B d t tinchliq saqlash qisimliri qurulghanliqining 60 yilliqi xatirilendi

29 - May birleshken döletler teshkilati tinchliq saqlash qisimliri qurulghan kun. Tünügün birleshken döletler teshkilatining nyuyork shehiridiki bash shitabida birleshken döletler teshkilati tinchliq saqlash qisimliri qurulghanliqining 60 yilliqi xatirilendi.
Muxbirimiz jüme xewiri
2008-05-30
Share

 Birleshken döletler teshkilati tinchiq saqlash qisimliri bundin 60 yil muqeddem, yeni 1948 - yili mayda qurulghan bolup, 2001 - yili birleshken döletler teshkilati omumi yighini teripidin 29 - may küni dunyaning her qaysi jaylirida tinchliq saqlash wezipisi ötigen hemde bu jeryanda hayatini qurban qilghan oghul - qiz eskerlerge hörmet bildürüsh küni qilip békitkendin buyan bu kün birleshken döletler teshkilatida her yili tebriklinip kelmekte.

Birleshken döletler teshkilati élan qilghan axbaratlargha qarighanda, birleshken döletler teshkilatining tinchliq saqlighuchi eskerlirining sani 110ming neperdin artuq bolup, ular hazir dunyadiki niza qaplighan rayonlarda wezipe ötmekte iken.

Xewerde körsitilishiche, 29 - may birleshken döletler teshkilati tinchliq saqlash qisimlirigha mes'ul mu'awin bash katip ji'an mari'e gu'éhnnoning bashchiliqida, birleshken döletler teshkilatining bash shtabi aldigha ötkenki 60 yil jeryanida tinchliq saqlash wezipisi üchün jénidin ayrilghan 2400 neper tinchliq saqlighuchi uchun gül chembirek qoyush murasimi ötküzülgen.

Birleshken döletler teshkilati tinchliq saqlash qisimliri 60 yildin buyan urush oti ichide qalghan rayonlargha bérip tinchliq saqlap, ichi - tashqi urush sewebidin xeter astida qalghan millet yaki xelqni qoghdash wezipisini ötep dunya jama'etchilikining tinchliqi üchün nurghun töhpilerni qoshqan.

Tinchliq saqlash qisimliri informatsiye bölümidiki xadim do'uglas kofman ependi, mezkur teshkilatning 60 yildin béri dunyaning nurghun rayonlirida her xil tinchliq saqlash wezipilirini ötigenlikini, buning bezide ikki dölet arisidiki urushlargha arilishish shekilde, bezide melum bir dölette yüz bergen ichki urush otida qalghan ikki terep arisida kélishtürüsh rolini ötep kelgenlikini bildürdi we qandaqla bolushidin qet'iy nezer tinchliq saqlashni tinchliq ornitishning ornigha dessetkili bolmaydighanliqini qoshumche qildi.

U tinchliq saqlash üstide toxtilip mundaq dédi: "tinchliq ornitilghan bolsa bizgimu köp xizmet qalmaydu, emma u chaghda biz toqunushiwatqan terepler arisida zorawanliqlarning qayta yüz bermeslikini kapaletke ige qilishni ilgiri sürimiz".

U yene, tinchliq saqlash qisimlirining bezi wezipilirining birleshken döletler teshkilati tinchliq saqlash nizamnamisining 7 - tarmiqi buyiche éghir tiptiki qorallar bilen qorallinip élip bérilidighanliqini , emma bezi wezipilerning toqunushqan ikki terep arisidiki munasiwetni közitip turushtin ibaret ikenlikini bildürdi.

Birleshken döletler teshkilati tinchliq saqlash qisimlirini toqunush ichidiki melum bir rayon'gha yötkesh hoquqi yenila birleshken döletler teshkilati bixeterlik kéngishining qolida bolup, esker yötkesh qarari mezkur kéngeshke da'imiy eza besh döletning ortaq qoshulushi asasida wujutqa chiqidu.

Bu heqte toxtalghan istratégiye mutexessisi türkiye haji töpe uniwérsitétning oqutquchisi erkin ekrem ependining otturigha qoyushiche, shundaq bolghanliqtin kéngeshke eza bezi döletler, dölet menpe'eti sewebidin bezi köngüldikidek qararlarning élinishigha tosqunluq qilidiken.

Erkin ekrem birleshken döletler teshkilatida ongushluq élinmay qalghan bu xildiki qarar heqqide toxtilip sudan mesilisini misal qildi.

Birleshken döletler teshkilati tinchliq saqlash qisimi élan qilghan axbaratqa qarighanda, hazir dunyaning her qaysi jaylirida wezipe ötewatqan xadimlar 119 dölettin kelgen bolup, eng köp xadim ewetidighan döletler, pakistan, bén'gal, hindistan , nigériye we népal qatarliq döletlerni öz ichige alidiken.

Axbaratta körsitilishiche, hazir birleshken döletler teshkilati tinchliq saqlash qisimlirining yilliq chiqimi 6.5 Milyard amérika dolliri bolup, iqtisadi yardemning köp qisimini amérika qoshma shtatliri we yaponiye öz üstige alghan iken.

Gerche birleshken döletler teshkilati tinchliq saqlash qisimliri ötken 60 yil jeryanida dunyaning her qaysi rayonlirida tinchliq saqlashqa a'it her türlük wezipilerni ötep kelgen bolsimu, emma bu jeryanda bezi sewenliklermu meydan'gha kelgen bolup, en'gliye balilarni qutquzush jem'iyitining yéqinda bu heqte ashkarilighan doklati bularning ichidiki eng yéngisi bolup, melum bolushiche, tinchliq saqlash qisimliridiki bezi xadimlar qoramigha yetmigen balilargha jinsiy parakendichilik salghan.

Amérika awazi radi'osida neqil qilinishiche, tinchliq saqlash qisimliri mu'awin bash katipi je'an mari'e gu'éhnno, bundaq xewerlerning kishini tolimu bi'aram qilidighanliqini, emma bundaq doklatlarning rolining intayin zor ikenlikini bildürgen we her yili 200 ming etrapidiki tinchliq saqlash xadimlirini wezipe öteshke teshkillesh müshkülati jiq bir xizmet ikenlikinimu qoshumche qilghan.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet