Qirghizistan prézidénti almasbék atambayéw qesem murasimigha kelgen xitay wekili isma'il tiliwaldini qobul qilmighan

Murasimgha qirghizistanning her qaysi jayliridin kelgen 1200 neper wekil hemde chet ellik méhmanlardin türkiye prézidénti abdulla gül, gruziye prézidénti mixa'il sakashwili, qazaqistan bash ministiri kirim mesimuw, xitay xelq qurultiyi da'imiy komitétining mu'awin bashliqi isma'il tiliwaldi, tajikistan, chéchenistan, tataristan bash ministirliri shundaqla amérika, rusiye, özbékistan, mongghuliye, iran, koriye, qatarliq döletlerning hemde birleshken döletler teshkilati, yawropa xewpsizlik we hemkarliq teshkilati, yawropa parlaméntigha oxshash xelq'araliq organlarning yuqiri derijilik rehberliri, her qaysi döletlerning qirghizistanda turushluq elchiliri qatnashti.

Murasim sa'et 11de qirghizistan dölet gimini sadasi ichide bashlandi. Aldi bilen söz qilghan roza otunbayéwa almasbék atambayéwni yéngi xizmiti bilen tebrikligendin kéyin, özining ötkünchi mezgilning prézidénti bolup turghan bir yérim yildin köprek waqit dawamida, qirghizistan duch kelgen barliq siyasiy we iqtisadi qiyinchiliqlargha taqabil turushta, bolupmu qirghizistanning parlaméntliq siyasiy tüzülmige ötüshide özini qollap medet bergen barliq qirghizistanliqlargha hemde her qaysi döletler we xelq'araliq teshkilatlargha semimiy minnetdarliqini bildürdi.

Qesem bérip qirghizistan prizidénitliqi wezipisini tapshurup alghan almasbék atambayéw öz sözide, qirghizistan eng éghir sinaqlargha duch kelgen mezgillerde, özining eqil - parasiti, yiraqni körerliki hemde mol siyasiy bilimi bilen döletni parchilinip kétishtin saqlap qalghini, hakimiyetning saylam arqiliq tinch yol bilen ötküzüp bérilishige körsetken tirishchanliqi üchün roza otunbayéwagha pütün qirghizistan xelqi namidin rehmet éytti. U öz sözide, nöwette ilip bériliwatqan siyasiy we iqtisadi islahatlarni qet'iy dawamlashturidighanliqini, hakimiyetning her qaysi tarmaqlirigha chongqur yiltiz tartip ketken chiriklik we parixorluqqa qarshi keskin tedbirlerni qollinidighanliqini, xelqning turmush sewiyisini yuqiri kötürüsh, iqtisadni güllendürüsh hemde chet'el meblighini jelp qilishqa shundaqla yawru - asiya tamuzhna - baj ittipaqigha kirishke tosqun boluwatqan oshuqche belgilimilerning emeldin qaldurulidighanliqini bildürdi.

Qirghizistanning tashqi siyasiti heqqide toxtalghan almasbék atambayéw rusiye bilen bolghan qérindashlarche hemkarliqning buningdin kéyinki qirghizistan tashqi siyasitining asasi bolidighanliqini, türki tilliq döletler we xelqlerning dostluq - ittipaqliqni hemde amérika bashliq gherb démokratik elliri bilen bolghan dostane munasiwetlerning dawamliq güllinishi üchün tirishchanliq körsitidighanliqini ipadilidi.

Qesem bérish murasimi ayaghlashqandin kéyin almasbék atambayéw hökümet binasi aldigha kélip, qirghizistan qoralliq küchlirining bash qomandani süpitide, qirghizistan armiyisi milliy giwardiyesining herbiy paratini qobul qildi.

30 - Öktebirde ötküzülgen saylamning we 1 - dékabirda bolghan qesem bérip prézidéntliqni tapshuruwélish murasimining ongushluq bolushi xelq'ara jama'etchilik hemde qirghizistanliqlarda omumyüzlük yaxshi tesirat qaldurdi. Atambayéwning wezipe tapshuruwalghandin kéyinki nutqida memliketning ma'arip, sehiye, edliye shundaqla tamozhna tarmaqlirida bolupmu sot sistémisida saqliniwatqan éghir parixorluq qilmishlirigha qattiq zerbe bérish lazimliqi heqqidiki bayanliri jama'etchilik arisida qirghizistanning kelgüsige nisbeten zor ümid we ishench peyda qildi.

Halbuki atambayéwning wezipe tapshuruwélish nutqida xitayni tilgha élip qoymighanliqi hemde 2 - dékabir qesem bérish murasimigha kelgen köpligen chet ellik méhmanlar bilen körüshüp, yalghuz xitay xelq qurultiyining mu'awin bashliqi isma'il tiliwaldini qobul qilip qoymighanliqi közetküchilerning diqqitini qozghighan bir nuqta bolup qaldi. Tehlilchiler qirghizistanning tashqi siyasitide melum özgirishlerning barliqqa kélidighanliqini, burunqi chong döletler arisida tengpungluqni saqlash siyasitining ornigha qirghizistanning buningdin kéyin barliq sahelerde rusiye bilen istratégiyilik shériklik munasiwitini yolgha qoyidighanliqini hemde xitayning iqtisadi kéngeymichilikige taqabil turush meqsitide ottura asiya döletlirini öz ichige alghan tamozhna - baj ittipaqi qurushqa intiliwatqan rusiyining ishenchlik ittipaqdishi bolup qalidighanliqini qeyt qilishmaqta.