كۆرۈنۈشلەردىن مەلۇم بولۇشىچە، ھەر كۈنى يۈزلەرچە كىشى تۇتۇپ تۇرۇش مەركىزىنڭ ئالدىدا توپلىشىپ تۇرۇپ كىرىپ - چىققۇچىلاردىن ئۆز پەرزەنتلىرى ياكى قېرىنداشلىرى ھەققىدە ئۇچۇر ئىگىللىمەكتە.
5 - ئىيۇل ۋەقەسى يۈز بەرگىنىگە 5 ئايدىن ئاشقان بولسىمۇ، بەزى ئائىلىلەر ھازىرغىچە تۇتقۇنلارنىڭ ئىز - دېرىكى ھەققىدە ئۇچۇر ئالالمىغان. ئاشكارىلىنىشىچە، 5 - ئىيۇل تۇتقۇنلىرى تۇتۇپ تۇرۇش مەركىزىدىكى باشقا تۇتقۇنلارغا نىسبەتەن پەرقلىق، يەنى تېخىمۇ قاتتىق مۇئامىلىگە دۇچ كەلگەن.
بىر خانىمنىڭ ئىنكاس قىلىشىچە، 10 - ئاينىڭ ئوتتۇرىلىرىغا قەدەر 5 - ئىيۇل تۇتقۇنلىرى باشقا تۇتقۇنلارغا نىسبەتەن يېمەك - ئىچمەك قاتارلىق شەرت - شارائىت مەسىلىسىدە چەكلىمىگە ئۇچرىغان.
بۇ قېتىمقى تۇتقۇندا بەزى ئائىلىلەردە ئاكا - ئۇكا، دادا - بالا تۇتقۇن قىلىنغان ھەتتا بەزىلەر ئائىلە بويىچە تۇتقۇن قىلىنغان.
ئاشكارىلانغان مەلۇماتلار ئىچىدە دىققەتكە سازاۋىرى تۇتقۇنلارنىڭ ياش مەسىلىسىدۇر.
'ئىختىيارى مۇخبىر' جەمئىي 4 كىشىنى زىيارەت قىلغان، بۇلارنىڭ ئىچىدە 3 كىشى تۇتۇلۇپ كەتكەن بالىلىرىنىڭ 15 ياشلىق ئۆسمۈرلەر ئىكەنلىكىنى بىلدۈرگەن. بۇ سۆھبەتتىكى ئاۋازلاردىن، بىر كىشىنىڭ بالىسىنىڭ تېخى 13 ياشلىق ئۆسمۈر ئىكەنلىكى مەلۇم بولماقتا. شۇنداقلا، مانا بۇ مەلۇماتلاردىن، 5 - ئىيۇل تۇتقۇنلىرى ئارىسىدا 15 ياش ئەتراپىدىكى ۋە 15 ياشتىن تۆۋەن ياشتىكى تۇتقۇنلار سانىنىڭ ئاز ئەمەسلىكى ئاشكارىلانماقتا.
خىتاي، 5 - ئىيۇل ۋەقەسىنى قانۇنغا ئاساسەن بىر تەرەپ قىلىۋاتقانلىقىنى بىلدۈرمەكتە. ئەمما ئۇيغۇر تەشكىلاتلىرى بولسا، خىتاينىڭ 5 - ئىيۇلدىن كېيىنكى تۇتقۇن ۋە باستۇرۇش ھەرىكەتلىرىنى قانۇنغا ئاساسەن ئەمەس ھۆججەتكە ئاساسەن يەنى سىياسىي بۇيرۇق بويىچە ئىجرا قىلىۋاتقانلىقىنى ئىلگىرى سۈرمەكتە.
يۇقىرىدىكى ئاۋاز ئۇلىنىشىدىن، بۇ ھەقتىكى مەلۇماتىمىزنىڭ تەپسىلاتىنى ئاڭلايسىلەر.