Маралбешидики һуҗумда хитай муһапизәтчи, йеңиериқтикидә хитай мәктәп мудири өлтүрүлгән

Биз алдинқи һәптә бу һәқтики программимизда, охшаш вәқәниң арал йезисидин башқа йәнә йеңи ериқ йезисида вә маралбеши наһийисидиму арқа-арқидин йүз бәргәнлики һәққидә мәлумат бәргән идуқ. Биз бүгүн мәзкур зәнҗирсиман вәқәләргә алақидар йәнә бир қисим йеңи мәлуматларға игә болдуқ. 

11 ‏-Айниң 12 ‏-күни йеңишәһәр наһийисиниң арал йезисида йүз бәргән хитай көчмәнлирини өлтүрүш вәқәси ; даириләр тәрипидин давамлиқ түрдә сир тутулмақта. Игилишимизчә, аралдин бир ай бурун йеңи ериқта, бир һәптә кейин маралбешида йүз бәргән хитай көчмәнлиригә һуҗум қилиш вәқәлири бир-биригә четишлиқ болуп, һуҗумларни қәшқәр вилайитидики намәлум бир сиясий тәшкилат елип барған икән. Қәшқәр вилайәтлик сақчи идарисидики мәлум бир хадимниң ашкарилишичә, йеңи ериқтики һуҗумда өлгән икки нәпәр хитай көчмән йезидики оттура мәктәпниң мудири вә униң аяли икән. Маралбешида өлтүрүлгини болса маралбеши базиридики бир сода базириниң муһапизәтчиси икән.

Игилинишичә, һуҗумчилар вәқә җәрянида пичақ, хәнҗәр, төмүр калтәк вә амбур қатарлиқ әсвабларни қолланған. Улар паалийәтлирини изчил давамлаштуруш вә тәшкилатини күчләндүрүш үчүн; вәқә пәйда қилиш җәрянда хитай көчмәнлирини өлтүрүш билән бирликтә уларниң пул вә пулға яриғудәк мал-мүлкини елип барған паалийитиниң олҗиси сүпитидә топлиған.

Мәзкур тәшкилат, әйни мәқсәттә маралбеши базиридики бир зибу-зиннәт буюмлири дукиниға кечидә йошурун киришкә уруниватқанда, әтрапта базарниң бир хитай муһапизәтчиси пәйда болған. Буниң билән һуҗумчилар, из қалдурмаслиқ һәм тутулуп қелиштин сақлиниш үчүн бу муһапизәтчиниму өлтүргән.

Радио аңлиғучилиримизниң инкас қилишичә, бу вәқәләр бу йил 9 ‏-айниң 18,күни ақсуниң игәрчи йезисида йүз бәргән хитай чарлаш хадимлириға һуҗум қилиш вәқәси биләнму четишлиқтур. Вәқәдә қоллинилған қорал вә вәқә йүз бәргән орундин қариғанда, бу тәшкилат әзалириниң олимпик мәзгилидә қәшқәрниң яманяр вә пәйзиватниң қизилбуя йезисида йүз бәргән вәқәләрдики һуҗумчиларниң қораллири арисида охшашлиқ мәвҗут.  Буниңдин қариғанда шу йиллардики һуҗумчилар билән һазирқилар арисида, күрәш ғайиси вә күрәш методи җәһәттә ортақлиқ барлиқи байқалмақта. Олимпик мәзгилидики қизилбуя вә яманяр вәқәлиридә һуҗумчилар асаслиқи пичақ вә хәнҗәр билән һуҗум елип барған. Шу қетимқи вәқәләр һәққидә пәйзиват наһийисиниң сақчи башлиғи мундақ мәлумат бәргән иди:

Қизилбуя вә яманяр вәқәлиридә хитай үчүн вәзипә өтәватқан уйғур қоғдаш хадимлири өлтүрүлгән; әмма хәвәрләрдә бу һуҗумларниң шу чағда пиланлиқ әмәс, бәлки тосалғуға вә хәвп-хәтәргә йолуққанда амалсизлиқтин елип берилғанлиқи йезилған иди. Бу қетимқи арал, йеңи ериқ вә маралбеши вәқәлириниң һеч биридә уйғурлардин өлгән вә яриланғанлар болмиған.

Уйғур һуҗумчилар 2008 ‏-йилидин буянқи һәрикәтлиридә асаслиқи хитай қораллиқ қисимлири вә һөкүмәт органлириға һуҗум қилип кәлгән. Бу қетимқи һуҗумларда хитай пуқралириниң мәхсус һуҗум нишани болғанлиқи байқалмақта. Әмма хитай пуқралириниң һуҗум нишани болуши, һуҗумчиларниң қорал җәһәттин аҗиз болғанлиқи үчүнму вә яки хитай көчмәнлирини, уйғурларниң келәчәк мәнпәәти үчүн хитай қораллиқ қисимлиридинму хәтәрлик дәп қариғанлиқи үчүнму? бу нуқта һазирчә ениқсиз һаләттә турмақта.