Amérika awam palata ezasi kiristofér smit arzugül mesilisi heqqide xitaygha naraziliq xéti yazdi

Amérika awam palata ezaliridin Christopher Smith arzugül tursun mesilisi heqqide xitay hökümitige naraziliq bildürdi. U naraziliqida, xitay hökümitini wehshilikni toxtitishqa, yeni arzugül tursun'gha qarita élip bérilmaqchi bolghan bala chüshürüsh opératsiyisidin waz kéchishke chaqirdi.
Muxbirimiz shöhret hoshur
2008-11-14
Élxet
Pikir
Share
Print
Amérika awam palata ezaliridin Christopher Smith arzugül tursun mesilisi heqqide xitay hökümitige naraziliq bildürgen bolup, süret, Smith ependining xitay hökümitini wehshilikni toxtitishqa, yeni arzugül tursungha qarita élip bérilmaqchi bolghan bala chüshürüsh opératsiyisidin waz kéchishke chaqirghan bayanatining öz tor bétidiki körünüshi.
Amérika awam palata ezaliridin Christopher Smith arzugül tursun mesilisi heqqide xitay hökümitige naraziliq bildürgen bolup, süret, Smith ependining xitay hökümitini wehshilikni toxtitishqa, yeni arzugül tursungha qarita élip bérilmaqchi bolghan bala chüshürüsh opératsiyisidin waz kéchishke chaqirghan bayanatining öz tor bétidiki körünüshi.
www.chrissmith.house.gov

Christopher Smith Amérika hökümiti dölet mejilisining xitay ishliri komitétining mes'ulidur. U bu naraziliqini tünügün chüshtin kéyin, xitayning washin'giton bash elchisi Zhou Wenzhong gha yetküzdi.

Christopher Smith Ning naraziliq bayanatida mundaq déyilidu: " nöwette Uyghur ayal arzugül tursun doxturxanida nazaret astida turuwatidu we bala chüshürüshtin ibaret qorqunchluq bir opératsiyini kütüp yatidu. Men xitay hökümitining bu opératsiyini qilmasliqini telep qilimen."
" Amérika hökümiti we insan heqliri teshkilatliri arzugülning ehwalini hem uning a'ile - tawabatining ehwalini dawamliq közitip mangidu."

Pilanliq tughut xitayda 80 ‏ - yillardin bashlap, Uyghur rayonida bolsa 90 ‏ - yillardin bashlap qattiq yolgha qoyulmaqta. Deslepki yillarda pilanliq tughut xitayda döletning tüp siyasiti süpitide ijra qilin'ghan bolsa, 2002 ‏ - yildin bashlap qanunlashturulghan. Xitayning pilanliq tughut qanunida, pilandin artuq hamilini a'ililerning ixtiyari bilen éliwétishke bolidighanliqi emma mejburiy éliwétishke bolmaydighanliqi belgilen'gen.

Mana bu belgilime seweblik birleshken döletler teshkilati xitaygha nopus süpitini östürüsh pilani buyiche yardem pul ajratqan we xitayning bu yardem pulni pilanliq tughutni yolgha qoyush jeryanida ana - balilarning salametlikini qoghdash üchün ishlitishini shert qilghan.

Mana ehwalni nezerde tutqan Christopher Smith naraziliq bayanatida mundaq deydu: "mejburiy bala chüshürüshtin ibaret bu wehshiyane heriket xitayda yéngi weqe emes؛ emma xitay merkizi hökümiti bügün'ge qeder bu xil ehwallarni inkar qilip kelgen. Bu qétimqi opiratsiye xitayning bu jehettiki saxtipezlikini, bolupmu birleshken döletler teshkilati teripidin xitaygha bériliwatqan nopus süpitini östürüsh yardimining qandaq orun'gha ishlitiliwatqanliqini dunya jama'etchilikige ashkarilaydu."

Christopher Smith Bayanatini mundaq axirlashturidu: " amérika hökümiti we insan heqliri teshkilatliri arzugülning ehwalini hem uning a'ile - tawabatining ehwalini dawamliq közitip mangidu."

Arzugül tursunning ehwali bügün xelq'ara metbu'atlarda keng orun aldi. Amérikida chiqidighan Mcclatchy gézitining béyjingda turushluq muxbiri bügün su derwaza doxturxanisigha téléfon qilip ehwal igiligen, arzugül a'ilisi muxbirgha özlirining doxturxanigha mejburiy élip kélin'genlikini we toxtamgha mejburiy qol qoyghanliqini bildürgen.

Muxbir séstiralardin ehwal igiligende séstralar eslide bala chüshürüsh opératsiyisining peyshenbe küni élip bérilishi kéreklikini, lékin xelq'aradin kelgen téléfonlar seweblik opératsiyini düshenbige kéchiktürgenlikini bildürgen.

Arzugül tursun we uning hamilisining ehwaligha xelq'ara jama'etning diqqet ‏ - étibari kündin ‏ - kün'ge ashmaqta. Emma yerlik da'iriler öz hoquq we menpe'etini qoghdash üchün bala chüshürüsh opiratsiyiside dawamliq ching turmaqta.

Bu ehwalgha, arzugül tursunni doxturxanigha oz qoli bilen aparghan bulaq kent partiye yachéyka sékritari reshidemu pikrini bayan qildi.

Hörmetlik oqurmenler, arzugül tursunning ehwali heqqide kéyinki programmilirimizda dawamliq melumat bérimiz.



Toluq bet