Aq saray: amérika hökümitining xitaygha qoyghan omumiy tamozhna béji 145 pirsent

Amérika hökümitining xitaygha qoyghan tamozhna béji bügündin tartip resmiy küchge ige bolup, aq saray emeldarining bildürüshiche bu bajning omumiy sani 145 pirsentke yetken. Bu san amérika prézidénti tramp tünügün xitaygha qarshi élan qilghan 125 pirsenttin yene 20 pirsent yuqiri iken.

Amérika CNBC téléwiziyesining peyshenbe küni bergen xewiride éytilishiche, aq saraydiki bir yuqiri derijilik emeldar mezkur téléwiziyening muxbirigha amérika hökümitining xitaygha qoyghan tamozhna bajlirining omumiy sanining emeliyette 145 pirsent ikenlikini bildürgen. Bu aq saray emeldarining chüshendürüshiche, bu omumiy san amérika prézidénti trampning tünügün élan qilghan 125 pirsent béjidin sirt, yene ilgiri zeherlik chékimlik féntanilgha munasiwetlik qoyghan 20 pirsent bajni qoshqanda jem'iy 145 pirsent bolidiken.

Xitay hökümiti amérika prézidénti tramp tünügün xitaygha 125 pirsent tamozhna béji qoyghandin kéyin bügün amérikagha qarshi yéngi tamozhna béji qoyidighanliqini élan qilmidi. Emma xitay hökümiti amérikagha birlikte qarshi turush meqsitide etrapidiki döletler bilen ayrim körüshüp ularning bu mesilide birlik-sep qurushini telep qilghan. Amérika birleshme agéntliqining bu toghrisida bergen xewiride éytilishiche, xitay hökümiti bir qanche kündin béri bashqa döletler bilen amérikagha qarshi birlik-sep qurushqa urun'ghan bolsimu, emma chong muweppeqiyetke érishelmigen. Xewerde bildürülüshiche, nurghun döletler xitay bilen birlik-sep qurup amérikagha qarshi turushni xalimighan.

En'gliye BBC téléwiziyesining xewirige qarighanda, awstraliye hökümiti xitayning ikki dölet birlikte amérikaning tamozhna béjigha qarshi heriket élip bérish teklipini ret qilghan iken. Xewerde éytilishiche, xitayning awstraliyediki bash elchisi shawchyen "amérikaning zomigerliki we bozek qilishigha" ikki döletning ortaq qarshi turushi “Birdin-bir yol” dep otturigha qoyghan. Emma awstraliye bash ministiri antoni albanéz buninggha jawaben, “Biz öz aldimizgha ish élip barimiz” dégen bolsa, awstraliye dölet mudapi'e ministiri bu mesilide “Xitay bilen qol tutushup” birge mangmaydighanliqini éytqan. Awstraliye dölet mudapi'e ministiri richard marlés, “Bu awstraliyening dölet menpe'etini qoghdash mesilisi, xitay bilen ortaq meydanda turush mesilisi emes” dep bildürgen.

Amérika prézidénti tramp ötken hepte awstraliyege 10 pirsent tamozhna béji qoyghandin kéyin awstraliye buningdin anche xosh bolmighan bolsimu, emma amérikagha qarshi tamozhna béji qoymay bu mesilini aq saray bilen söhbet qilish arqiliq hel qilish yolini tallighan idi. Birleshme agéntliqining xewiride éytilishiche, awstraliyedin bashqa yene hindistanmu xitay bilen bu mesile üstide hemkarlishishni ret qilghan. Xitay hökümiti sherqiy jenubiy asiya döletler birliki bilen alaqiliship, ular bilen amérikagha qarshi birlik-sep qurushqa tirishqan bolsimu, ulardin éniq sada chiqmighan. Shunga xitay hökümiti pütün küchi bilen yawropa birliki bilen bu mesilide hemkarlishishqa urunmaqta iken. Emma yaponiye we teywen qatarliq döletler bu mesilini amérika bilen söhbet qilish arqiliq hel qilish yolini tallighan.

Xitay hökümiti hazirghiche amérika bilen tamozhna béji mesilisini söhbet bilen hel qilish yolini tallimighan bolup, uning kéyinki qedemlirining néme ikenliki hazirghiche éniq emes iken. Emma xitay tashqi ishlar ministirlikining bayanatchisi lin jyen peyshenbe küni “Xitay hökümiti xitay xelqining qanunluq hoquqliri we menpe'etlirining mehrum bolushi, shundaqla xelq'araliq soda qa'ideliri we köptereplime soda sistémisining buzghunchiliqqa uchrishigha qarap turmaydu” dégen.