Bombay weqesi ikki atom dölitining munasiwitini jiddiyleshtürmekte

Bügünki xewerlerdin melum bolushiche, hindistanning pul - mu'amile merkizi bolghan bombay shehiride 11 ‏ - ayning 26‏ - küni kechte yüz bergen térrorluq hujum jeryanida, hindistan qisimliri teripidin tutuwélin'ghan térrorchining ismi ajmal qasap.
Muxbirimiz weli
2008-12-02
Share
Hin-bombay-taj-maxal-305.jpg Süret, 26 - noyabir künidiki hujumgha uchrighan bombay shehiridiki dangliq méhmanxanilardin biri taj - maxal méhmanxanisining ot ketken körünüshi.
AFP Photo

U hindistan saqchilirigha özining 'leshkiri ta'ipe' dégen herbi gurup teripidin pakistanda 6 ay herbiy telim körgen kishi ikenlikini, u pakistandiki herbiy telimde yéqin musapidin hujum qilish, kishilerni görüge éliwélish, partlatquchilarni birterep qilish, sün'i hemra arqiliq yönilish belgilesh, déngizlarda hayatliqni saqlap qélish qatarliq téxnikiliq meshqni tamamlighanliqini iqrar qilghan.

'Leshkiri ta'ipe' dégen teshkilat 2002 ‏ - yili térrorchi teshkilatlar tizimlikige élin'ghan

Birleshme agéntliqining bügün bombaydin bayan qilishiche, 'leshkiri ta'ipe' dégen teshkilat 2002 ‏ - yili amérika, en'giliye teripidin térrorchi teshkilat tizimlikige élin'ghandin kéyin, pakistan bésim astida qélip, bu teshkilatni cheklesh buyruqi chiqarghan idi.

Emma yéqinqi künlerde bu térrorchi teshkilattin herbiy telim alghan ajmal qasap özining iqrarida, ular bu qétim hindistanning ikki kichik kémisini bulap, kémichilerdin 3 ni öltürüp, qalghanlirini bombaygha apirip qoyushqa qistighanliqi, yéshi 18 din 28 giche bolghan bu térrorchilar ikki guruppigha bölünüp oxshimighan yönilishtin bombaygha kirgenliki, qorallirini bolsa ijarige alghan taksilargha yoshurup qoyup, özliri taj mehel qatarliq eng ali méhmanxanilargha orunliship purset kütüp turghanliqi qatarliqlarni tepsiliy bayan qilghan.

Xitay, rusiyilermu térrorchiliqqa qarshi turushta hindistan bilen hemkarlishidighanliqini jakarlidi

Birleshme agéntliqining yéngi déhli we islam'abadtiki yazghuchiliridin ashok sharma, rawi nésmanlarning bügün élan qilghan xewiride, bombaydiki térrorluq hujumda ölgen 19 chet'ellikning amérikiliq, gérmaniyilik, kanadaliq, isra'iliyilik, en'gliyilik, italiyilik, méksikiliq, yaponiyilik, taylandliq awstiraliyilik, sin'gaporluq we xitayliq ikenlikini bayan qilin'ghandin kéyin, xitay tashqi ishlar ministirlikining bayanatchisi lyujenchaw mushu döletlerge oxshash inkas qayturup 'junggo hökümiti hindistanni öz ichige alghan xelq'ara jem'iyet bilen hemkarliqni kücheytip, térrorchiliqqa bille zerbe béridu' dep jakarlidi we bombay weqesini tekshürüshte munasiwetlik döletler bilen hemkarlishidighanliqini bildürdi.

Amérika awazning bayan qilishiche, bügün bombayda térrorchilarning hujumida ölgen kishilerning urugh - tughqanliri haza tutidighan heriketler téximu ewj aldi. Bügün yene, hindistanning asam shitatidiki dipu poyiz istansisida partlash weqesi yüz bérip, 2 adem ölgen 30 nechche adem yarilandi.

Bundaq ehwal astida, krémilning bayanatchisimu, térrorchiliqqa zerbe bérishte hindistan bilen yéqindin hemkarlishidighanliqini jakarlidi. Shundaqla rusiye prézidénti médwédéfning bu meqset üchün hindistanni ziyaret qilish aldida turuwatqanliqini bildürdi, rusiyining bombaydiki ali méhmanxanilarda turiwatqan herbiy qoral sodigerliri térrorchilarning hujumigha uchrimighan iken.

Hindistan hökümiti pakistan'gha 20 nechche neper térrorchi gumandarining tizimlikini tapshurdi

B b s ning bayan qilishiche, hindistan hökümiti bügün élan qilghan bayanatida, islam'abadni öz dölitidiki térrorchilargha ünümlük zerbe bermidi, wehshiylerge yol qoydi, dep eyiblidi, shundaqla yene, pakistanning hindistanda turushluq bash elchisini chaqirtip kélip, uninggha bu qétim bombayda yüz bergen weqe pakistan bilen munasiwetlik, dep körsitip naraziliq xéti tapshurdi.

Uninggha hazir pakistan térritoriyiside turuwatqan 20 nechche neper térrorchining tizimlikini bérip, pakistan hökümitidin ularni tutup ötküzüp bérishni telep qildi.

Hindistan hökümiti pakistan'gha tapshurghan térrorchilar tizimlikide, 1993‏ - yili bombayda partlitish weqesi peyda qilip 250 ademning hayatigha zamin bolghan térrorchiliq jinayet gumandari dawut ibrahim qatarliqlar bar.

Pakistan hökümiti hindistanning eyiblishini ret qildi

Xewerde bayan qilinishiche, islam'abad hökümiti bu qétim bombayda yüz bergen weqe bilen pakistanning munasiwiti barliqini ret qildi. Hindistanning bügün pakistan bash elchisini chaqirtip kélip naraziliq bildürgenlikinimu ikki terep hemkarlishish heqqide dostane söhbetleshti' dep özgertip élan qildi.

Jenubiy asiyadiki bu ikki atom dölitining hazir öz - ara qollan'ghan söz ibariliri barghansiri yirikleshmekte. Hindistan terep 'bombay weqesi üchün pakistan'gha éniq inkas qayturimiz' dep jakarlisa, pakistan uninggha qarita ' bu qétim bombayda yüz bergen weqege pakistanning chétilidighanliqini delilleydighan éniq ispat körsitilishi kérek', 'hindistan térrorchilar qurghan tuzaqqa chüshüp qalmasliqi kérek' dep jakarlidi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet