Amérika Uyghurliri birleshmisi yéngi yilni kütüwaldi

Amérika Uyghurliri birleshmisi bilen xelq'araliq démokratiye we kishilik hoquq fondi-jem'iyiti 31-dékabir küni yéngi yilni kütüwélish murasimi ötküzdi. Uyghurlar bir yerge jem bolup, 2012-yilini uzitip, yéngi 2013-yilini kütüwaldi.
Muxbirimiz ümidwar
2013.01.01
yengi-yil-2013-305.jpg Amérika Uyghurliri birleshmisi idare hey'itining orunlashturushi bilen ötküzülgen yéngi yilni kütüwélish pa'aliyitidin körünüsh. 2012-Yili 31-dékabir, washin'gton.
RFA
u0101-pmn1.mp3
Anglash Awazni köchürüsh

Uyghur milliy naxsha -muzikiliri ichide ötküzülgen kona yilni uzitip yéngi bir yilni kütüwélish köngül échish pa'aliyitige paytext washin'gton etrapidiki wirginiye, maryland shtatliri hemde nyu-york, néwjérsiy we bashqa jaylardin kelgen chong -kichik bolup 300 etrapida Uyghur qatnashti.

Miladiye 2012-yilini uzitip, 2013-yilini kütüwélish pa'aliyitige riyasetchilik qilghan amérika Uyghurliri birleshmisining re'isi alim séyitof ependi köpchilikning yéngi yilini tebriklidi shuningdek köpchilikning yéngi 2013- yilida közligen meqsetlirining emelge éshishi, ishlirining ongushluq, tenlirining salamet bolushini tilidi. Uyghur milliy herikitining rehbiri rabiye qadir xanimmu murasimgha kélip, köpchilik bilen didarliship, yéngi yilni tebriklidi.

Miladiye 2013-yilini kütüwélish murasimida yash-ösmürlerning pa'aliyetlirigimu alahide ehmiyet bérildi. Heweskar naxshichi juneydin salahidin özining mungluq “ Uyghur qizi” namliq naxshisi bilen köpchilikning könglini hayajanlandurdi. Yash talantliq ussulchilar özliri teyyarlap kelgen milliy usullirini ishtirakchilarning huzurigha sundi. Bolupmu, ösmürlerning birlikte oynighan shox usulliri hemmini söyündürdi.

Ziyaritimizni qobul qilghan alim séyitof ependi bu qétimqi yéngi yil pa'aliyitining ötken qétimqidin melum derijide perqliq ötküzülgenlikini, yeni yashlarning pa'aliyetlirige köprek ehmiyet bérilgenlikini bildürdi.

Amérika Uyghurliri birleshmisining mu'awin re'isi ilshat hesen ependi bu qétimqi pa'aliyetning nahayiti köngüllük bolghanliqi hemde buning üchün idare hey'itining xéli waqit teyyarliq qilghanliqini tekitlidi. Ilshat hesen ependi sözide yene, amérika Uyghurliri birleshmisining 2013-yili bir qatar pa'aliyetlerni ötküzüshke alahide ehmiyet béridighanliqi, yeni, ghulja, barin, ürümchi we bashqa jaylarda yüz bergen weqelerni xatirilep, qurbanlarni eslesh pa'aliyetlirinimu kücheytidighanliqi, shuningdek yene 12-noyabir sherqiy türkistan jumhuriyet küni pa'aliyitigimu ehmiyet bérip, yash ewladlargha qaritilghan öz millitining shanliq ötmüsh -tarixi, medeniyiti we milliy hem diniy kimlikini kücheytish terbiyilirigimu ehmiyet béridighanliqini eskertti.

Bu qétimqi yéngi yilni kütüwélish pa'aliyitining lezzetlik Uyghur ta'amliri yéqimliq Uyghur muzikiliri bilen birliship, kishilerge huzur béghishlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.