Béyjing da'irilirining 18 - qurultay harpisidiki intérnét kontrolluqi inkas qozghidi

Xitayda 18 - qurultayning échilish harpisida béyjing da'irilirining, intérnétke bolghan qamalni kücheytip, “ Ösek söz tarqatqanlargha zerbe bérish” namida, pütün küchi bilen xelq arisidiki naraziliq pikirlirini basturushqa urunushi, xitay weziyitini közitip kéliwatqan xelq'ara metbu'atlarning birnechche kündin buyanqi diqqet nuqtisigha aylandi.

Xongkung minbaw gézitining xewer qilishiche, béyjing sheherlik saqchi idarisining bashliqi bo jéngxu'a 24 - iyul küni ölke derijiliktin yuqiri kadirlargha échilghan yighinda söz qilip, 18 - qurultay mezgilide, intérnét tori arqiliq partiye, hökümet rehberliri üstidin ösek söz tarqatquchilargha qattiq zerbe bérilidighanliqini bildürgen.

Xewerlerdin melum bolushiche, 21 - iyul béyjingda yüz bergen yamghur apitidin kéyin béyjing sheher bashliqi apettin kéyinki qutquzush seperwerlik yighinida qilghan sözidimu, béyjing shehiride apettin qutquzush xizmitining muhim nuqtisi, amma arisidiki ösek sözlerning tarqilishini kontrol qilip, jem'iyet muqimliqini saqlap, 18 - qurultay mezgilide yüz bérish éhtimali bolghan ammiwi xaraktérlik ijtima'i naraziliq heriketlirining aldini élish ikenlikini alahide tekitligen.

Radi'omiz igiligen uchurlardin melum bolushiche, bir nechche kündin buyan béyjingda herqaysi torxanilarda intérnét saqchiliri ilgiriki künlerdikidin hessilep köpeytilgen. Béyjing saqchi da'iriliri 239 orunda tor béketlirini nazaret qilish ponkiti qurghan. 26 - Iyul künige qeder intérnétte sezgür uchur yollighan 5007 kishi saqchilar teripidin qolgha élin'ghan. Sezgür uchurlarni yollan'ghanliqi seweblik idare - jem'iyet hem shirketlerge qarashliq 7549 tor békitige jerimane qoyulup, qattiq agahlandurulghan. Undin bashqa xitaydiki eng chong ammiwi tor béketliridin beydu, shinlang qatarliq tor béketlirimu tor bétide uqturush chiqirip, yuqiriqi intérnét shirketlirining béyjing sheherlik hökümet tesis qilghan axbarat ishxanisining bir tutash bashqurushida bolidighanliqini bildürüp, tor abuntlirining intérnétte élan qilghan yollanmilirining aqiwitige shexsning özi mes'ul bolushi kéreklikini alahide uqturghan.

Béyjing bahari zhurnilining bash muherriri xu ping ependi ziyaritimizni qobul qilip, xitaydiki intérnét kontrolluqi heqqide toxtaldi.

Xu ping ependi sözide, yéqindin buyan xitayda barghanche éghirlishiwatqan kishilik hoquq depsendichiliki, bolupmu xitay hökümitining intérnét qamalini barghanche kücheytip, puqralirining pikir erkinlikini boghush qilmishi xelq'ara kishilik hoquq teshkilatlirining üzlüksiz tenqidige uchrap kéliwatqan bir mezgilde, béyjing da'irilirining xitayda échilish aldida turghan 18 - qurultay mezgilide muqimliqqa kapaletlik qilishni bahane qilip, xitay qanunida özi belgiligen “Junggo puqralirining hökümet organliri hem dölet kadirlirining xizmitini nazaret qilip, ulargha pikir bérish, xizmitidiki sewenliklerni tenqidlesh hoquqigha ige” dégen qanuniy belgilimilerni depsende qiliwatqanliqini eyiblidi.

Bügün 27 - iyul küni amérika dölet mejlisining tom lantis kishilik hoquq komitétimu pütkül yer sharidiki axbarat erkinliki heqqide ispat bérish yighini achqan bolup, yighinda xitay, iran qatarliq döletlerdiki uchur kontrolluqi yene bir qétim otturigha qoyulup, bu döletlerde puqralarning pikir erkinliki boghuluwatqanliqi eyiblendi.