tutquzuwétishimiz kérek. Uning sözlirini ispat qilip toplap, malaysiyadiki xitay elchixanisining élxet adrésigha yollap béreyli."

Ziyaritimizning axirida sulayman gu ependi yene malaysiyadiki xitayperes tor chomaqchilirining bu xildiki hujumlirigha sel qarimasliq kéreklikini tekitlidi.

U sözide xitay hökümitining xelq'aradiki abruyi barghanche chüshüp kétiwatqan bügünkidek shara'itta malaysiyagha oxshash musulman döletlirige iqtisadiy menpe'et bérish usulini qolliniwatqanliqini, bu döletlerdiki xelqler arisida siyasiy teshwiqatini kücheytish arqiliq xitay hökümitining xelq'aradiki ijabiy obrazini saqlap qélishqa urunuwatqanliqini bildürdi.

Toluq bet