23 - Mart qaraqash namayishi heqqide toluqlima melumatlar
Muxbirimiz shöhret hoshur xewiri
2008.05.29
2008.05.29
u0529-pmx1
Washin'giton pochtisida bildürülishiche, qaraqashtiki namayishqa qétilghanlarning sotlan'ghanliq xewirini, xongkongdiki démokratiye we insan heqliri merkizige bir xitay saqchisi ashkarilap qoyghan. Axbaratchilar, xoten hökümet da'iriliridin ehwal igiliginide, qaraqash namayishi heqqide melumat bérishni ret qilghan.
Biz aldinqi ayning béshida qaraqashtiki bir saqchi ponkitigha téléfon qilghinimizda, saqchi terep 23 - mart küni xoten shehiride ayallar namayish bolghan küni qaraqashtimu weqe chiqqanliqini étirap qilghan, emma weqeni kichiklitip körsetken yeni namayishqa toplan'ghan kishilerning terbiye bérip tarqitiwétilgenlikini bildürgen idi. Washin'giton pochtisidiki xewerde bildürülishiche, shu küni 500 kishilik bir namayish yüz bergen, saqchi terep bilen namayishchilar arisida toqunush kélip chiqqan؛ toqunushta 10 kishi yaridar bolghan. Bu melumatlar aldinqi ayda bizge bir radi'o anglighuchimiz yollighan imzasiz inkasta bildürülgen melumatlar bilen oxshash.
Saqchi terep eyni chaghda qolgha élin'ghan we tutulghanlar yoqluqini bildürgen idi.
Washin'giton pochtisi gézitining bügünki xewiride bildürülishiche, qaraqashtiki namayishta 27 kishi qolgha élin'ghan, bular 20 we 30 yash arisida, bularning ichide 3 nepiri ottura mektep oqughuchisi. Biz bu 3 neper oqughuchining tepsiliy ehwalini igilesh üchün qaraqash nahiyilik ma'arip idarisigha téléfon qilduq. Ma'arip idarisi 23 - mart weqesige oqughuchilar qétilghanliqini inkar qildi, emma nahiyilik 1 - ottura mektepke téléfon qilghinimizda, ular weqeni étirap qildi, emma u 3 oqughuchining 1 - ottura mektep oqughuchisi emeslikini ashkarilidi. Mektep mes'ulining bildürüshiche, 23 - mart namayishidin kéyin ular oqughuchilar arisida, jem'iyet amanliqi, milletler ittipaqliqi we atizm terbiyisini kücheytken.
23 - Mart ayallar namayishida ayallarning romal artishni chekleshke qarshi turush asasliq shu'ar bolghan idi, qaraqashtiki namayishta bolsa؛ diniy telim - terbiye sorunlirini chekleshke qarshi turush asasliq shu'ar bolghan.
Köp körülgen xewerler
RFA
- Rézhissor ikram nurmemet térrorluq bilen eyiblinip 6 yérim yilliq késiwétilgen
- Ukra'inada “Uyghurlarning mustemlike qilinishi we ukra'inlarning teqdiri” dégen témida söhbet élip bérilghan
- “Xitay gulagidin hayat qélish” namliq kitab “Aldinqi front edebiyati mukapati” gha érishti
- Yawropa parlaménti qararname maqullap xitay hökümitidin jaza lagérlirini taqashni telep qildi
- Mehmud qeshqeri we hüseyin tejelli heykilining chéqiwétilgenliki delillendi