Afghanistanning weziyitini yaxshilash üchün puqralarning hoquqigha ehmiyet bérish tekitlenmekte
Muxbirimiz eqide
2010.01.07
2010.01.07

AFP Photo
Afghanistanda yüz bériwatqan bu xil zorawanliq heriketlirining kündin - kün'ge küchiyiwatqanliqini tekitligen birleshken döletler teshkilatining afghanistandiki wekili key aydé, weziyetni yaxshilash üchün yalghuz herbiy küchkila tayanmastin, puqralarning hoquqini muhim orun'gha qoyush asasidiki pirinsiplardin paydilinishni otturigha qoydi.
Birleshken döletler teshkilatining afghanistandiki wekili key aydé, afghanistan'gha herbiy küch we iqtisadiy yardem bériwatqan döletlerning, nöwette afghanistan weziyitide héchqandaq özgirish körmeywatqanliqini, afghan xelqi bolsa özlirige bérilgen wedilerning ishqa ashmaywatqanliqini inkas qiliwatqanliqini bildürüp, bu pikirlerni b d t bixeterlik kéngishida otturigha qoyghanliqini bildürdi.
Afghanistan bixeterlikige tehdit boliwatqan mewjut mesililer hel qilinmay, mushu shekilde dawamlishiwerse ehwalning perez qilghili bolmaydighan derijide éghirliship kétidighanliqini tekitligen key aydéning neziride afghanistanda yüz bériwatqan zorawanliq heriketlirini yalghuz herbiy küch bilen toxtitip qalghili bolmaydiken.
Key aydé buning üchün, bu dölette puqralarning hoquqini küchlendürüshke alahide ehmiyet bérish kéreklikini hemde yene rayonda jeng qiliwatqan guruhlar bilen muresse qilishni, jümlidin tégishlik charilerni qollinish, bolupmu talibanlar bilen di'alog qurushning intayin zörür ikenlikini bildürdi.
Fransiye agéntliqining 7 - yanwardiki xewiride bildürülishiche, afghanistanning sherqidiki xost wilayitidiki hökümet idarisining yénida bomba partlap, xost wilayitining walisi toxir xan sabariy we bir qanche hökümet xadimliri yarilan'ghan. Buningdin sirt yene paktika wilayitining gérdéz shehiride özini öltürüwélish xaraktérlik hujumda 8 kishi ölgen 24 nepiri yarilan'ghan.
Shu küni kéchisi yene xost wilayitidiki bazarda oxshashla partlash yüz bérip 9 kishi ölgen, buningdin bir hepte ilgiri amérika herbiy bazisi ichige basturup kirgen hujumchining özini partlitishi netijiside 7 neper herbiy xadim hayatidin ayrilghan idi.
Afghanistandiki hujumlarda hetta balilar qaza qilghan bolup, bu xil éghir weziyetler tüpeyli 28 - yanwar küni londonda, afghanistan mesililiri boyiche xelq'ara yighin chaqirilmaqchi bolup, en'giliyining afghanistandiki elchisi mark layal grantning bildürüshiche, mezkur yighinda asasliq üch muhim nuqta yeni afghanistanning bixeterliki, tereqqiyati shuningdek dölet bashqurushi qatarliq mesililer muzakire qilinidiken.
Afghanistanning weziyitini yaxshilash heqqide Uyghur siyasetchilirimu öz qarashlirini otturigha qoydi.
Yuqiridiki awaz ulinishidin, bu heqtiki melumatimizning tepsilatini anglaysiler.