Amérika dölet mejliside 2 - qétimliq Uyghur medenyet küni ötküzüldi

16 ‏ - Iyul künidiki 2 ‏ - qétimliq uyghur medeniyet künige, amérika tashqi ishlar yardemchi ministiri David Cremer ependi, xelqara kechürüm teshkilatining washingtondiki mesuli T.Kumar Ependi, amérika tashqi ishlar ministirliqi xitay ishliri bölümining mesuli Suzan xanim we amérika dölet mejlisi tashqi ishlar komitétining heyet ezasi Hans - Joachim Hogrefe ependiler qatnashti.

 Bu pa'aliyet, amérika dölet mejlisining ezalirigha Uyghur medeniyitini tonushturush, bolupmu xitay da'irilirining nöwette Uyghurlarning medeniyitini, jungxu'a medeniyitining bir terkibi qismi qilip körsitip, ularning milliy kimlikini yoqitishni meqset qilghan siyasitini ashkarilash meqset qilin'ghan.

Amérika dölet mejlisi binasidiki yighin zalida ötküzülgen ikkinchi qétimliq Uyghur medeniyet küni, mezkür pa'aliyetning wujutqa chiqishi üchün chong küch serp qilghan, amérika dölet mejlisi kishilik hoquq guruppisining ali derijilik xadimi we amérika dölet mejlisi tashqi ishlar komitétining hey'et ezasi Hans - Joachim Hogrefe ependining échilish murasim sözi bilen bashlandi.

Murasimgha riyasetchilik qilghan amérika Uyghur birleshmisining bash katipi alim séyitof ependi xans ependining sözidin kéyin, Uyghur medeniyet - sen'itini namayen qilish üchün teyyarlan'ghan bu pa'aliyetning resmiy bashlan'ghanliqini élan qilish bilen birge, pa'aliyetke ishtirak qiliwatqan amérika dölet mejlisidiki barliq xadimlarning hemde Uyghur wetendashlarning medeniyet kéchilikini xushal - xuram ötküzüshini arzu qilip, Uyghur milliy herikitining rehbiri rabiye qadir xanimni sözge teklip qildi.

Rabiye qadir xanim sözini, Uyghur medeniyitini namayen qilish arqiliq Uyghurlarni tonutidighan, Uyghurlarning xitaydin tüptin perqlinidighan bir millet bolghanliqini ispatlaydighan bu künning tolimu ehmiyetlik ikenlikini we bundaq pa'aliyetning her yili bir qétim ötküzülüshini ümid qilidighanliqini ipadilep sözini axirlashturdi. Rabiye xanim alqishlar ichide, dangliq muzikant we naxshichi sultan muhemmet ependi Uyghur muqamlirini orunlap bérishke teklip qilip sehnidin chüshti.

Sultan akining tembur bilen orunlighan mungluq muqami, barliq tamashibinlarning qizghin alqishigha érishti. Muqam lérikisidin kéyin, rengga - reng Uyghur milliy sen'et kiyimliri bilen yasan'ghan qizlar, dolanche kiyin'gen yigitler sehnige liq tolup, lerzan samagha chüshti we Uyghurlarning nazirkom we chine usulini orunlap amérikiliqlarni heyran qaldurdi.

Bu qétimqi murasimgha amérika dölet mejlisidiki xadimlardin bashqa, murasimgha amérika tashqi ishlar yardemchi ministiri David Cremer ependi, xelq'ara kechürüm teshkilatining washin'gtondiki tarmiqining mes'uli T.Kumar Ependi we amérika tashqi ishlar ministirliqi xitay ishliri bölümining mes'uli Suzan xanimlar qatnashti.

Murasimda yene, amérikida yashawatqan Uyghurlar teripidin hazirlinip üstellerge tizilghan türlük mezzilik Uyghur ta'amliri, sangza we her xil tatliq ‏ - türümlardin ghizalan'ghan barliq méhmanlar Uyghur yémeklirining bekmu özgiche we mezzilik ikenlikini teriplidi.