“Sherqiy türkistan Uyghur aliy kéngishi” türkiye metbu'atlirida

Türkiye anatoliye xewer agéntliqining tor bétide élan qilin'ghan “Uyghur xelqining kélechiki heqqide amérikida muzakire élip bérilmaqchi” mawzuluq xewer türkiyidiki nurghun axbarat wasitiliride köchürüp élan qilindi. “Xaber türk” gézitidiki bu heqtiki xewerde mundaq déyilgen: Uyghur türkliri bir biri bilen bolghan oxshimaydighan köz qarashlirini bir terepke qayrip qoyup, tunji qétim oxshimaydighan köz qarashtiki kishiler bir yerge jem bolup, Uyghurlarning kélechiki heqqide yol xeritisi sizmaqchi.

Bu xewerde yene dunya Uyghur qurultiyi re'isi rabiye qadir xanim bilen élip barghan söhbetkimu yer bérilgen bolup, rabiye qadir xanim bayanatida dunyadiki oxshimaydighan köz qarashtiki Uyghurlarning tunji qétim bir yerge jem bolup, musteqilliqqa érishishning yolliri heqqide muzakire élip bérip, Uyghurlarning kélechiki heqqide yol xeritisi sizidighanliqini éytqanliqini yazghan.

“Xaber türk” gézitide 23-may küni élan qilin'ghan xewerde yene, bu yighinning échilish murasimining amérika kon'grés binasidiki zalda échilidighanliqi, bu yighin'gha 20 dölettin köp sanda Uyghur wekilning qatnishidighanliqi amérika parlamént ezaliriningmu söz qilidighanliqi yézilghan.

Xewerde yene buningdin kéyin sherqiy türkistan dawasi üchün téximu sistémiliq pilanliq estayidil xizmet qilish kérekliki, chünki Uyghur türklirining bügün zor xewp astida ikenliki tekitlen'gen.

Sherqiy türkistan Uyghur aliy kéngishi qandaq bir yighin? türkiyidiki Uyghurlar we türkler bu yighindin némilerni kütmekte?